ທ່ານ ບຸນປອນ ອາສາພິພັກ ເຈົ້າເມືອງໆຄົງເຊໂດນ ໃຫ້ສຳພາດວ່າ: ປະຊາຊົນທີ່ໄດ້ຮັບຜົນ ກະທົບ ຈາກໄພນ້ຳຖ້ວມໃນຄັ້ງນີ້, ມີທັງໝົດ 40 ພັນກວ່າຄົນ, ຍິງ 20 ພັນກວ່າຄົນ, ໃນ 71 ບ້ານ, 10.147 ​ຄອບຄົວ, ປັດຈຸບັນ ໄດ້ຖືກຍົກຍ້າຍອອກມາຢູ່ບ່ອນທີ່ປອດໄພແລ້ວ ແລະ ໄດ້ ຮັບການຊ່ວຍເຫລືອ, ເບິ່ງແຍງເປັນຢ່າງດີຈາກສັງຄົມ ກໍຄືພາກສ່ວນທີ່ກ່ຽວຂ້ອງຢ່າງໃກ້ ຊິດ.

ພາຍຫລັງທີ່ປະຊາຊົນໄດ້ຮັບຜົນກະທົບຈາກໄພພິບັດ ດັ່ງກ່າວ, ນັບແຕ່ວັນທີ 2 ກັນຍາ ເປັນຕົ້ນມາ ອຳນາດການປົກຄອງບ້ານ, ເມືອງ ກໍໄດ້ປະສານສົມທົບກັບ ອຳນາດການປົກ ຄອງແຂວງ ແລະ ພາກສ່ວນຕ່າງໆ ທັງພາກລັດ ແລະ ເອກະຊົນ ເຂົ້າມາຊ່ວຍເຫລືອບັນ ເທົາທຸກສຸກເສີນ ໃນເບື້ອງຕົນ. ພ້ອມທັງ ປຸກລະດົມໃຫ້ທົ່ວສັງຄົມ ກໍຄືປະຊາຊົນລາວບັນ ດາເຜົ່າໃນຂອບເຂດທົ່ວປະເທດໄດ້ເຂົ້າມາຊ່ວຍເຫລືອໃນຄັ້ງນີ້, ບວກໃສ່ຄວາມເປັນເຈົ້າ ການຂອງປະຊາຊົນທັງພາຍໃນເມືອງ, ຕ່າງເມືອງ ແລະ ຕ່າງແຂວງ ທີ່ໄດ້ປະກອບສ່ວນເຮື່ອ ແຮງ ສະຕິປັນຍາ, ບຸກຄະລະກອນ, ພາຫະນະ ແລະ ວັດຖຸສິ່ງຂອງຕ່າງໆ ເຊັ່ນ: ລົດ, ເຮືອ ແລະ ອຸປະກອນຈາກກອງບັນຊາການທະຫານແຂວງ, ປກສ ແຂວງ, ພະແນກແຮງງານ ແຂວງ, ກອງພົນທີ 5, ກອງພົນທີ 4, ເມືອງລະຄອນເພັງ, ໜ່ວຍງານກູ້ໄພຈາກລະຄອນ ຫລວງວຽງຈັນ, ແຂວງສະຫວັນນະເຂດ ແລະ ພາກສ່ວນອື່ນໆ ເຮັດໃຫ້ປະຊາຊົນຜູ້ໄດ້ຮັບ ຜົນກະທົບມີຄວາມພໍໃຈ.

ປັດຈຸບັນປະຊາຊົນທີ່ໄດ້ຮັບຜົນກະທົບຈາກໄພນ້ຳຖ້ວມ ຢູ່ເມືອງຄົງເຊໂດນ ແລະ ເມືອງວາ ປີ ແຂວງສາລະວັນ ພວມໄດ້ຮັບການຊ່ວຍເຫລືອຢ່າງຕໍ່ເນື່ອງ ຈາກອຳນາດການປົກຄອງ ແຂວງ, ເມືອງ, ບໍລິສັດ-ຫ້າງຮ້ານຕ່າງໆ ທັງພາກລັດ ແລະ ເອກະຊົນ ໃນຂອບເຂດທົ່ວປະ ເທດເປັນຈຳນວນຫລວງຫລາຍ ເປັນຕົ້ນ: ເຄື່ອງອຸປະໂພກ-ບໍລິໂພກ, ນ້ຳດື່ມ, ເຄື່ອງນອນ, ເຄື່ອງນຸ່ງ, ວັດຖຸ, ສິ່ງຂອງເຄື່ອງໃຊ້ຕ່າງໆ ມາຮອດວັນທີ 8 ກັນຍາ 2019 ລວມມູນຄ່າປະ ມານ 1 ຕື້ກວ່າກີບ.