ໃນວັນທີ 25 ພະຈິກ 2020, ທ່ານ ສອນໄຊ ສີພັນດອນ ຮອງນາຍົກລັດຖະມົນຕີ, ລັດຖະມົນຕີ ກະຊວງແຜນການ ແລະ ການລົງທຶນ ພ້ອມດ້ວຍຄະນະ ລົງເຄື່ອນໄຫວເຮັດວຽກຢູ່ແຂວງໄຊສົມບູນ ເພື່ອຊຸກຍູ້, ກວດກາ ແລະ ຕິດຕາມການຈັດຕັ້ງປະຕິບັດແຜນພັດທະນາເສດຖະກິດ-ສັງຄົມຂອງແຂວງ ໃນປີ 2020 ແລະ ໃຫ້ທິດຊີ້ນຳ ໃນການວາງທິດທາງຈຸດສຸມສຳລັບ ປີ 2021 ແນ່ໃສ່ເຮັດໃຫ້ເສດຖະກິດມີການຂະຫຍາຍຕົວຢ່າງຕໍ່ເນື່ອງ.ການລົງເຄື່ອນໄຫວເຮັດວຽກໃນຄັ້ງນີ້, ຈະເປັນການກະຕຸກຊຸກຍູ້ໃຫ້ການນຳພັກ-ລັດ, ພະນັກງານ-ລັດຖະກອນ ຕະຫລອດຮອດພໍ່ແມ່ປະຊາຊົນ ແຂວງໄຊສົມບູນ ສືບຕໍ່ປະກອບສ່ວນອັນສຳຄັນເຂົ້າໃນຂະບວນການປົກປັກຮັກສາ ແລະ ສ້າງສາພັດທະນາປະເທດຊາດ ກໍຄື ຂອງໄຊສົມບູນໃຫ້ສຳເລັດ ແລະ ບັນລຸຄາດໝາຍທີ່ວາງໄວ້.

ພ້ອມນັ້ນ, ກໍຈະເປັນເຂັມຊີ້ທິດເຍືອງທາງໃຫ້ແກ່ການພັດທະນາເສດຖະກິດ-ສັງຄົມຂອງແຂວງໃນຕໍ່ໜ້າ ໃນການເສີມຂະຫຍາຍຈຸດດີ, ແກ້ໄຂບັນດາຂໍ້ຄົງຄ້າງ ແລະ ເອົາຊະນະສິ່ງທ້າທາຍ, ຄວາມຫຍຸ້ງຍາກຕ່າງໆ ເພື່ອຮັບປະກັນເຮັດໃຫ້ການພັດທະນາ ມີການຂະຫຍາຍຕົວໃນຈັງຫວະທີ່ດີ.ໂອກາດນີ້, ທ່ານຮອງນາຍົກລັດຖະມົນຕີ ກໍໄດ້ສະແດງຄວາມຊົມເຊີຍແຂວງໄຊສົມບູນ ທີ່ເຫັນວ່າພື້ນຖານໂຄງລ່າງໄດ້ມີການພັດທະນາຢ່າງຕໍ່ເນື່ອງ ແລະ ວິຖີການດຳລົງຊີວິດຂອງປະຊາຊົນຄ່ອຍໆໄດ້ຮັບການປັບປຸງດີຂຶ້ນເທື່ອລະກ້າວ, ພ້ອມທັງເນັ້ນໃຫ້ການນໍາພັກ-ລັດ ສືບຕໍ່ຊຸກຍູ້ການຈັດຕັ້ງປະຕິບັດແຜນພັດທະນາເສດຖະກິດ-ສັງຄົມໃນຕໍ່ໜ້າ ໃຫ້ບັນລຸຕາມຄາດໝາຍ ແນໃສ່ເຮັດໃຫ້ເສດຖະກິດຂະຫຍາຍຕົວຢ່າງຕໍ່ເນື່ອງ ແລະ ເຮັດໃຫ້ປະຊາຊົນນັບມື້ນັບຫລຸດພົ້ນອອກ ຈາກສະຖານະພາບທຸກຍາກເທື່ອລະກ້າວ.ຂະນະດຽວກັນ, ກໍໃຫ້ສືບຕໍ່ເອົາໃຈໃສ່ຮັກສາສະຖຽນລະພາບທາງດ້ານການເມືອງ, ສັງຄົມມີຄວາມສະຫງົບປອດໄພ ແລະ ມີຄວາມເປັນລະບຽບຮຽບຮ້ອຍຢ່າງໜັກແໜ້ນ, ເຂັ້ມງວດການຄຸ້ມຄອງລັດ-ສັງຄົມ ໃຫ້ໄປຕາມກົດໝາຍ ແລະ ລະບຽບການ, ໄປຄຽງຄູ່ກັບການສືບຕໍ່ປັບປຸງໂຄງສ້າງທາງດ້ານເສດຖະກິດ ໃຫ້ມີການເຕີບໂຕທີ່ສົມດຸນ ແລະ ລະດົມທຸກກຳລັງແຮງ ເຂົ້າໃນການພັດທະນາ ແລະ ແກ້ໄຂບັນຫາຄວາມຫຍຸ້ງຍາກທາງດ້ານເສດຖະກິດ ໃຫ້ເຂົ້າສູ່ລວງເລິກ ແລະ ຮອບດ້ານກວ່າເກົ່າ.

ພ້ອມກັນນັ້ນ, ກໍໃຫ້ເອົາໃຈໃສ່ຊຸກຍູ້ການຜະລິດເປັນສິນຄ້າ ໂດຍການສົ່ງເສີມການລົງທຶນພັດທະນາເຂດການຜະລິດ, ການບໍລິການ ແລະ ໂຄງລ່າງພື້ນຖານທີ່ຈຳເປັນ ເພື່ອສ້າງເງື່ອນໄຂສະດວກ ໃຫ້ແກ່ການຜະລິດສິນຄ້າຢູ່ລຽບຕາມເສັ້ນທາງລົດໄຟ ແລະ ທາງດ່ວນ, ລວມທັງສົ່ງເສີມການລົງທຶນພາຍໃນ ແລະ ຕ່າງປະເທດ ເຂົ້າໃນການຜະລິດ ແລະ ປຸງແຕ່ງກະສິກຳເປັນສິນຄ້າ ໃຫ້ແຂງແຮງກວ່າເກົ່າ, ຊຸກຍູ້ສົ່ງເສີມທາງດ້ານເຕັກນິກ ແລະ ວິຊາການໃນການປູກ, ການລ້ຽງ ແລະ ການຕະຫລາດ ຄຽງຄູ່ກັນກັບການສະໜອງແຫລ່ງທຶນດອກເບ້ຍຕໍ່າ ພ້ອມທັງສະໜັບສະໜູນ ໃຫ້ມີການຮວມກຸ່ມການຜະລິດໃຫ້ຫລາຍຂຶ້ນ.

ນອກຈາກນັ້ນ, ໃຫ້ສືບຕໍ່ຍູ້ແຮງມາດຕະການຍຸດທະສາດ ລົງກໍ່ສ້າງຮາກຖານການເມືອງ, ພັດທະນາຊົນນະບົດ, ລົບລ້າງຄວາມທຸກຍາກຂອງປະຊາຊົນເຂດຊົນນະບົດ, ພູດອຍ ໃຫ້ເປັນເຈົ້າການໃນການທຳການຜະລິດໃຫ້ມີກິນ, ມີໃຊ້ ກຸ້ມຕົນເອງ ເພິ່ງຕົນເອງ, ຕີຖອຍແນວຄິດຄອງຄອຍລໍຖ້າແຕ່ການຊ່ວຍເຫລືອ.ທ່ານ ຄຳລຽງ ອຸທະໄກສອນ ເຈົ້າແຂວງໄຊສົມບູນ ກ່າວວ່າ: ແຂວງໄຊສົມບູນ ໄດ້ເອົາໃຈໃສ່ໃນການຊີ້ນໍາ-ນໍາພາ ຈັດຕັ້ງປະຕິບັດແຜນພັດທະນາເສດຖະກິດ-ສັງຄົມ ເຮັດໃຫ້ເສດຖະກິດຍັງສືບຕໍ່ມີການຂະຫຍາຍຕົວຢ່າງຕໍ່ເນື່ອງ, ເຊິ່ງຄາດຄະເນໝົດ ປີ 2020 ອັດຕາການເຕີບໂຕຂອງເສດຖະກິດ ຈະຢູ່ໃນລະດັບ 5%, ລວມຍອດຜະລິດຕະພັນພາຍໃນຈະບັນລຸ 1.097,63 ຕື້ກີບ ແລະ ລາຍຮັບສະເລ່ຍຕໍ່ຫົວຄົນຈະບັນລຸໄດ້ 11,3 ລ້ານກີບ/ຄົນ/ປີ ຫລື ເທົ່າກັບ 1.264 ໂດລາສະຫະລັດ. ການເກັບລາຍຮັບ ປະຕິບັດໄດ້ 175,72 ຕື້ກີບ ເທົ່າກັບ 61,86% ຂອງແຜນດັດແກ້ປີ 2020 ທຽບໃສ່ໄລຍະດຽວກັນເພີ່ມຂຶ້ນ 3,9%, ສ່ວນດ້ານລາຍຈ່າຍ ປະຕິບັດໄດ້ 170,1 ຕື້ກີບ, ເທົ່າກັບ 40,5% ຂອງແຜນດັດແກ້ ທຽບ ໃສ່ໄລຍະດຽວກັນຫລຸດລົງ 7,81%.

ສຳລັບທິດທາງວຽກງານຈຸດສຸມ ປີ 2021, ແຂວງໄຊສົມບູນ ຈະສູ້ຊົນເຮັດໃຫ້ອັດຕາການຂະ ຫຍາຍຕົວຂອງເສດຖະກິດໃນລະດັບບໍ່ໃຫ້ຫລຸດ 7%, ເຮັດໃຫ້ລວມຍອດຜະລິດຕະພັນພາຍໃນບັນລຸໄດ້ 1.114,25 ຕື້ກີບ, ໃນນັ້ນຂະແໜງກະສິກຳ ໃຫ້ຂະຫຍາຍຕົວ 7% ກວມເອົາ 55,9%, ຂະແໜງອຸດສະຫະກຳ ຂະຫຍາຍຕົວ 5,3% ກວມເອົາ 17,6% ແລະ ຂະແໜງບໍລິການ ຂະຫຍາຍຕົວ 7% ກວມເອົາ 26,5% ຂອງ GDP.ໂອກາດນີ້, ທ່ານຮອງນາຍົກລັດຖະມົນຕີ ກໍໄດ້ມອບເງິນຈຳນວນ 100 ລ້ານກີບ ໃຫ້ແຂວງໄຊສົມບູນ ເພື່ອເປັນທຶນປະກອບສ່ວນຊຸກຍູ້ ຂະບວນການພັດທະນາເສດຖະກິດ-ສັງຄົມ ທີ່ຈໍາເປັນຢູ່ພາຍໃນແຂວງ ໃຫ້ມີການຂະຫຍາຍຕົວຢ່າງຕໍ່ເນື່ອງ.

Medialaos MMD (ແຫຼ່ງຂໍ້ມູນຈາກ: ສຳນັກຂ່າວສານປະເທດລາວ)