ວັນທີ 18 ພະຈິກ 2020 ນີ້, ສ່ວຍສາອາກອນປະຈໍາ ແຂວງອັດຕະປື ຮ່ວມກັບເຈົ້າໜ້າທີ່ຈະລາຈອນ ກອງບັນຊາການປ້ອງກັນຄວາມສະຫງົບແຂວງ ແລະ ທະນາຄານ ການຄ້າຕ່າງປະເທດລາວມະຫາຊົນ ສາຂາແຂວງອັດຕະປື, ທະນາຄານພັດທະນາລາວ ສາຂາແຂວງອັດຕະປື ໄດ້ເປີດຂະບວນການຮັບຊໍາລະເສຍຄ່າທໍານຽມທາງ ປະຈຳປີ 2020 ຜ່ານລະບົບທະນາຄານ ໂດຍການນໍາພາຂອງທ່ານ ຄອນສະຫັວນ ໄຊຍະສອນ ຮອງຫົວໜ້າສ່ວຍສາອາກອນປະຈຳ ແຂວງອັດຕະປື, ພ້ອມດ້ວຍພາກສ່ວນທີ່ກ່ຽວຂ້ອງ ເຂົ້າຮ່ວມ.

ທ່ານ ຄອນສະຫັວນ ໄຊຍະສອນ ໄດ້ກ່າວວ່າ: ການເປີດຂະບວນການຮັບຊໍາລະເສຍຄ່າທໍານຽມທາງຜ່ານລະບົບທະນາຄານໃນຄັ້ງນີ້ ແມ່ນໄດ້ເຄື່ອນໄຫວ 2 ຈຸດຄື: ຈຸດປ້ອມຕຳຫລວດຈະລາຈອນ ຫລັກ 7, ປ້ອມຕໍາຫລວດຈະລາຈອນ ນາພອກ ເຊິ່ງຈະໃຊ້ເວລາຢູ່ 6 ວັນ ເພື່ອສືບຕໍ່ເຮັດໜ້າທີ່ປຸກລະດົມຊຸກຍູ້ໃຫ້ບັນດາບຸກຄົນ, ນິຕິບຸກຄົນໃນຂອບເຂດທົ່ວແຂວງ ທີ່ນຳໃຊ້ຍານພາຫະນະ ໃຫ້ເປັນເຈົ້າການຕື່ນຕົວປະກອບສ່ວນພັນທະຂອງຕົນຢ່າງຕັ້ງໜ້າ ແລະ ຫັນເຂົ້າສູ່ລະບຽບ, ກົດໝາຍ ໃຫ້ດີຂຶ້ນເທື່ອລະກ້າວໆ.

ທັງເປັນການສືບຕໍ່ຈັດຕັ້ງປະຕິບັດແຈ້ງການຂອງ ທ່ານຮອງນາຍົກລັດຖະມົນຕີ, ລັດຖະມົນຕີກະຊວງການເງິນ ແລະ ຄຳສັ່ງຂອງທ່ານເຈົ້າແຂວງອັດຕະປື ກ່ຽວກັບການຊໍາລະຄ່າທຳນຽມທາງ ປະຈຳປີ 2020 ໄປພ້ອມກັບການສ້າງຜົນງານ, ຂະບວນການ ຂໍ່ານັບຮັບຕ້ອນວັນຊາດທີ 2 ທັນວາ ຄົບຮອບ 45 ປີ ແລະວັນເກີດທ່ານປະທານໄກສອນ ພົມວິຫານ ຄົບຮອບ 100 ປີທີ່ຈະມາເຖິງໃນມໍ່ໆນີ້, ທັງເປັນການສຸມໃສ່ປະຕິບັດໄລຍະມ້ວນທ້າຍ ກໍຄືແຜນງົບປະມານແຫ່ງລັດ ປະຈຳປີ 2020 ໃຫ້ບັນລຸໄດ້ຕາມລະດັບຄາດໝາຍ ແລະ ເຫັນໄດ້ວ່າເຈົ້າໜ້າທີ່ໄດ້ເອົາໃຈໃສ່ສ້າງຂະບວນການຊຳລະຄ່າທຳນຽມທາງ.

Medialaos MMD (ແຫຼ່ງຂໍ້ມູນຈາກ: ສຳນັກຂ່າວສານປະເທດລາວ)