ກອງປະຊຸມໃຫຍ່ຜູ້ແທນອົງຄະນະພັກກະຊວງກະສິກຳ ແລະ ປ່າໄມ້ (ກປ) ຄັ້ງທີ VI ໄດ້ປິດລົງ ໃນວັນທີ 17 ພະຈິກ 2020 ນີ້, ພາຍຫຼັງໄດ້ດໍາເນີນມາເປັນເວລາ 1 ວັນ, ທີ່ນະຄອນຫຼວງວຽງຈັນ ໂດຍການເປັນປະທານຂອງສະຫາຍ ເພັດ ພົມພິພັກ ກຳມະການສູນກາງພັກ ເລຂາຄະນະພັກກະຊວງ ກປ.

ໃຫ້ກຽດເຂົ້າຮ່ວມຂອງ ສະຫາຍ ບຸນທອງ ຈິດມະນີ ກຳມະການກົມການເມືອງສູນກາງພັກ ຮອງນາຍົກລັດຖະມົນຕີ ປະທານຄະນະເລຂາທິການສູນກາງພັກ ປະທານກວດກາສູນກາງພັກ ແລະ ອົງການກວດກາລັດຖະບານ ຫົວໜ້າອົງການຕ້ານການສໍ້ລາດບັງຫຼວງຂັ້ນສູງກາງ, ພ້ອມດ້ວຍຜູ້ແທນສົມບູນທົ່ວກະຊວງ ກປ ເຂົ້າຮ່ວມ. ກອງປະຊຸມຄັ້ງນີ້, ໄດ້ຕີລາຄາການຈັດຕັ້ງປະຕິບັດມະຕິກອງປະຊຸມໃຫຍ່ຄັ້ງທີ V ຂອງອົງຄະນະພັກກະຊວງ ກປ (2016-2020) ຊຶ່ງເປັນໄລຍະທີ່ສະພາບແວດລ້ອມໃນພາກພື້ນ ແລະ ສາກົນ ມີຄວາມຫຍຸ້ງຍາກ ແລະ ສິ່ງທ້າທາຍຫຼາຍປະການ ບວກກັບໄພພິບັດທາງທຳມະຊາດທີ່ເກີດຂຶ້ນຕໍ່ເນື່ອງ, ການລະບາດຂອງສັດຕູພືດ ແລະ ພະຍາດເປັນບໍລິເວນກວ້າງຢູ່ພາຍໃນປະເທດ ແລະ ການລະບາດຂອງພະຍາດ ໂຄວິດ-19 ແກ່ຍາວ.

ໃນໄລຍະ 5 ປີ ຜ່ານມາ, ເຮັດໃຫ້ຈັງຫວະການຂະຫຍາຍຕົວຂອງຂະແໜງກະສິກຳ ແລະ ປ່າໄມ້ ສະເລ່ຍບັນລຸໄດ້ 2,1% ຕໍ່ປີ, ກວມເອົາ 16,6% ຂອງ GDP ໃນປີ 2020. ການຜະລິດກະສິກຳ ເພື່ອຄ້ຳປະກັນຄວາມໝັ້ນຄົງດ້ານສະບຽງອາຫານ ແລະ ເປັນສິນຄ້າໃນໄລຍະ 5 ປີຜ່ານມາ, ພວກເຮົາສາມາດຜະລິດເຂົ້າເປືອກໂດຍສະເລ່ຍໄດ້ 3,7 ລ້ານໂຕນ/ປີ ທຽບໃສ່ແຜນການດັດແກ້ເພີ່ມຂຶ້ນ 8%, ການລ້ຽງສັດ ແລະ ການປະມົງ ກໍ່ໄດ້ມີການສືບຕໍ່ຂະຫຍາຍຕົວຕໍ່ເນື່ອງ 4,4-4,7% ຕໍ່ປີ, ອັດຕາບໍລິໂພກທາດຊີ້ນຢູ່ພາຍໃນບັນລຸໄດ້ 65 ກິໂລ/ຄົນ/ປີ.ວຽກງານການຄຸ້ມຄອງ ແລະ ພັດທະນາປ່າໄມ້ ໄດ້ສຳຫຼວດຈັດສັນທີ່ດິນ 3 ປະເພດປ່າເພື່ອພັດທະນາ, ໄດ້ສຳຫຼວດການຍົກລະດັບປ່າສະຫງວນແຫ່ງຊາດນ້ຳແອດ-ພູເລີຍ, ນາກາຍ-ນ້ຳເທີນ ແລະ ຫີນໜາມໜໍ່ ຂຶ້ນເປັນອຸທິຍານແຫ່ງຊາດ, ສຳເລັດການສ້າງເຂດອະນຸລັກສັດປ່າທີ່ຫາຍາກໂອ່ງ-ມັ່ງໃຫ້ເປັນເຂດຮັກສາພັນສັດປ່າແຫ່ງຊາດ, ມີໂຮງງານປຸງແຕ່ງໄມ້ປູກເພື່ອປຸງແຕ່ງໄມ້ ແລະ ເຈັ້ຍເພື່ອສົ່ງອອກຢູ່ແຂວງພາກກາງ, ເນື້ອທີ່ປ່າປົກຫຸ້ມບັນລຸໄດ້ 62%, ເພີ່ມຂຶ້ນ 4% ທຽບໃສ່ປີ 2015.ການພັດທະນາຊົນນະບົດ ແລະ ແກ້ໄຂຄວາມທຸກຍາກ ຕິດພັນກັບວຽກງານ 3 ສ້າງ ໃນໄລຍະ 5 ປີຜ່ານມາ, ມີຄອບຄົວ, ບ້ານ ແລະ ເມືອງ ບັນລຸຕາມມາດຕະຖານພົ້ນທຸກຕາມດຳລັດ 348/ລບ ຈຳນວນ 971.900 ຄອບຄົວຂອງຈຳນວນຄອບຄົວທັງໝົດ 1.238.168 ຄອບຄົວ, 4.899 ບ້ານຂອງຈຳນວນບ້ານທັງໝົດ 8.424 ບ້ານ ແລະ 63 ເມືອງຂອງຈຳນວນເມືອງທັງໝົດ 148 ເມືອງ, ຄອບຄົວ ແລະ ບ້ານ ບັນລຸຕາມມາດຕະຖານພັດທະນາ 620.994 ຄອບຄົວ, 1.477 ບ້ານ. ສ້າງບ້ານໃຫຍ່ເປັນຕົວເມືອງນ້ອຍໃນຊົນນະບົດໄດ້ 4 ບ້ານ, ການຈັດສັນພູມລຳເນົາ ແລະ ອາຊີບ ມາຮອດປັດຈຸບັນ ໄດ້ແກ້ໄຂທີ່ຢູ່ອາໄສ ແລະ ປັບປຸງຊີວິດການເປັນຢູ່ໃຫ້ປະຊາຊົນໄດ້ 10.545 ຄອບຄົວ, ໃນ 203 ບ້ານ ໂດຍລວມແລ້ວ ໄດ້ສຳເລັດການພັດທະນາຢູ່ຈຸດສຸມຈັດສັນພູມລຳເນົາທັງໝົດ 88 ຈຸດ. ວຽກງານສະຫະກອນປັດຈຸບັນ, ທົ່ວປະເທດມີ 1.528 ກຸ່ມ, ມີສະຫະກອນທັງໝົດ 50 ຫົວໜ່ວຍ, ໃນນັ້ນສະຫະກອນຜະລິດກະສິກຳ 23 ຫົວໜ່ວຍ ແລະ ສະຫະກອນສິນເຊື່ອ 27 ຫົວໜ່ວຍ. ການຜະລິດພືດເປັນສິນຄ້າສົ່ງອອກແມ່ນປະຕິບັດໄດ້ 9,1 ລ້ານໂຕນຕໍ່ປີ ຊຶ່ງມີມູນຄ່າສົ່ງອອກສິນຄ້າປະມານ 4 ຕື້ກີບ ຫຼື ປະມານ 800 ລ້ານໂດລາຕໍ່ປີ, ເປັນຕົ້ນແມ່ນກາເຟ, ສາລີອາຫານສັດ, ໝາກເດືອຍ, ກ້ວຍ, ມັນຕົ້ນ, ອ້ອຍ, ຢາງພາລາ. ຂໍ້ມູນນີ້ບໍ່ໄດ້ລວມສິນຄ້າສົ່ງອອກຜ່ານດ່ານທ້ອງຖິ່ນ, ການພັດທະນາຟາມລ້ຽງງົວຊີ້ນ ແລະ ງົວນົມຂະໜາດໃຫຍ່ ເພື່ອເປັນສິນຄ້າສົ່ງອອກ ເປັນຕົ້ນແມ່ນ ຟາມລ້ຽງງົວຢູ່ລາດແສນແຂວງຊຽງຂວາງ (ສົ່ງອອກ ສປ ຈີນ) ໂດຍນຳໃຊ້ເຕັກນິກ ແລະ ນະວັດຕະກຳ ໃໝ່ເຂົ້າໃນການປະສານສົມທົບພັນທຽມດ້ວຍການຝັງຕົວອ່ອນຈາກຫ້ອງທົດລອງເຂົ້າໃສ່ແມ່ພັນ.

ມາຮອດປັດຈຸບັນ, ງົວອາຍຸ 3 ປີ ມີນໍ້າໜັກເຖິງ 900 ກິໂລຕໍ່ໂຕ. ໄດ້ເກີດມີຕົວແບບການຄຸ້ມຄອງປົກປັກຮັກສາປ່າໄມ້ແບບຍືນຍົງ ຕິດພັນກັບການສົ່ງເສີມການທ່ອງທ່ຽວທຳມະຊາດແບບມີສ່ວນຮ່ວມລະຫວ່າງພາກລັດ, ຜູ້ປະກອບການ ແລະ ປະຊາຊົນແບບຕ່າງຝ່າຍຕ່າງມີຜົນປະໂຫຍດຄື: ນໍ້າກັດຢໍລະປາ ແຂວງອຸດົມໄຊ, ນ້ຳປຽນຢໍລະປາ ນະຄອນຫຼວງວຽງຈັນ, ນ້ຳກ່ານ ແຂວງບໍ່ແກ້ວ, ພູຜາມ່ານ ແຂວງບໍລິຄຳໄຊ. ນອກນີ້ ກໍ່ໄດ້ປຸກລະດົມພາກສ່ວນທຸລະກິດພາຍໃນປະເທດເຂົ້າຮ່ວມສ້າງຕົວແບບໃນການພັດທະນາຊົນນະບົດ ແລະ ແກ້ໄຂຄວາມທຸກຍາກຂອງບໍລິສັດນ້ຳດື່ມໂລມາຄຳໃນການແກ້ໄຂຄວາມທຸກຍາກຢູ່ບ້ານຄຳປາແໜ ແລະ ບ້ານກ້ວຍ ເມືອງຈຳພອນ ແຂວງສະຫວັນນະເຂດດ້ວຍການສ້າງອາຊີບໃໝ່ ທີ່ຕິດພັນກັບການປູກຝັງ-ລ້ຽງສັດ.

ໃນພິທີ ຍັງມີການປ່ອນບັດເລືອກຕັ້ງເອົາຄະນະບໍລິຫານງານພັກກະຊວງກະສິກຳ ແລະ ປ່າໄມ້ຊຸດ ໃໝ່ ຊຶ່ງມີຜູ້ລົງສະໝັກມີ 19 ສະຫາຍ, ເລືອກເອົາ 15 ສະຫາຍ. ພ້ອມທັງເລືອກເອົາຜູ້ແທນສົມບູນ 6 ສະຫາຍ ແລະ ສຳຮອງ 2 ສະຫາຍ ໄປເຂົ້າຮ່ວມກອງປະຊຸມໃຫຍ່ຜູ້ແທນທົ່ວປະເທດຄັ້ງທີ XI ຂອງພັກ, ໃນນັ້ນກອງປະຊຸມຄັ້ງປະຖົມມະລືກໄດ້ເຫັນດີເປັນເອກະພາບເລືອກເອົາສະຫາຍ ເພັດ ພົມພິພັກ ເປັນເລຂາ, ສະຫາຍ ທອງພັດ ວົງມະນີ ເປັນຮອງເລຂາ ຄະນະບໍລິຫານງານພັກ ກະຊວງກະສິກຳ ແລະ ປ່າໄມ້, ເລືອກເອົາ ສະຫາຍ ນ.ພວງເພັດ ປູ່ວັງ ເປັນປະທານກວດກາ, ສະຫາຍ ສົມພອນ ແກ້ວຫາວົງ ແລະ ສະຫາຍ ສົມສັກ ສີສົມພູ ເປັນຮອງປະທານກວດກາ.

Medialaos MMD (ແຫຼ່ງຂໍ້ມູນຈາກ: ໜັງສືພິມ ປະຊາຊົນ)