ກົມໂຄສະນາການທ່ອງທ່ຽວ, ກະຊວງຖະແຫລງຂ່າວ, ວັດທະນະທຳ ແລະ ທ່ອງທ່ຽວ ໄດ້ຖືສຳຄັນ ການລົງ ເກັບກຳ ຂໍ້ມູນການທ່ອງທ່ຽວ ເພື່ອໂຄສະນາຜ່ານເວບໄຊ, ສື່ອອນລາຍ ຂອງຕົນ ແລະ ໂຄສະນາ ຜ່ານຜະລິດຕະພັນ ຕ່າງໆ ຂອງສື່ມວນຊົນ, ເຊິ່ງໃນອາທິດຜ່ານມາ, ທ່ານ ບຸນລັບ ດວງພູມີ ຮອງຫົວໜ້າກົມໂຄສະນາ ການທ່ອງທ່ຽວ ກໍໄດ້ນຳພາ ຄະນະ ເຄື່ອນໄຫວເກັບກຳຂໍ້ມູນ ແລະ ສະພາບການທ່ອງທ່ຽວ ຢູ່ແຂວງຄຳມ່ວນ ພາຍຫລັງການລະບາດ ພະຍາດໂຄວິດ-19 ແລະ ສົງເສີມສະຖານທີ່ ທ່ອງທ່ຽວຢູ່ຂັ້ນທ້ອງ ຖິ່ນໃຫ້ກັບມາ ຄຶກຄື້ນເປັນປົກກະຕິ.

ທ່ານ ບຸນລັບ ດວງພູມີ ໄດ້ໃຫ້ສຳພາດຕໍ່ນັກຂ່າວ ສຳນັກຂ່າວສານປະເທດລາວວ່າ: ການລົງເຄື່ອນໄຫວ ວຽກງານຢູ່ ແຂວງຄຳມ່ວນ ໃນຄັ້ງນີ້, ກໍເພື່ອມາເກັບກໍາຂໍ້ມູນ ແລະ ຮູບພາບໃໝ່ໆ ກ່ຽວກັບແຫລ່ງທ່ອງທ່ຽວ ເພື່ອຈະນຳໄປໂຄສະນາ ຜ່ານເວບໄຊ ແລະ ສື່ອອນລາຍ ຂອງກົມໂຄສະນາ ການທ່ອງທ່ຽວ ແລະ ສຳນັກຂ່າວສານປະເທດລາວ, ພາຍຫລັງມີ ການລະບາດ ຂອງພະຍາດໂຄວິດ-19 ທີ່ໄດ້ສົງຜົນກະທົບ ຕໍ່ຂະແໜງການທ່ອງທ່ຽວຫລາຍດ້ານ ໂດຍສະເພາະ ພາກທຸລະກິດ ການທ່ອງທ່ຽວ ໄດ້ຢຸດກິດຈະກຳການທ່ອງທ່ຽວ ໄປໄລຍະໜຶ່ງ. ສະນັ້ນ, ມີຄວາມຈຳເປັນ ທີ່ຕ້ອງໄດ້ມີການໂຄສະນາ ບັນດາ ກິດຈະກຳການ ທ່ອງທ່ຽວ ໃຫ້ມີຄວາມຫລາກຫລາຍ ເພື່ອເຮັດແນວໃດໃຫ້ ຂະແໜງການທ່ອງທ່ຽວຂອງລາວ ກັບມາມີບັນຍາ ກາດຄຶກຄື້ນ ແລະ ດີຂຶ້ນກວ່າເກົ່າ. ປັດຈຸບັນ, ສປປ ລາວ ພວກເຮົາກຳລັງສົ່ງເສີມ ການທ່ອງທ່ຽວແບບ ລາວທ່ຽວລາວ ເພື່ອໃຫ້ຄົນລາວ ເຮົາທ່ອງທ່ຽວບັນດາ ແຫລ່ງທ່ອງທ່ຽວຂອງລາວ.

ທ່ານ ບຸນລັບ ດວງພູມີ ໄດ້ກ່າວອີກວ່າ: ແຂວງຄຳມ່ວນ ເປັນແຂວງໜຶ່ງທີ່ໜ້າທ່ອງທ່ຽວ, ມີພູຜາປ່າໄມ້, ມີຖໍ້າຫລາຍແຫ່ງ ແລະ ທິວທັດທຳມະຊາດທີ່ສວຍງາມ, ເຊິ່ງການລົງມາເທື່ອນີ້ ພວກເຮົາກໍເຫັນສິ່ງໃໝ່ໆຄື ມີສະຖານທີ່ທ່ອງທ່ຽວ ໃໝ່ເພີ່ມຂຶ້ນ ເປັນຕົ້ນ ຈຸດຊົມວິວ ພູຜາມ່ານ, ແຫລ່ງທ່ອງທ່ຽວຂຸມນໍ້າຄຳດິບ, ແຫລ່ງທ່ອງທ່ຽວຕາດຟ້າ, ພ້ອມນີ້ ບາງແຫລ່ງທ່ອງທ່ຽວ ທີ່ໄດ້ເປີດ ບໍລິການມາດົນແລ້ວ ກໍໄດ້ປ່ຽນວິກິດໂຄວິດ ເປັນໂອກາດປັບປຸງ ແລະ ພັດທະນາແຫລ່ງທ່ອງທ່ຽວ ເພື່ອດຶງດູດ ນັກທ່ອງທ່ຽວ ແລະ ຜ່ານການລົງຕິດຕາມຕົວຈິງ, ພວກເຮົາໄດ້ມີການແນະນໍາ ບັນດາຜູ້ປະກອບການ ແຫລ່ງທ່ອງທ່ຽວ ນອກຈາກພັດ ທະນາສະຖານທີ່ ທ່ອງທ່ຽວໃຫ້ມີ ຄວາມສວຍງາມແລ້ວ ໃຫ້ສ້າງບັນດາກິດຈະກຳ ການທ່ອງທ່ຽວ ໃຫ້ມີຄວາມ ຫລາກ ຫລາຍ ເພື່ອດຶງດູດນັກທ່ອງທ່ຽວ ເຂົ້າມາທ່ຽວຊົມຫລາຍຂຶ້ນ.

Medialaos MMD (ແຫຼ່ງຂໍ້ມູນຈາກ: ສຳນັກຂ່າວສານປະເທດ)