ໂດຍປະຕິບັດຕາມແຜນດຳເນີນງານຂອງສູນກາງພັກ ກໍຄື ບັນດາອະນຸກຳມະ ການກະກຽມກອງປະຊຸມໃຫຍ່ ຄັ້ງທີ XI ຂອງພັກ ໃນວັນທີ 19 ພະຈິກ 2020 ທີ່ຫ້ອງປະຊຸມໃຫຍ່ແຂວງ ອຸດົມໄຊ ໄດ້ເປີດກອງປະຊຸມທາບທາມຄວາມເຫັນໃສ່ສາມຮ່າງເອກະສານກອງປະຊຸມໃຫຍ່ຄັ້ງທີ XI ຂອງພັກ ພາຍໃຕ້ການເປັນປະທານຂອງສະຫາຍ ບຸນທອງ ຈິດມະນີ ກຳມະການກົມການເມືອງສູນກາງພັກ, ຄະນະເລຂາທິການສູນກາງພັກ, ຮອງນາຍົກລັດຖະມົນຕີ, ປະທານຄະນະກວດກາສູນກາງພັກ, ປະທານອົງການກວດກາລັດຖະບານ ແລະ ຫົວໜ້າອົງ ການຕ້ານການສໍ້ລາດບັງຫລວງຂັ້ນສູນກາງ, ມີ ສະຫາຍ ຈະເລີນ ເຢຍປາວເຮີ ກຳມະການສູນກາງພັກ, ລັດຖະມົນຕີ ປະຈຳສຳນັກງານນາຍົກລັດຖະມົນຕີ, ສະຫາຍ ຈັນທະບູນ ລັດຕະນະວົງ ຮອງຫົວໜ້າຫ້ອງວ່າການສູນກາງພັກ, ສະຫາຍ ກິແກ້ວ ຈັນທະບູລີ ຮອງລັດຖະມົນຕີ ກະ ຊວງແຜນການ ແລະ ການລົງທຶນ, ຜູ້ຕາງໜ້າຄະນະຈັດຕັ້ງສູນກາງພັກ ແລະ ມີບັນດາສະຫາຍ ເລຂາຄະນະພັກ, ກໍາມະການພັກແຂວງ, ພະນັກງານຫລັກແລ່ງ ຈາກ 6 ແຂວງພາກ ເໜືອເຂົ້າຮ່ວມ ຄື: ແຂວງ ອຸດົມໄຊ, ຜົ້ງສາລີ, ຫລວງນໍ້າທາ, ໄຊຍະບູລີ, ຫລວງພະບາງ ແລະ ແຂວງ ບໍ່ແກ້ວ, ມີຜູ້ເຂົ້າຮ່ວມ ທັງໝົດ 244 ສະຫາຍ, ຍິງ 27 ສະຫາຍ.

ກອງປະຊຸມໄດ້ຜ່ານສາມເອກກະສານສຳຄັນຄື:  ຮ່າງລາຍງານການເມືອງຕໍ່ກອງປະ ຊຸມໃຫຍ່ຄັ້ງທີ XI,  ຮ່າງແຜນພັດທະນາເສດກະກິດ 5 ປີ ຄັ້ງທີ IX ແລະ ຮ່າງກົດລະ ບຽບຂອງພັກປະຊາຊົນປະຕິວັດລາວ ສະໄໝທີ XI ສະບັບປັບປຸງ ເພື່ອສ້າງຄວາມເປັນເອກະພາບກັນທາງດ້ານທັດສະນະ, ທິດນໍາ, ແຜນນະໂຍບາຍໃຫຍ່ ທີ່ຈະກໍານົດອອກໃນແນວທາງການເມືອງ ແລະ ແນວທາງການຈັດຕັ້ງຂອງພັກໃນຊຸມປີຕໍ່ໜ້າ ເຊິ່ງຈິດໃຈລວມ ແມ່ນສ້າງການຫັນປ່ຽນທີ່ແຂງແຮງ, ເລິກເຊິ່ງ ແລະ ຮອບດ້ານ ເພື່ອນໍາພາ-ຊີ້ນໍາແກ້ໄຂບັນຫາຕ່າງໆໃຫ້ມີປະ ສິດທິພາບ ແລະ ປະສິດທິຜົນ, ເຮັດໃຫ້ເອກະສານກອງປະຊຸມໃຫຍ່ ຄັ້ງທີ XI ຂອງພັກ, ຊຶ່ງເປັນເອກະສານທີ່ສຳຄັນ ໃຫ້ມີເນື້ອໃນຄົບຖ້ວນ, ຖືກຕ້ອງສອດຄ່ອງ, ແທດເໝາະຕົວຈິງ, ສ່ອງແສງອອກໜົດທ່າແຮງບົ່ມຊ້ອນຂອງຊາດ ແລະ ຖືກນຳໄປປະຕິບັດໃຫ້ປະກົດຜົນເປັນຈິງ; ສ້າງຄວາມເຂົ້າໃຈລົງເລິກແຕ່ຫົວທີ ຂອງບັນດາສະຫາຍຄະນະພັກແຂວງ ຕໍ່ສາມຮ່າງເອກະສານຕົ້ນ ຕໍຂອງກອງປະຊຸມໃຫຍ່ ຄັ້ງທີ XI ຂອງພັກ.

ນອກນີ້, ສະຫາຍ ບຸນທອງ ຈິດມະນີ ໄດ້ມີຄຳເຫັນເຈາະຈີ້ມ ຕໍ່ກອງປະຊຸມທາບທາມກ່ຽວກັບຮ່າງບົດລາຍງານການເມືອງ, ຮ່າງແຜນພັດທະນາເສດຖະກິດ-ສັງຄົມ ແລະ ຮ່າງປັບປຸງກົດລະບຽບ ພາຍຫລັງທີ່ມີຄຳເຫັນເຈາະຈີ້ມແລ້ວ ສະຫາຍ ໄດ້ສະເໜີ ຜູ້ແທນທີ່ເຂົ້າຮ່ວມປະຊຸມ ບັນດາສະຫາຍ ຄະນະພັກ, ພະນັກງານຫລັກແຫລ່ງ ທີ່ມາຈາກ 6 ແຂວງ ພາກເໜືອ ປະກອບຄຳເຫັນ ເພື່ອເປັນພື້ນຖານສໍາຄັນ ໃຫ້ແກ່ການສືບຕໍ່ປັບປຸງຮ່າງເອກະສານດັ່ງກ່າວ ໃຫ້ມີເນື້ອໃນ ເລິກເຊິ່ງ, ຄົບຖ້ວນ, ແທດຕົວຈິງ ແລະ ມີຄວາມອາດສາມາດໃນການຈັດຕັ້ງປະຕິບັດໃຫ້ປະກົດຜົນເປັນຈິງ. ກອງປະຊຸມຈະໄດ້ດໍາເນີນເປັນເວລາ 2 ວັນຈຶ່ງຈະສໍາເລັດ.

Medialaos MMD (ແຫຼ່ງຂໍ້ມູນຈາກ: ສຳນັກຂ່າວສານປະເທດລາວ)