ເລີ່ມແຕ່ເດືອນມີນາ ຫາ ເດືອນສິງຫາ 2019 ທົ່ວແຂວງໄຊຍະບູລີ ມີຜູ້ເປັນໄຂ້ຍຸງລາຍທັງໝົົດ637ກໍລະນີແລະເສຍຊີວິດ2ກໍລະນີ ຢູ່ເມືອງໄຊຍະບູລີ. ທ່ານສົມນຶກ ພົນລັດ ຫົວໜ້າຂະແໜງໄຂ້ຍຸງ ພະແນກສາທາລະນະສຸກ ແຂວງໄຊຍະບູລີ ໄດ້ກ່າວຕໍ່ນັກຂ່າວແຂວງວ່າ: ການພົບພໍ້ພະຍາດໄຂ້ຍຸງລາຍກໍລະນີທຳອິດ 1 ກໍລະນີ ຢູ່ບ້ານໂພນງາມ ເມືອງປາກລາຍ ໃນກາງເດືອນ ມີນາ 2019 ລວມມີ: 3 ກໍລະນີ ຈາກນັ້ນກໍ່ມີການແຜ່ລະບາດໄປຍັງ ບ້ານ ແລະ ເມືອງ ອື່ນໆແບບຕໍ່ເນື່ອງ ເປັນແຕ່ລະວັນລວມເອົາ 8 ເມືອງມີ 100 ກ່ວາບ້ານມີ 673 ກໍລະນີ, ເສຍຊີວິດ 2 ກໍລະນີ, ສ່ວນໃຫຍ່ນອນໃນກຸ່ມອາຍຸ 15-35 ປີ ໃນນີ້ເມືອງໄຊຍະບູລີມີ 46 ບ້ານ ມີ 334 ກໍລະນີ, ເມືອງພຽງມີ 29 ບ້ານ 170 ກໍລະນີ, ເມືອງປາກລາຍ ມີ 8 ບ້ານມີ 23 ກໍລະນີ, ເມືອງບໍ່ແຕນ ມີ 6 ບ້ານມີ 50 ກໍລະນີ, ເມືອງຫົງສາ ມີ 7 ບ້ານມີ 9 ກໍລະນີ, ເມືອງແກ່ນທ້າວມີ 6 ບ້ານມີ 25 ກໍລະນີ, ເມືອງຊຽງຮ່ອນມີ 1 ບ້ານມີ 1 ກໍລະນີ ແລະ ເມືອງທົ່ງມີໄຊມີ 1 ບ້ານ ມີ 1 ກໍລະນີ

ແຕ່ມາເຖິງຂະນະນີ້ການແຜ່ລະບາດໄຂ້ຍຸງລາຍຢູ່ແຂວງໄຊຍະບູລີ ແມ່ນລຸດລົງຕາມລໍາດັບ ເຫຼືອພຽງແຕ່ບາງເລັກນ້ອຍຢູ່ 3 ເມືອງຄື: ເມືອງໄຊຍະບູລີ, ເມືອງພຽງ ແລະ ເມືອງແກ່ນທ້າວ, ສ່ວນເມືອງອື່ນໆ ແມ່ນຢູ່ໃນພາວະປົກກະຕິ ທັງໝົດນັ້ນຍ້ອນອົງການປົກຄອງທຸກຂັ້ນ ໄດ້ເອົາໃຈໃສ່ປຸກລະດົມທຸກພາກສ່ວນ ໃຫ້ມີສ່ວນຮ່ວມໃນການສະກັດກັ້ນການລະບາດໄຂ້ຍຸງລາຍ ບໍ່ໃຫ້ລາມກ້ວາງ ລວມທັງປຸກລະດົມການປະກອບສ່ວນດ້ານງົບປະມານວັດຖຸອຸປະກອນ ໃນການຕ້ານໄຂ້ຍຸງລາຍພ້ອມທັງນໍາພາປະຕິບັດ 5 ປ ເປັນປົກກະຕິທຸກໆອາທິດ ຄື: ປິດພາຊະນະທີ່ບັນຈຸນໍ້າໃນເຮືອນ ແລະ ນອກເຮືອນໄຫ, ອຸແອ່ງ,ຟຸຍ, ເພື່ີອບໍ່ໃຫ້ຍຸງລາຍມາໄຂ່ໃສ່. ປ່ຽນນໍ້າ ແລະ ພັດຖູພາຊະນະ, ຖ້ວຍຮອງຕີນຕູ້, ໂຖດອກໄມ້, ປ່ອຍປາຫາງນົກຍຸງໃສ່ພາຊະນະທີ່ບັນຈຸນໍ້າ ເພື່ອໃຫ້ກິນໜອນນໍ້າຍຸງລາຍ. ປັບປຸງອະນາໄມບໍລິເວນທີ່ຢູ່ອາໄສທັງໃນ ແລະ ນອກເຮືອນ ໃຫ້ສະອາດໃນແຕ່ລະຄອບຄົວ, ປະຕິບັດ 5ປ ໃຫ້ເປັນນິໄສ ປະຕິບັດເປັນປະຈໍາທຸກໆອາທິດ ການປ້ອງກັນໄຂ້ຍຸງລາຍນີ້ ຖ້າບຸກຄົນ, ຄອບຄົວ, ຊຸມຊົນ, ຫາກເອົາໃຈໃສ່ປະກອບສ່ວນເປັນເຈົ້າການຮັກສາ ບໍ່ໃຫ້ມີແຫຼ່ງເພາະພັນ ແລະ ບໍ່ໃຫ້ມີເງື່ອນໄຂໃນການຂະຫຍາຍພັນຂອງຍຸງລາຍ ເຮັດໃຫ້ລຸດຜ່ອນຄວາມໜາແໜ້ນຂອງພາຫະນະນໍາເຊື້ອໂອກາດທີ່ໃນການສົ່ງເຊື້ອປັດໃຈສ່ຽງໃນການລະບາດກໍ່ຈະລຸດລົງ ຫຼືສາມາດຫຼີກລ່ຽງການເກີດລະບາດໄຂ້ຍຸງລາຍໄດ້.

ຂ່າວ: ບຸນທີ