ກອງປະຊຸມໃຫຍ່ຄັ້ງທີ I ຂອງໜ່ວຍແມ່ຍິງຄົ້ນຄວ້າ-ສັງລວມວຽກພັກ ທີ່ຂຶ້ນກັບສະຫະພັນແມ່ຍິງຮາກຖານຫ້ອງວ່າການປົກຄອງແຂວງໄຊຍະບູລີ ໄດ້ຈັດຂຶ້ນຢ່າງເປັນທາງການ ໃນວັນທີ 10 ກັນຍາ 2019 ນີ້ຢູ່ທີ່ຫ້ອງປະຊຸມຫ້ອງວ່າການປົກຄອງແຂວງ, ໂດຍການເປັນປະທານ ຂອງສະຫາຍ ນາງ ນັນທິດາ ທັນວົງສາ ຫົວໜ້າໜ່ວຍສະຫະພັນແມ່ຍິງຄົ້ນຄວ້າ-ສັງລວມວຽກພັກ, ໃຫ້ກຽດເຂົ້າຮ່ວມມີ ສະຫາຍ ນາງ ວົງເດືອນ ເຫງົ້າສະຫວັດ ປະທານສະຫະພັນແມ່ຍິງຮາກຖານຫ້ອງວ່າການແຂວງ, ສະຫາຍ ນາງ ວົງພັນ ສັນຕິສຸກ ຮັກສາການ ເລຂາພັກຄົ້ນຄວ້າ-ສັງລວມວຽກພັກ, ພ້ອມດ້ວຍຜູ້ແທນ, ແຂກຖືກເຊີນ ແລະ ສະມາຊິກແມ່ຍິງພາຍໃນໜ່ວຍເຂົ້າຮ່ວມ.

ໃນພິທີ ສະຫາຍ ນາງ ນັນທິດາ ທັນວົງສາ ຫົວໜ້າໜ່ວຍສະຫະພັນແມ່ຍິງຄົ້ນຄວ້າ-ສັງລວມວຽກພັກ ໄດ້ຂຶ້ນກ່າວເປີດກອງປະຊຸມຢ່າງເປັນທາງການ ແລະ ຜ່ານບົດລາຍງານ, ສັງເກດຕີລາຄາຄືນການຊີ້ນຳ-ນຳພາ ໃນໄລຍະຜ່ານມາ ຄະນະສະຫະພັນແມ່ຍິງ ແລະ ສະມາຊິກທຸກສະຫາຍໄດ້ເອົາໃຈໃສ່ຄົ້ນຄວ້າ ເຊື່ອມຊຶມບັນດາເນື້ອໃນ ແນວທາງນະໂຍບາຍຂອງພັກ-ລະບຽບກົດໝາຍຂອງລັດ, ມູນເຊື້ອຂອງແມ່ຍິງລາວ ສົ່ງເສີມບົດບາດຍິງ-ຊາຍ, ຕ້ານປະກົດການຫຍໍ້ທໍ້ໃນສັງຄົມ, ຕັ້ງໜ້າປະກອບສ່ວນເຂົ້າໃນແຜນພັດທະນາແມ່ຍິງ, ແຜນການຂອງໝ່ວຍພັກວາງອອກ ພ້ອມກັນນັ້ນກໍ່ໄດ້ນໍາພາເປີດຂະບວນການແຂ່ງຂັນ 3 ດີ ແລະ ກວດກາການຈັດຕັ້ງປະຕິບັດຂໍ້ແຂ່ງຂັນ 3 ດີເປັນແຕ່ລະໄລຍະ. ໄປຄຽງຄູ່ກັບວຽກງານນະໂຍບາຍໃນໜ່ວຍຍັງສາມາດຍາດໄດ້ຜົນງານດີເດັ່ນ ໃນການປະຕິບັດໜ້າທີ່ວຽກງານທີ່ຂັ້ນເທິງຈັດຂຶ້ນ ເຊິ່ງໄດ້ຮັບການຍ້ອງຍໍດັ່ງນີ້:

ໄດ້ຮັບຫຼຽນໄຊອິດສະຫຼະຈໍານວນ 1 ສະຫາຍ, ຫຼຽນໄຊແຮງງານຈໍານວນ 1 ສະຫາຍ, ຫຼຽນໄຊພິລະອາດຫານຈໍານວນ 1 ສະຫາຍ, ໄດ້ຮັບຫຼຽນກາແຮງງານຈໍານວນ 3 ສະຫາຍ, ຫຼຽນມິດຕະພາບລາວ-ຫວຽດຈໍານວນ 1 ສະຫາຍ, ຍ້ອງຍໍຈາກທ່ານເຈົ້າແຂວງ 10 ສະຫາຍ, ຍ້ອງຍໍຈາກສູນກາງສະຫະພັນແມ່ຍິງຈໍານວນ 5 ສະຫາຍ, ຍ້ອງຍໍຈາກສູນກາງກຳມະບານລາວ 6 ສະຫາຍ, ຈາກສູນກາງຊາວໜຸ່ມຈໍານວນ 3 ສະຫາຍ ແລະ ໃບຍ້ອງຍໍອື່ນໆອີກ. ຈາກນັ້ນສະຫະພັນແມ່ຍິງຊຸດເກົ່າກໍ່ໄດ້ຂຶ້ນຜ່ານໃບສຳຫຼວດການນຳພາ, ພ້ອມທັງກ່າວລາໜ້າທີ່ ແລະ ກອງປະຊຸມຍັງໄດ້ໃຊ້ສິດປະຊາທິປະໄຕຍົກມືປະຊາມະຕິເອົາ ສະຫາຍ ນາງ ໄມຄໍາ ເຮີ ເປັນຫົວໜ້າໜ່ວຍ ແລະ ສະຫາຍ ນາງ ສີທົນ ອິນທະຈັກ ເປັນຮອງໜ່ວຍທັງເປັນຜູ້ຊ່ວຍວຽກງານກວດກາ. ໃນຕອນທ້າຍ ສະຫາຍ ນາງ ວົງເດືອນ ເຫງົ້າສະຫວັດ ປະທານສະຫະພັນແມ່ຍິງຮາກຖານຫ້ອງວ່າການແຂວງ ກໍ່ໄດ້ໃຫ້ກຽດໂອ້ລົມຕໍ່ກອງປະຊຸມຕື່ມອີກ.

ຂ່າວ: ມະໄລວັນ