ໃນຕອນເຊົ້າວັນທີ 19 ພະຈິກ 2020, ບໍລິສັດຫຸ້ນສ່ວນວິສາຫະກິດ ກໍ່ສ້າງທາງລົດໄຟຈີ ຈຳກັດ ໄດ້ຈັດພິທີເປີດການມຸງໂຄງສ້າງ ແລະ ປະກອບໂຄງສ້າງເຫລັກຄັ້ງທຳອິດ (ຕັດຫລັງຄາ) ຂອງສະຖານີ ນະຄອນຫລວງວຽງຈັນ ໂຄງການກໍ່ສ້າງທາງລົດໄຟ ລາວ-ຈີນ, ເຊິ່ງປັດຈຸບັນສຳເລັດ ປະມານ 90% ແລະ ຄາດວ່າຈະໃຫ້ສຳເລັດໃນທ້າຍເດືອນ 12 ນີ້.

ທ່ານ ລີ ຊວງ ຫລາຍ ຜູ້ຈັດການໂຄງການກໍ່ສ້າງທາງລົດໄຟ ບໍ່ເຕັນ-ນະຄອນຫລວງວຽງຈັນ ຊ່ວງ FGSJ III ຂອງກຸ່ມບໍລິສັດ ກໍ່ສ້າງທາງລົດໄຟແຫ່ງປະເທດຈີນ ຈຳກັດ ແຈ້ງໃຫ້ຮູ້ວ່າ: ເສັ້ນທາງລົດໄຟ ລາວ-ຈີນ ມີຄວາມຍາວທັງໝົດ 421,72 ກິໂລແມັດ ໂຄງການກໍ່ສ້າງເສັ້ນທາງລົດໄຟລາວ-ຈີນ ຊ່ວງທີ 3 ປະກອບມີ ສະຖານີນະຄອນຫລວງວຽງຈັນ, ສະຖານີໂພນໂຮງ ແລະ ສູນຈັດສັນນະຄອນຫລວງວຽງຈັນ, ເຊິ່ງອອກແບບໂດຍ ກຸ່ມບໍລິສັດວິສາຫະກໍາລົດໄຟ ສປ ຈີນ ເລກທີ 2 ຈຳ ກັດ ແລະ ຮັບເໝົາກໍ່ສ້າງໂດຍ ກຸ່ມບໍລິສັດກໍ່ສ້າງທາງລົດໄຟ ສປ ຈີນ ຈຳກັດ. ເສັ້ນທາງລົດໄຟ ແຕ່ບໍ່ເຕັນ ຫາ ນະຄອນຫລວງວຽງຈັນ ປະກອບມີ ສະຖານີຂົນສົ່ງຜູ້ໂດຍສານ 10 ສະຖານີ ແລະ ສະ ຖານີຄ່ຽນຖ່າຍສິນຄ້າ 22 ສະຖານີ.

ສຳລັບກຸ່ມບໍລິສັດພວກເຮົາ ແມ່ນໄດ້ຮັບເໝົາກໍ່ສ້າງມີ 5 ສະຖານີໃຫຍ່ ເປັນຕົ້ນ ສະຖານີຫລວງພະບາງ, ກາສີ, ວັງວຽງ, ໂພນໂຮງ ແລະ ນະຄອນຫລວງວຽງຈັນ, ແຕ່ລະສະຖານີ ແມ່ນກຳລັງລົງມືກໍ່ສ້າງ. ສໍາລັບສະຖານີ ໂພນໂຮງ ແລະ ກາສີ ແມ່ນເຮັດໂຄງສ້າງຫລັງຄາສຳເລັດແລ້ວ.ທ່ານ ລີ ຊວງ ຫລາຍ ກ່າວຕື່ມວ່າ: ສະຖານີນະຄອນຫລວງວຽງຈັນ ເປັນສະຖານີທີ່ໃຫຍ່ທີ່ສຸດ, ສະຖານທີ່ຕັ້ງຢູ່ບ້ານໄຊ ເມືອງໄຊທານີ ນະຄອນຫລວງວຽງຈັນ, ໂດຍການອອກແບບມີ 4 ສະ ຖານີ 7 ສາຍ (ລວມທັງສາຍຫລັກ), ພື້ນທີ່ລວມທັງໝົດຂອງການກໍ່ສ້າງແມ່ນ 14.543 ຕາແມັດ, ຄວາມຍາວ 220 ແມັດ, ຄວາມກວ້າງ 90 ແມັດ, ຄວາມສູງ 25 ແມັດ ແລະ ພາຍໃນສະຖານີສາ ມາດຮອງຮັບຄົນໄດ້ 2.500 ຄົນ, ພື້ນຖານເປັນເສົາເຂັມເຈາະ ແລະ ໂຄງສ້າງຕົ້ນຕໍແມ່ນເບຕົງ, ດ້ານໜ້າອ້ອມດ້ວຍຕາຂ່າຍບູລອງ, ສ່ວນປະກອບຫລັງຄາຈາກໂລຫະອາລູມີນຽມແມກນີຊຽນ, ຫລັງຄາແມ່ນຫລັງຄາ ທີ່ເຮັດດ້ວຍເບຕົງບໍ່ມີເສົາ, ຮູບຮ່າງໂດຍລວມຂອງອາຄານສະຖານີ ແມ່ນມີຄວາມປະສົມປະ ສານກັນຢ່າງເປັນເອກະລັກ ຂອງສອງຊົນຊາດຊົນເຜົ່າ ລາວ-ຈີນ.

ສະຖານີດັ່ງກ່າວ, ໄດ້ເລີ່ມກໍ່ສ້າງມາແຕ່ເດືອນພຶດສະພາ 2020, ປັດຈຸບັນ ແມ່ນກໍາລັງປະກອບໂຄງສ້າງຂອງຫລັງຄາສຳເລັດແລ້ວປະ ມານ 90% ແລະ ຄາດວ່າຈະໃຫ້ສໍາເລັດໃນທ້າຍເດືອນ 12 ນີ້, ໂດຍໃຊ້ກໍາມະກອນ ທັງໝົດ 480 ຄົນ, ໃນນີ້ມີກໍາມະກອນຈີນ 20%. ປັດຈຸບັນ, ພວກເຮົາຍັງພົບຄວາມຫຍຸ້ງຍາກ ແລະ ສິ່ງທ້າທາຍ ໂດຍສະເພາະແມ່ນ ນັກວິຊາການ ແລະ ອຸປະກອນເຄື່ອງກໍ່ສ້າງທາງລົດໄຟຍັງຢູ່ຈີນ, ເຊິ່ງຍັງເຂົ້າມາ ລາວບໍ່ໄດ້ ເນື່ອງຈາກການແພລະບາດບາດຂອງພະຍາດໂຄວິດ-19.

Medialaos MMD (ແຫຼ່ງຂໍ້ມູນຈາກ: ສຳນັກຂ່າວສານປະເທດລາວ)