ໂຄງການກໍ່ສ້າງສະໜາມບິນໜອງຄ້າງ ເມືອງຊໍາເໜືອ ແຂວງຫົວພັນ ແມ່ນໂຄງການ ຂອງລັດຖະບານ ແຫ່ງ ສປປ ລາວ, ເພື່ອຮອງ ຮັບເຮືອບິນຈາກສາຍພາຍໃນ ແລະ ຕ່າງປະເທດໃນອານາຄົດ, ຈຸດປະສົງ ເພື່ອຊຸກຍູ້ສົ່ງເສີມການພັດທະນາ ເສດຖະກິດ-ສັງຄົມ ແລະ ການທ່ອງທ່ຽວຂອງແຂວງຫົວພັນ ກໍ່ຄືພາຍໃນປະເທດ, ໂດຍສະເພາະແມ່ນ ວຽກງານການຂົນສົ່ງທາງອາກາດ ໃນໄລຍະຍາວແມ່ນ ເພື່ອຜັນຂະຫຍາຍແຜນພັດທະນາເສດຖະກິດ-ສັງຄົມ ຂອງລັດຖະບານ ແຫ່ງປະ ເທດ ສປປ ລາວ ປີ 2010-2020, ຕາມນະໂຍບາຍເພື່ອຫັນປະເທດ ສປປ ລາວ ຈາກປະເທດບໍ່ມີຊາຍແດນຕິດກັບທະເລ ມາເປັນປະເທດບໍລິການທາງຜ່ານ ແລະ ມີຄວາມມຸ້ງຫມັ້ນ ເພື່ອນໍາພາປະເທດຊາດຫຼຸດພົ້ນອອກຈາກປະເທດດ້ອຍພັດທະນາໃນປີ 2020.

ໂຄງການກໍ່ສ້າງສະໜາມບິນໜອງຄ້າງ ໄດ້ເລີ່ມຕົ້ນຈັດຕັ້ງປະຕິບັດມາແຕ່ວັນທີ 07 ຕຸລາ 2013, ສິ້ນສຸດໂຄງການໄລຍະທີ່ໜຶ່ງໃນວັນທີ່ 07 ຕຸລາ 2015 ແລະ ເລີ່ມຈັດຕັ້ງປະຕິບັດຄືນໃໝ່ໄລຍະທີ່ສອງ ແຕ່ວັນທີ 21 ມີຖຸນາ 2019 ຄາດວ່າຮອດທ້າຍເດືອນທັນວາ 2019 ແມ່ນຈະໃຫ້ສໍາເລັດ 100%. ໂຄງການນີ້ມີມູນຄ່າທັງໝົດ 74 ລ້ານກວ່າໂດລາສະຫະລັດ ໂດຍແມ່ນທຶນກູ້ຢືມຈາກບໍລິສັດຮຸ້ນສ່ວນ ຮວ່າງແອງ ຢາລາຍ (HAGL), ກົມການບິນພົນລະເຮືອນ, ກະຊວງໂຍທາທິການ ແລະຂົນສົ່ງ ເປັນເຈົ້າຂອງໂຄງການ, ບໍລິສັດ ADCC ສສ ຫວຽດນາມ ເປັນທີ່ປຶກສາ ແລະ ຜູ້ຮັບເຫມົາກໍ່ສ້າງໂດຍ ບໍລິສັດ ພັດທະນາກະສິກໍາ ຮວ່າງແອັງ ອັດຕະປື ຈໍາກັດ. ມາຮອດປະຈຸບັນໂຄງການດັ່ງກ່າວມີຄວາມຄືບໜ້າແລ້ວ 66,38% ຂອງໜ້າວຽກທັງໝົດ ໃນນີ້ວຽກກໍ່ສ້າງອາຄານຄືບໜ້າ 80%, ທາງແລ່ນຂຶ້ນ-ລົງຂອງເຮືອບິນປູດ້ວຍຢາງຂົ້ວໜາ 15 ຊມ ມີຄວາມຍາວທັງໝົດ 2 ພັນ 400 ແມັດ, ກວ້າງ 30 ແມັດ ປູຢາງຂົ້ວສຳເລັດແລ້ວ 1 ພັນ 500 ແມັດ. ສ່ວນໜ້າວຽກທີ່ຈະໄດ້ສືບຕໍ່ແມ່ນ: ສືບຕໍ່ວຽກຂົນສົ່ງວັດສະຕູ ແລະ ອຸປະກອນຕ່າງໆ ມາຮັບໃຊ້ໂຄງການເປັນປົກກະຕິ ເຊັ່ນ: ຊີມັງ, ຊາຍ, ຫີນ, ເຫຼັກເສັ້ນ ແລະ ອື່ນໆ, ສືບຕໍ່ຕັດດິນຢູ່ເຂດພື້ນທີ່ແລວລົງເດີນຂອງທາງແລ່ນຂຶ້ນ-ລົງ ສົ້ນເບື້ອງທິດເໜືອ, ສືບຕໍ່ກໍ່ສ້າງທາງແລ່ນຂຶ້ນ-ລົງ ເຊັ່ນ: ຖົມຊັ້ນຫີນປູຢາງຂົ້ວທາງແລ່ນຂຶ້ນ-ລົງ, ຕິດຕັ້ງບານແກ້ວໃສ່ອາຄານຜູ້ໂດຍສານ, ສືບຕໍ່ກໍ່ສ້າງຮົ້ວອ້ອມສະຫນາມບິນ, ກັນເຈື່ອນ ແລະ ກໍ່ສ້າງລະບົບລະບາຍນໍ້າເຂດປະຕິບັດການບິນ.

ນອກນີ້ວຽກກໍ່ສ້າງຢູ່ພາກສະຫນາມແລ້ວ ບໍລິສັດຜູ້ຮັບເຫມົາກໍ່ສ້າງ ກໍ່ໄດ້ສູມໃສ່ວຽກຈັດຊື້ອຸປະກອນມາຕິດຕັ້ງໃສ່ສະຫນາມບິນໃຫ້ສໍາເລັດຕາມແຜນການເຊັ່ນ: ອຸປະກອນຊ່ວຍການບິນ, ເຄື່ອງຈັກປັ່ນໄຟຟ້າງສໍາຮອງ ເຄື່ອງວັດແທກສະພາບອາກາດ, ເຄື່ອງເອັກສເຣ (X-RAY) ແລະ ອຸປະກອນອື່ນໆຕາມການອອກແບບ.
ໂຄງການກໍ່ສ້າງສະໜາມບິນໜອງຄ້າງ ເມືອງຊໍາເໜືອ ແມ່ນກໍ່ສ້າງໃຫ້ໄດ້ຕາມມາດຕະຖານຄວາມປອດໄພຂອງ ກົມການບິນພົນລະເຮືອນ ແລະ ມາດຕະຖານສາກົນ, ຊຶ່ງສາມາດຮອງຮັບເຮືອບິນຂະຫນາດ 70-100 ບ່ອນນັ່ງ ເຊັ່ນ: ເຮືອບິນ ATR72 ແລະ ເຮືອບິນອື່ນໆ ພາຍຫຼັງກໍ່ສ້າງສຳເລັດແລ້ວ ບໍລິສັດຜູ້ຮັບເໝົາກໍ່ຈະໄດ້ມອບຕໍ່ໃຫ້ ກອງຄຸ້ມຄອງການບິນພົນລະເຮືອນເປັນຜູ້ບໍລິຫານຈັດການຕໍ່ໄປ.

ຂ່າວ-ພາບ:ອາລຸນໄຊ