ປັດ­ຈຸ­ບັນ​ໃນ​ຂອບ​ເຂດ​ທົ່ວ​ປະ­ເທດ ພາກ­ສ່ວນ​ຕ່າງໆ​ທັງ​ອົງ­ການ​ຈັດ​ຕັ້ງ​ພັກ​-​ລັດ, ຫົວ ­ໜ່ວຍ​ທຸ­ລະ​ກິດ​ເອກະ​ຊົນ ແລະ ຕະ­ຫຼອດ​ຮອດປະ­ຊາ­ຊົນ​ລາວ​ບັນ­ດາ­ເຜົ່າ ທຸກ​ຊັ້ນ​ຄົນໄດ້​ຕັ້ງ ­ໜ້າ​ຈັດ​ຕັ້ງ​ປະ­ຕິ­ບັດ​ສ້າງ​ຜົນ­ງານ​ເພື່ອ​ຂຳ​່ນັບ​ຮັບ​ຕ້ອນ​ໃຫ້​ແກ່​ວັນ​ສຳ­ຄັນ​ຕ່າງໆ​ຂອງ​ຊາດ​ໂດຍ​ສະ­ເພາະ ກໍຄື​ວັນ​ສະ­ຖາ­ປະ­ນາ ສປປ ລາວ ຄົບ­ຮອບ 45 ປີ ທີ່​ຈະ​ມາ​ເຖິງ​ໃນ​ມໍ່ໆ​ນີ້​ໃຫ້​ມີ​ຄວາມ​ໝາຍ ແລະ ບັນ­ລຸ​ຜົນ­ສຳ­ເລັດ.

ສຳ­ລັບ​ຢູ່​ນະຄອນ­ຫຼວງ​ວຽງ​ຈັນ​ກໍ​ຢູ່​ໃນ​ບັນ­ຍາ­ກາດ​ທີ່​ເຕັມ​ໄປ​ດ້ວຍ​ຄວາມ​ຄຶ​ກ​ຄື້ນຂອງ​ທຸກ​ພາກ­ສ່ວນ​ທີ່​ກຳ­ລັງ​ເອົາໃຈ­ໃສ່​ຢ່າງ​ຕັ້ງ­ໜ້າ​ເປັນ​ຂະ­ບວນ​ຟົດ ­ຟື້ນ​ ແລະ ມີ​ຄວາມ​ໝາຍ ຊຶ່ງ​ນອກ­ຈາກ​ຈະ​ເອົາໃຈໃສ່​ເຂົ້າ​ໃນ​ການ​ຜະລິດ​ໃຫ້​ມີ​ຄວາມຫຼາກ​ຫຼາຍ, ກວ້າງຂວາງ​ເພື່ອ​ສ້າງ​ລາຍ​ຮັບ​ເພື່ອ​ປະ­ກອບ­ສ່ວນ​ເຂົ້າ​ໃນ​ການ​ສ້າງສາ ແລະ ພັດ­ທະນາ​ປະເທດ​ຊາດ​ໃຫ້​ມີ​ຄວາມ​ສີ­ວິ­ໄລ​ຂຶ້ນ​ຢ່າງ​ຕໍ່​ເນື່ອງ, ໃນ​ນັ້ນ​ກໍ​ໄດ້​ມີ​ການ​​ຈັດ​ກິດ­ຈະ­ກຳ​ຫຼາຍ​ຢ່າງ​​ເຊັ່ນ: ​ຂະບວນ​ການ​ແຂ່ງຂັນ​ກິລາ, ສິລະ​ປະ, ກິດຈະ­ກຳ​ຖາມ​​ຕອບ​ວິ­ທະ­ຍາ­ສາດ ແລະ ອື່ນໆ ​ເປັນ​ເຈົ້າ​ການ​ປະ­ດັບ​ປະດາ​ຕາມ​ສຳນັກ­ງານ​ອົງ­ການ​ໃນ​ຕົວ​ເມືອງ​ຕ່າງໆ ແລະ ຕາມ​ເສັ້ນ­ທາງ ກໍ​ໄດ້​ນຳ​ເອົາທຸງ­ຊາດ, ທຸງ​ພັກ, ທຸງ​ທິວ ແລະ ປ້າຍ​ຄຳ​ຂວັນ​ມາ​ຕິດ​ຕັ້ງ​ໃຫ້​ມີ​ຄວາມ​ສວຍ​ງາມ ແລະ ມີ​ຄວາມ​ໝາຍ, ທັງ​ໝົດ​ນີ້​ແມ່ນ​ຄວາມ​ເປັນ​ເຈົ້າ​ການ, ຄວາມ​ຕື່ນ​ຕົວ​ສູງ​ຂອງ​ທຸກ​ພາກ­ສ່ວນ​ທີ່​ໄດ້​ເອົາ­ໃຈ­ໃສ່ໃນ​ການ­ຈັດ­ຕັ້ງ​ປະ­ຕິ­ບັດ​ໜ້າ​ທີ່​ດ້້ວຍ​ຄວາມ​ຮັບຜິດ​ຊອບ​ສູງ ໂດຍ​ສະ­ເພາະ​ພາຍ​ໃຕ້​​ການ​ຊີ້​ນຳ ແລະ ນຳ­ພາ​ຂອງ​ຄະ­ນະ​ພັກ​ຄະນະ​ບັນ­ຊາ​ຂອງ​ອົງ​ການຈັດ​ຕັ້ງ​ຕ່າງໆ​ເຮັດ​ໃຫ້ທຸກ​ຂະ­ບວນ​ການ​ມີ​ບັນ­ຍາ­ກາດ ແລະ ມີ​ຄວາມ​ໝາຍ​ຕໍ່​ຊາດ​ຢ່າງ​ແທ້​ຈິງ.

ງານ​ສະ­ເຫຼີມ­ສະຫຼອງ ວັນ​ສະ­ຖາປະ­ນາ ສປປ ລາວ ຄົບຮອບ 45 ປີ ອີກ​ບໍ່​ພໍ​ເທົ່າ​ໃດ​ວັນ​ກໍ​ຈະ​ຮອດ​ມື້​ສະເຫຼີມສະຫຼອງ​ເພື່ອ​ເຮັດ​ໃຫ້​ງານ​ດັ່ງກ່າວ​ລຸ​ລ່ວງ​ໄປ​ດ້ວຍ​ຜົນສຳ­ເລັດ, ສະ­ນັ້ນ​ທຸກ​ຄົນ​ໃນ​ສັງຄົມ​ຕ້ອງ​ຮ່ວມ​ແຮງ​ຮ່ວມ​ໃຈ​ກັນ ແລະ ມີ​ຄວາມ​ສາ­ມັກ­ຄີ​ເປັນ​ປຶກ​ແຜ່ນ​ໃນ​ການ​ເປັນ​ເຈົ້າ​ການ​ ໂດຍ​ສະ­ເພາະ​ໃຫ້​ເປັນ​ຫູ​ເປັນຕາ​ຊ່ວຍ​ທາງ​ເຈົ້າ​ໜ້າ­ທີ່​ໃນ​ການ​ສັງ­ເກດ​ກຸ່ມ​ຄົນ​ທີ່​ບໍ່​ຫວັງ​ດີ​ຈະ​ມາ​ສ້າງ​ປະ­ກົດ​ການ​ຫຍໍ້­ທໍ້​ບໍ່​ດີ​ໃນ​ສັງ­ຄົມ​ເຮັດ​ໃຫ້​ບ້ານ, ເມືອງ​ບໍ່​ມີ​ຄວາມ​ສະ­ຫງົບ, ບໍ່​ມີ​ຄວາມ​ປອດ​ໄພ, ສັງ­ຄົມ​ວຸ້ນ­ວາຍ​ກໍ່­ໃຫ້­ເກີດ​ມີ​ຄວາມ​ຫຍຸ້ງ­ຍາກ ແລະ ມີ​ຄວາມ​ສັບ­ສົນ​ຕ່າງໆ, ຖ້າ​ຫາກ​ພົບ​ເຫັນ​ບັນ­ຫາ​ໃດ​ທີ່​ບໍ່ສອດຄ່ອງ​ກັບ​ລະ­ບຽບ, ກົດໝາຍ​ບ້ານ​ເມືອງ​ແມ່ນ​ຕ້ອງ​ໃຫ້​ແຈ້ງ​ຕໍ່​ທາງ​ເຈົ້າ​ໜ້າ­ທີ່ ເພື່ອ​ຈະ​ໄດ້​ລົງ​ໄປ​ຕິດ­ຕາມ​ກວດ­ກາ​ໃຫ້​ມັນ​ຖືກຕ້ອງ ແລະ​ ສອດ­ຄ່ອງ​ຫຼີກ​ລ່ຽງ​ເພື່ອ​ບໍ່​ໃຫ້​ມີ​ປະ­ກົດ​ການ​ບໍ່​ດີ​ເກີດ​ຂຶ້ນ, ເຊື່ອ​ແນ່​ວ່າ​ທຸກ​ຄົນ​ຫາກ​ພ້ອມ​ໃຈ​ກັນ​ມີ​ສະ­ຕິ​ຊ່ວຍ​ກັນ​ພ້ອມ­ພຽງ​ກັນ​ເຮັດ​ໜ້າ­ທີ່​ດ້ວຍ​ຄວາມ​ຮັບ­ຜິດ­ຊອບ​ສູງມີ​ການ​ປະ­ສານ​ງານ​ຢ່າງ​ກົມ­ກຽວ ແລະ ທັນ​ການ​ຈະ​ເຮັດ​ໃຫ້​ບັນຫາ​ທີ່​ເກີດ​ຂຶ້ນ​ສາ­ມາດ​ແກ້​ໄຂ​ໄດ້​ຢ່າງ​ທັນ​ການ ຊຶ່ງ​ຈະ​ເຮັດ​ໃຫ້​ງານ​ສະ­ເຫຼີມ­ສະ­ຫຼອງ ສປປ ລາວ ຄົບ­ຮອບ 45 ປີ ມີ​ຄວາມ​ສະຫງົບ​ປອດ​ໄພ​ບໍ່​ມີ​ບັນ­ຫາ​ບໍ່​ດີ​ເກີດ​ຂຶ້ນ​ຢ່າງ​ແນ່ນອນ.

​ງານ ສະເຫຼີ​ມ​ສະຫຼອງການ​ສະຖາ ປະນາ​ປະເທດ​ຊາດ 45 ປີ ແມ່ນການຢັ້ງ​ຢືນ​ເຖິງ​ຜົນ​ງານ​ການເຕີບ​ໃຫຍ່​ຂະ­ຫຍາຍຕົວ ຂອງ ສປປ ລາວ ໂດຍ​ພາຍ​ໃຕ້​ການ ​ຊີ້​ນຳ​-​ນຳ­ພາ ຂອງ​ພັກ​ປະ­ຊາ­ຊົນ ປະ­ຕິ­ວັດ​ລາວ ທີ່​ມີ​ຄວາມ​ປີ​ຊາ​ສາ­ມາດ ແລະ ສະ­ຫຼາດ​ສ່ອງ​ໃສ​ເຮັດ​ໃຫ້​ປະເທດ​ຊາດ​ໄດ້​ມີ​ຄວາມ​ສະ­ຫງົບ​ປອດ​ໄພ, ປະຊາ­ຊົນ​ມີ​ຄວາມ​ຢູ່​ເຢັນ​ເປັນ​ສຸກ ​ພ້ອມ​ກັນ​ທຳ​ມາ​ຫາ​ກິນ​ຢ່າງ​ສະ­ດວກ​ສະບາຍ ແລະ ປະກອບສ່ວນ​ເຂົ້າ​ໃນ​ການ​ສ້າງ­ສາ ແລະ ພັດທະນາ​ປະເທດ​ຊາດ​ໃຫ້​ມີ​ຄວາມ​ຈະ­ເລີນ​ຮຸ່ງ​ເຮືອງ ແລະ ມີ​ຄວາມ​ສີວິ­ໄລ​ຮອດ​ທຸກ​ມື້­ນີ້ ແລະ ພາຍ​ໃຕ້​ການ​ຊີ້​ນຳ​-​ນຳ­ພາ​ຂອງ​ພັກຕະຫຼອດ​ມາ​ປະ­ຊາ­ຊົນ​ໄດ້​ມີ​ຄວາມ​ຮັບ​ຮູ້ ແລະ ເຂົ້າ­ໃຈ​ດີ​ຕໍ່​ແນວ­ທາງ​ນະ­ໂຍ­ບາຍ​ຂອງ​ພັກ ໂດຍ​ໄດ້​ນຳ​ເອົາ​ແນວທາງ​ດັ່ງ­ກ່າວ​ໄປ​ຈັດ​ຕັ້ງ​ປະ­ຕິ­ບັດ​ໃນ​ການ​ດຳ­ລົງ​ຊີ­ວິດ​ເຮັດ​ໃຫ້​ໄດ້​ຮັບ​ຜົນ­ສຳ­ເລັດ​ເປັນ​ຢ່າງ​ດີ.

ສັງ​ລວມ ແລ້ວ ສປປ ລາວ ຕະຫຼອດ 45 ປີ­ຜ່ານ­ມາ​ພາຍ​ໃຕ້​ຮົ່ມ​ຄັັນ​ທຸງ​ຂອງ​ພັກ​ປະ­ຊາ­ຊົນ ປະ­ຕິວັດ​ລາວ ເຮັດ​ໃຫ້​ປະ­ເທດ​ຊາດ​ຮຸ່ງ­ເຮືອງ​ເຫຼືອງ​ເຫຼືອ ແລະ ມີ​ຄວາມ​ພັດ­ທະ­ນາ​ກ້າວ​ຂຶ້ນ​ຢ່າງ​ມີ​ໄຊ.

Medialaos MMD (ແຫຼ່ງຂໍ້ມູນຈາກ: ໜັງສືພິມ ປະຊາຊົນ)