ການຊ່ວຍເຫຼືອປະຊາຊົນຜູ້ປະສົບໄພນ້ຳຖ້ວມ ຢູ່ແຂວງອັດຕະປື ເຫັນວ່າໄດ້ມີທຸກໆພາກສ່ວນທັງພາກລັດ ແລະ ເອກະຊົນໄດ້ຮ່ວມກັນຊ່ວຍເຫລືອເຊິ່ງກັນ ແລະ ກັນຢ່າງຕໍ່ເນື່ອງ ແລະ ເຄື່ອງຊ່ວຍເຫລືອດັ່ງກ່າວພາກສ່ວນກ່ຽວຂ້ອງໄດ້ລຽງຈັດສົ່ງໄປຮອດໄປເຖິງຜູ້ປະສົບໄພແກ້ໄຂເບື້ອງຕົ້ນຕາມຂໍ້ມູນຂອງແຕ່ລະເມືອງ ແລະ ອຳນາດການປົກຄອງບ້ານສະເໝີມາຢ່າງຕໍ່ເນື່ອງຢູ່.

ສືບຕໍ່ໃຫ້ການຊ່ວຍເຫລືອເບື້ອງຕົ້ນໃຫ້ທົ່ວເຖິງເພິ່ມຂຶ້ນນັ້ນ ໃນວັນທີ 9 ກັນຍາ 2019 ທ່ານ ນາງ ແສງອຳພອນ ພິຈິດ ນັກທຸລະກິດ ແຂວງອັດຕະປື ຕ່າງໜ້າໃຫ້ຄອບຄົວ ນາງ ບຸນຄຳ ວໍລະຈິດ ປະທານ ກຸ່ມບໍລິສັດ ເລດີ ນະຄອນຫລວງວຽງຈັນ ໄດ້ນຳເອົານຳ້ດື່ມ 200 ແຟັກ ລວມມູນຄ່າ 4 ລ້ານກີບ ມອບໃຫ້ຄະນະປ້ອງກັນ ແລະ ແກ້ໄຂໄພພິບັດຂັ້ນແຂວງ ກອງເລຂາຂັ້ນແຂວງ ນຳໄປຊ່ວຍເຫຼືອຜູ້ປະສົບໄພພິບັດນໍ້າຖ້ວມພາຍໃນ 5 ເມືອງໃຫ້ຄົບຕາມເປົ້າໝາຍ.

ຕ່າງໜ້າກ່າວຮັບໂດຍ ທ່ານ ອຸ່ນຫລ້າ ໄຊຍະສິດ ຮອງເຈົ້າແຂວງອັດຕະປື ປະທານຄະນະກຳມະການປ້ອງກັນ ແລະ ຄອບຄຸມໄພພິບັດຂັ້ນແຂວງ ພ້ອມດ້ວຍພາກສ່ວນກ່ຽວຂ້ອງທັງສອງຝ່າຍເຂົ້າຮ່ວມ.
ທ່ານ ນາງ ແສງອຳພອນ ພິຈິດ ໄດ້ສະແດງຄວາມຮູ້ສຶກວ່າ: ນຳ້ດື່ມທີ່ນໍາມາມອບໃນຄັ້ງນີ້ ແມ່ນເປັນການປະກອບສ່ວນຂອງລູກຫລານຄອບຄົວການນຳສູນກາງ ແລະ ລູກຫລານພາຍໃນແຂວງໄດ້ຮ່ວມໃຈກັນຄົນລະຫນ່ອຍ ເພື່ອເປັນການປະກອບສ່ວນເຂົ້າໃນການແກ້ໄຂພໍ່ແມ່ປະຊາຊົນໃຫ້ຜູ້ປະສົບໄພໄດ້ແກ້ໄຂຊີວິດການເປັນຢູ່ໃນເບື້ອງຕົ້ນນີ້ສືບໄປເທື່ອລະກ້າວ.

ຂ່າວໂດຍ: ຈັນສະໄໝ