ກອງປະຊຸມໃຫຍ່ຜູ້ແທນອົງຄະນະພັກ ແຂວງສາລະວັນ ຄັ້ງທີ IX ໄດ້ສຳເລັດລົງໃນວັນທີ 24 ພະຈິກ 2020 ນີ້, ພາຍໃຕ້ການເປັນປະທານຂອງ ສະຫາຍ ໂພໄຊ ໄຊຍະສອນ ກໍາມະການສຳຮອງສູນກາງພັກ, ເລຂາຄະນະບໍລິຫານງານພັກແຂວງ ຮັກສາການເຈົ້າແຂວງສາລະວັນ, ເປັນກຽດເຂົ້າຮ່ວມໂດຍ ສະຫາຍ ຄໍາພັນ ພົມມະທັດ ກໍາມະການກົມການເມືອງສູນກາງພັກ, ຄະນະເລຂາທິ ການສູນກາງພັກ, ຫົວໜ້າຄະນະໂຄສະນາອົບຮົມສູນກາງພັກ ,ມີສະຫາຍ ຮອງເລຂາຄະນະບໍລິຫານງານພັກແຂວງ, ພະນັກງານອາວຸໂສບຳນານ, ຜູ້ແທນສົມບູນ ແລະ ແຂກຖືກເຊີນເຂົ້າຮ່ວມ.

ກອງປະຊຸມ ໄດ້ເປັນເອກະສັນ ເລືອກເອົາສະຫາຍສະຫາຍ ໂພໄຊ ໄຊຍະສອນ ເປັນເລຂາຄະນະບໍລິຫານງານພັກແຂວງ, ເລືອກເອົາສະຫາຍ ສີເຮັງ ຫອມສົມບັດ ແລະ ສະຫາຍ ນາງ ບຸນທະວີ ດວງລາສີ ເປັນຮອງເລຂາຄະນະບໍລິຫານງານພັກ, ເລືອກເອົາ ສະຫາຍ ວິຊຽນ ນະວິກຸນ ເປັນປະທານກວດກາ, ສະຫາຍ ເລີດສະໝີ ຈັນສີຍະວົງ, ສະຫາຍແສງທອງ ສີອ່ອນສາ, ສະຫາຍ ນາງແສງອາລຸນ ຈັນທະລາດ ເປັນຮອງປະທານກວດກາ. ພ້ອມທັງເລືອກເອົາຜູ້ແທນສົມບູນ ໄປຮ່ວມກອງປະຊຸມໃຫຍ່ຜູ້ແທນ ທົ່ວປະເທດ ຄັ້ງທີ XI ຂອງພັກ.

ໃນໂອກາດນີ້, ສະຫາຍ ຄໍາພັນ ພົມມະທັດ ກໍໄດ້ໃຫ້ກຽດໂອ້ລົມກອງປະຊຸມກ່ອນອື່ນສະຫາຍໄດ້ສະແດງຄວາມຍ້ອງຍໍຊົມເຊີຍ ຕໍ່ໝາກຜົນໃນຕະຫລອດໄລຍະ 5 ປີຜ່ານມາ; ພ້ອມທັງ ໄດ້ເນັ້ນໜັກໃຫ້ຄະພັກຊຸດໃໝ່ ເອົາໃຈໃສ່ຊອກຫາທ່າແຮງບົ່ມຊ້ອນຂອງແຂວງ ທີ່ມີລັກສະນະວິທະຍາສາດ ໃຫ້ເປັນການພັດທະນາຢ່າງແທ້ຈິງ, ເລີ່ມແຕ່ຫົວທີຫັນເປັນອຸດສາຫະກໍາທັນສະໄໝ, ກະສິກໍາກໍຕ້ອງຍົກລະດັບປັບປຸງສິນຄ້າ ແລະ ປັບປຸງຊີວິດການເປັນຢູ່ຂອງປະຊາຊົນໃຫ້ຢູ່ດີກິນດີ ; ຕ້ອງເອົາໃຈໃສ່ປັບປຸງວຽກງານບໍລິຫານພັກ-ລັດໄປພ້ອມໆກັນ ເປັນແບບຢ່າງນໍາໜ້າໃນການເຄື່ອນໄຫວນໍາພາເຂົ້າສູ່ລະບຽບວິໄນ, ຕ້ານພະຍາດອາດຍາສິດ, ບໍລິການປະຊາຊົນດ້ວຍຄວາມເຕັມໃຈເອົາປະຊາຊົນເປັນກົກ ແລະ ຖືປະຊາຊົນເປັນເປົ້າໝາຍ, ສ້າງໃຫ້ປະຊາຊົນຮູ້ຈັກຄຸນປະໂຫຍດຂອງດິນ ແລະ ສ້າງໃຫ້ປະຊາຊົນເຂົ້າເຖິງຕະຫລາດ, ເອົາໃຈໃສ່ບໍາລຸງເລຂາພັກບ້ານໃຫ້ເຂັ້ມແຂງເພື່ອໃຫ້ຮູ້ຈັກນໍາພາປະຊາຊົນເອົາໃຈໃສ່ຕໍ່ການຜະລິດ; ພັດທະນາແລວທາງເສດຖະກິດໃຫ້ມີຄວາມເຂັ້ມແຂງ; ເອົາໃຈໃສ່ດ້ານວັດທະນະທໍາ-ສັງຄົມ ພັດທະນາຄົນລຶບລ້າງຄວາມທຸກຍາກ, ສ້າງຄວາມໜັກແໜ້ນຫລຸດພົ້ນອອກຈາກສະຖານະຄວາມດ້ອຍພັດທະນາ; ເອົາໃຈໃສ່ວຽກງານປ້ອງກັນຊາດ ປ້ອງກັນຄວາມສະຫງົບ, ເອົາໃຈໃສ່ບໍລິຫານລັດສັບຊ້ອນພະນັກງານໃຫ້ຖືກຕ້ອງຕາມວຽກງານຕົວຈິງ.

ກອງປະຊຸມໃຫຍ່ຄັ້ງທີ IX ຂອງອົງຄະນະພັກແຂວງສາລະວັນ ສຳເລັດລົງດ້ວຍຜົນສຳເລັດອັນຈົບງາມຕາມຈຸດປະສົງຄາດໝາຍທີ່ວາງໄວ້; ທັງໝົດນັ້ນ ແມ່ນໝາກຜົນແຫ່ງຄວາມພະຍາຍາມບຸກບຶນຜ່ານຜ່າເຮັດວຽກງານຢ່າງບໍ່ຮູ້ອິດ, ຮູ້ເມື່ອຍຂອງອົງຄະນະພັກ, ພະນັກງານສະມາຊິກພັກ ແລະ ປະຊາຊົນບັນດາ ເຜົ່າແຂວງສາລະວັນ ໃນຂະບວນການວິວັດແຫ່ງການ ຈັດຕັ້ງປະຕິບັດມະຕິກອງປະຊຸມໃຫຍ່ຄັ້ງທີ VIII ຂອງອົງຄະນະພັກແຂວງ ແລະ ຍັງແມ່ນໝາກຜົນຂອງການປະຕິບັດວຽກງານຢ່າງຕັ້ງໜ້າ, ຫ້າວຫັນ ຕະຫລອດໄລຍະແຫ່ງການກະກຽມ ແລະ ດໍາເນີນກອງປະຊຸມໃຫຍ່ໃນໄລຍະທີ່ຜ່ານມາ.

ກອງປະຊຸມໃຫຍ່ໄດ້ຮັບຮອງເອົາລາຍງານການເມືອງ ແລະ ແຜນພັດ ທະນາເສດຖະກິດ-ສັງຄົມ 5 ປີ ຄັ້ງທີ IX ຊຶ່ງໄດ້ຕີລາຄາສູງຕໍ່ຜົນສໍາເລັດໃນການຈັດຕັ້ງປະຕິບັດມະຕິກອງປະຊຸມໃຫຍ່ຄັ້ງທີ VIII ແລະ ແນວທາງປ່ຽນແປງໃໝ່ຂອງພັກໃນຊຸມປີຜ່ານມາ, ຊີ້ໃຫ້ເຫັນຜົນສໍາເລັດດ້ານຕັ້ງໜ້າທີ່ພົ້ນເດັ່ນ ເປັນຕົ້ນ: ຂະບວນການກໍ່ສ້າງຮາກຖານການເມືອງ, ວຽກ ງານປ້ອງກັນຊາດ-ປ້ອງກັນຄວາມສະຫງົບ, ແຜນພັດທະ ນາເສດຖະກິດ-ສັງຄົມ ແລະ ແກ້ໄຂຄວາມທຸກຍາກ ທີ່ໄດ້ຈ້ແຍກຢ່າງເລີກເຊີ່ງ ບັນດາຈຸດອ່ອນ-ຂໍ້ຄົງຄ້າງ, ສາຍເຫດ ແລະ ບົດຮຽນຈຳນວນໜຶ່ງທີ່ຖອດຖອນໄດ້ຈາກພຶດຕິກຳແຫ່ງການຊີ້ໆນຳພາ ແລະ ການປະຕິບັດແນວທາງ, ແຜນນະໂຍບາຍຂອງພັກ ທີ່ກອງປະຊຸມໃຫຍ່ຄັ້ງທີ X ຂອງພັກໄດ້ກຳນົດ.

ພ້ອມກັນນັ້ນກໍ່ໄດ້ຄົ້ນຄວ້າຮັບຮອງເອົາທິດທາງໜ້າທີ່ຕົ້ນຕໍໃນຊຸມປີຕໍ່ໜ້າ ຊຶ່ງມີລັກສະນະບຸກທະລຸໃນຫລາຍດ້ານ ໂດຍສອດຄ່ອງກັບທ່າແຮງບົ່ມຊ້ອນ, ຄວາມອາດສາມາດຕົວຈິງຂອງທ້ອງຖິ່ນ ຊຶ່ງເປັນພຶ້ນຖານໃຫ້ແກ່ການສືບຕໍ່ພັດທະນາແຂວງສາລະວັນ ໃຫ້ກ້າວຂຶ້ນຕາມທິດຫັນເປັນທັນສະໄໝເທື່ອລະກ້າວ ເພື່ອນໍາປະຊາຊົນໄປສູ່ຄວາມຈະເລີນຮັ່ງມີພາສຸກ, ປະເທດຊາດມັ່ງຄັ່ງເຂັ້ມແຂງ, ສັງຄົມສາມັກຄີປ່ອງດອງ, ປະຊາທິປະໄຕ, ຍຸຕິທໍາ ແລະ ສີວິໄລ.

Medialaos MMD (ແຫຼ່ງຂໍ້ມູນຈາກ: ສຳນັກຂ່າວສານປະເທດລາວ)