ກອງປະຊຸມໃຫຍ່ຜູ້ແທນ ອົງຄະນະພັກ ກະຊວງໂຍທາທິການ ແລະ ຂົນສົ່ງ (ຍທຂ) ຄັ້ງທີ V ໄດ້ໄຂຂຶ້ນຢ່າງເປັນທາງການ ໃນວັນທີ 19 ພະຈິກ 2020 ເພື່ອທົບທວນຄືນ ການນຳພາ-ຊີ້ນຳຕະຫລອດໄລຍະ 5 ປີຜ່ານມາ, ວາງທິດທາງຄາດໝາຍສູ້ຊົນໃນ 5 ປີຕໍ່ໜ້າ ແລະ ເລືອກຕັ້ງເອົາຄະນະບໍລິຫານງານພັກກະຊວງຊຸດໃໝ່ເພື່ອເປັນຫລັກແຫລ່ງສືບຕໍ່ນຳພາ-ຊີ້ນຳວຽກງານຂອງຂະແໜງໂຍທາທິການ ແລະ ຂົນສົ່ງ ໃນຕໍ່ໜ້າທີ່ພັກ, ລັດຖະບານ ແລະ ປະຊາຊົນມອບໝາຍໃຫ້.

ກອງປະຊຸມດັ່ງກ່າວ, ຈະດຳເນີນເປັນເວລາ 2 ວັນ ພາຍໃຕ້ການເປັນປະທານຂອງ ສະຫາຍ ບຸນຈັນ ສິນທະວົງ ເລຂາຄະນະພັກກະຊວງ, ລັດຖະມົນຕີ ກະຊວງໂຍທາທິການ ແລະ ຂົນສົ່ງ ໂດຍໃຫ້ກຽດເຂົ້າຮ່ວມຂອງ ສະຫາຍ ສອນໄຊ ສີພັນດອນ ກໍາມະການກົມການ ເມືອງສູນກາງພັກ, ຮອງນາຍົກລັດຖະ ມົນຕີ, ລັດຖະມົນຕີ ກະຊວງແຜນການ ແລະ ການລົງທຶນ, ມີຄະນະປະທານກອງປະຊຸມ, ພະນັກງານປະຕິວັດອາວຸໂສບຳນານ ແລະ ຜູ້ແທນສົມບູນ ຈຳນວນ 238 ສະຫາຍ, ຍິງ 54 ສະຫາຍ ທີ່ເປັນຕົວແທນໃຫ້ແກ່ສະມາຊິກພັກທັງໝົດ ຈຳນວນ 686 ສະຫາຍ ແລະ ພາກສ່ວນອື່ນໆ ທີ່ກ່ຽວຂ້ອງເຂົ້າຮ່ວມຢ່າງພ້ອມພຽງ.

ໂອກາດນີ້, ສະຫາຍ ບຸນຈັນ ສິນທະວົງ ກ່າວວ່າ: ກອງປະຊຸມໃຫຍ່ ຜູ້ແທນອົງຄະນະພັກກະຊວງ ຍທຂ ໃນຄັ້ງນີ້, ແມ່ນມີຄວາມ ໝາຍສຳຄັນ ຢ່າງຍິ່ງ ເຊິ່ງຈະໄດ້ພ້ອມກັນ ສັງເກດຕີລາຄາ ຜົນການຈັດຕັ້ງປະຕິບັດ ໃນຂະແໜງ ຍທຂ ທີ່ກອງປະຊຸມໃຫຍ່ ຄັ້ງທີ X ຂອງພັກໄດ້ກຳນົດ, ຕິດພັນກັບການຈັດຕັ້ງຜັນຂະຫຍາຍມະຕິຂອງກອງປະຊຸມໃຫຍ່ ຄັ້ງທີ IV ຂອງອົງຄະນະພັກກະຊວງ ຍທຂ, ພ້ອມທັງຄົ້ນຄວ້າຖອດຖອນບົດຮຽນເພື່ອເສີມຂະຫຍາຍດ້ານຕັ້ງໜ້າ, ແກ້ໄຂບັນຫາທີ່ ຍັງຄົງຄ້າງ ແລະ ກຳນົດທິດທາງແຜນການ ໃນໄລຍະ 5 ປີ ຕໍ່ໜ້າ (2021-2025) ເພື່ອສືບຕໍ່ປະຕິບັດວຽກງານຂອງຂະແໜງ ຍທຂ ໃຫ້ປະສົບຜົນສຳເລັດອັນໃຫຍ່ຫລວງກວ່າເກົ່າ, ສືບຕໍ່ສ້າງປະຖົມປັດໄຈ ໃຫ້ແກ່ການຫັນເປັນອຸດສະຫະກຳ ແລະ ທັນສະໄໝ ເພື່ອໃຫ້ປະເທດເຮົາ ກ້າວຂຶ້ນສັງຄົມນິຍົມ ຕາມຈຸດໝາຍທີ່ພັກເຮົາໄດ້ກຳນົດໄວ້. ໜ້າທີ່ສຳຄັນອີກອັນໜຶ່ງ ແມ່ນຈະໄດ້ດຳເນີນ ການປ່ອນບັດຄັດເລືອກເອົາຄະນະພັກກະຊວງ ຍທຂ ສະໄໝທີ V ທີ່ສະແດງເຖິງຄວາມສາມັກຄີ ເປັນຈິດໜຶ່ງໃຈດຽວ ເພື່ອຮັບປະກັນລັກສະນະສືບທອດປ່ຽນແທນ ແລະ ເຮັດໃຫ້ຖັນແຖວພະນັກງານ ການນຳຂອງກະຊວງ ຍທຂ ນັບມື້ນັບໜຸ່ມແໜ້ນເພື່ອສືບຕໍ່ ນຳພາ-ຊີ້ນຳ ຂະແໜງການໂຍທາທິການ ແລະ ຂົນສົ່ງ ໃນຊຸມປີຕໍ່ໜ້າ.

ຂະນະດຽວກັນ, ສະຫາຍປະທານກອງປະຊຸມ ກໍໄດ້ເນັ້ນໃຫ້ບັນດາຜູ້ແທນກອງປະຊຸມ ຈົ່ງເຊີດຊູຄວາມຮັບຜິດຊອບ, ເສີມຂະຫຍາຍ ສິດປະຊາທິປະໄຕ, ສຸມຈິດໃຈ, ສະຕິປັນຍາ ແລະ ຄວາມຮູ້ຄວາມສາມາດຂອງຕົນເຂົ້າໃນການຄົ້ນຄວ້າປະກອບຄຳເຫັນໃສ່ເນື້ອໃນຮ່າງລາຍງານການເມືອງ ແລະ ຮ່າງບົດສຳຫລວດການນຳພາລວມຂອງຄະນະພັກກະຊວງຢ່າງສັດຈະວິພາກເພື່ອເຮັດໃຫ້ກອງປະຊຸມໃຫຍ່ ຂອງພວກເຮົາບັນລຸຜົນສຳເລັດຢ່າງສະຫງ່າງາມ.    

ພ້ອມກັນນັ້ນ, ກໍໄດ້ຜ່ານຮ່າງບົດລາຍງານການເມືອງ, ຮ່າງແຜນພັດທະນາ 5 ປີ ຂອງຂະແໜງ ຍທຂ ແລະ ບົດສຳຫລວດການນຳພາລວມ ຂອງຄະນະພັກກະຊວງ ສະໄໝທີ IV, ເຊິ່ງຕະຫລອດໄລຍະ 5 ປີຜ່ານມາ ຄະນະພັກກະຊວງ ຍທຂ ໄດ້ເອົາໃຈໃສ່ຢ່າງຕັ້ງໜ້າ ໃນການຄົ້ນຄ້ວາຮໍ່າຮຽນ ທິດສະດີມາກ-ເລນິນ, ແນວຄິດໄກສອນພົມວິຫານ, ບັນດາມະຕິກອງປະຊຸມຄົບຄະນະຂອງຄະນະບໍລິຫານງານສູນກາງພັກ ສະໄໝທີ X ແລະ ບັນດາເອກະສານສຳຄັນຂອງພັກ ເຮັດໃຫ້ສະມາຊິກພັກ-ພະນັກງານ ພາຍໃນກະຊວງໄດ້ມີຄວາມຮັບຮູ້ ແລະ ເຂົ້າໃຈຢ່າງທົ່ວເຖິງ ແລະ ນຳໄປຈັດຕັ້ງຜັນຂະຫຍາຍສ້າງເປັນແຜນງານ, ແຜນການ ແລະ ໂຄງການລະອຽດໃນແຕ່ລະຂະແໜງ ການວິຊາສະເພາະຂອງຕົນ.

ໄດ້ສືບຕໍ່ຍົກລະດັບ ແລະ ພັດທະນາໂຄງລ່າງພື້ນຖານຄົມມະນາຄົມ ຢ່າງເປັນລະບົບໃຫ້ເຊື່ອມຈອດກັນ ແລະ ກົມກຽວໃຫ້ມີຄວາມ ໂລ່ງລ່ຽນ, ເຊິ່ງເຊື່ອມຈອດ ແຕ່ສູນກາງຫາທ້ອງຖິ່ນ ແລະ ກັບບັນດາປະເທດອ້ອມຂ້າງ, ພາກພື້ນ ແລະ ສາກົນ ໃຫ້ມີຄວາມສະດວກ, ທັນສະໄໝ ແລະ ປອດໄພ, ເຊິ່ງມາຮອດປີ 2019 ທົ່ວປະເທດ ມີລະບົບຕາໜ່າງເສັ້ນທາງທັງໝົດ 58.254 ກິໂລແມັດ ເມື່ອທຽບໃສ່ປີ 2015 ເພີ່ມຂື້ນ 1.922 ກິໂລແມັດ. ນອກຈາກນັ້ນ, ຍັງສາມາດພັດທະນາລະບົບນໍ້າປະປາໄດ້ 169 ແຫ່ງໃນ 121 ຕົວເມືອງ ສາມາດສະໜອງນໍ້າປະປາໃຫ້ປະຊາກອນ ໃນຕົວເມືອງ ກວມ 76% ເມື່ອທຽບໃສ່ຄາດໝາຍສູ້ຊົນເຫັນວ່າຍັງຫລຸດ 4% ແລະ ຄາດວ່າຈະໃຫ້ສໍາເລັດຕາມແຜນການ ໃນທ້າຍປີ 2020.

ໃນຕໍ່ໜ້າ, ຄະນະພັກກະຊວງ ຍທຂ ຈະສືບຕໍ່ເອົາໃຈໃສ່ປັບປຸງກໍ່ສ້າງພັກດ້ານການເມືອງແນວຄິດ, ດ້ານການຈັດຕັ້ງ, ແບບແຜນວິທີ ການເຮັດວຽກໃຫ້ມີຄວາມປອດໃສ ແລະ ຊື່ສັດບໍລິສຸດ, ພ້ອມທັງເພີ່ມທະວີ ຄວາມສາມັກຄີ ເປັນເອກະພາບພາຍໃນພັກ ແລະ ການຈັດຕັ້ງທຸກຂັ້ນ, ເສີມຂະຫຍາຍນໍ້າໃຈຮັກຊາດ, ເຊີດຊູສະຕິເອກະລາດ ເປັນເຈົ້າຕົນເອງ, ຍົກສູງຄວາມສາມາດໃນການນຳພາ ແລະ ຄວາມເປັນແບບຢ່າງນຳໜ້າຂອງພັກໃນການສືບຕໍ່ພາລະກິດປ່ຽນແປງໃໝ່ໂດຍຖືເອົາການພັດທະນາເສດຖະກິດເປັນໃຈກາງ, ເອົາການຄ້າເປັນຕ່ອງໂສ້, ຄົມມະນາຄົມເປັນປາຍແຫລມດ້ວຍການເພີ່ມທະວີຄວາມສາມາດໃນການຄຸ້ມຄອງມະຫາພາກ, ຄຸ້ມຄອງການບໍລິຫານລັດຂອງຂະແໜງ ຍທຂ ໃຫ້ມີປະສິດທິຜົນຕາມກົນໄກເສດຖະກິດຕະຫລາດຕາມທິດສັງຄົມນິຍົມ.

ພ້ອມກັນນັ້ນ, ຈະຕັ້ງໜ້າຈັດຕັ້ງຜັນຂະຫຍາຍມະຕິ ກອງປະຊຸມໃຫຍ່ ຄັ້ງທີ XI ຂອງພັກ ເຂົ້າໃນວຽກງານຂອງຂະແໜງ ຍທຂ ເພື່ອສືບຕໍ່ນໍາໃຊ້ທ່າແຮງທາງດ້ານທີ່ຕັ້ງພູມສາດ ແລະ ໂຄງລ່າງພື້ນຖານທີ່ມີ ໂດຍສະເພາະເສັ້ນທາງລົດໄຟ ລາວ-ຈີນ ໃຫ້ເກີດປະໂຫຍດສູງສຸດ ພາຍໃຕ້ວິໄສທັດ ທີ່ວ່າ: “ພັດທະນາໂຍທາທິການ ແລະ ຂົນສົ່ງ ໃຫ້ເປັນປາຍແຫລມ, ມີຈຸດສຸມ, ປະສິດທິຜົນສູງ, ທັນສະໄໝ, ປອດໄພ, ມີຄວາມທົນທານຕໍ່ການປ່ຽນແປງດິນຟ້າອາກາດ, ເຊື່ອມໂຍງ-ເຊື່ອມຈອດ ແລະ ຍືນຍົງ”.

Medialaos MMD (ແຫຼ່ງຂໍ້ມູນຈາກ: ສຳນັກຂ່າວສານປະເທດລາວ)