ພິທີປະດັບຫລຽນໄຊພັດທະນາ ຊັ້ນ 1 ໃຫ້ບໍລິສັດຈະເລີນເຊກອງກຣຸບ ທີ່ມີຜົນງານປະກອບສ່ວນທຶນຮອນເຂົ້າໃນການກໍ່ສ້າງໂຮງຮຽນມັດທະຍົມສົມບູນ ບ້ານອ້ອມ ເມືອງອະນຸວົງ ແຂວງໄຊສົມບູນ ໄດ້ຈັດຂຶ້ນໃນຕອນເຊົ້າ ຂອງວັນທີ 10 ກັນຍາ 2019 ນີ້ ທີ່ສະໂມສອນເມືອງອະນຸວົງ ໂດຍການເຂົ້າຮ່ວມຂອງທ່ານ ພົຕ ຄໍາລຽງ ອຸທະໄກສອນ, ເຈົ້າແຂວງໄຊສົມບູນ ແລະ ທ່ານ ລິດສະໝີ ລາດຊະວົງ, ຮອງປະທານບໍລິສັດຈະເລີນເຊກອງ ພະລັງງານ ຈໍາກັດ, ມີປະທານສະພາປະຊາຊົນແຂວງ, ມີບັນດາຫົວໜ້າພະແນກການ, ອົງການ-ກົມກອງ ອ້ອມຂ້າງແຂວງ ພ້ອມດ້ວຍການນຳເມືອງອະນຸວົງ ເຂົ້າຮ່ວມ.

ພາຍຫຼັງໄດ້ຮັບຊົມ ແລະ ຮັບຟັງການສະແດງບົດຟ້ອນ ແລະ ຮ້ອງເພງ ຂອງສິລະປະ ທີ່ມາຈາກສູນວັດທະນະທໍາເດັກ ພະແນກຖະແຫລງຂ່າວ, ວັດທະນະທໍາ ແລະ ທ່ອງທ່ຽວ ແຂວງ ແລະ ນັກຮ້ອງສະໝັກຫລີ້ນຈາກທະຫານແຂວງ ດ້ວຍບັນຍາກາດຟົດຟື້ນ ແລະ ເບີກບານມ່ວນຊື່ນແລ້ວ ຜູ້ເຂົ້າຮ່ວມໄດ້ຮັບຟັງການຜ່ານບົດລາຍງານ ຂອງບໍລິສັດ ຈະເລີນເຊກອງພະລັງງານ ຈໍາກັດ ໂດຍຫຍໍ້ ຈາກທ່ານ ລິດສະໝີ ລາດຊະວົງ ທີ່ໄດ້ຈັດຕັ້ງໃນໄລຍະຜ່ານມາ ຊຶ່ງບໍລິສັດໄດ້ປະກອບສ່ວນທີ່ສໍາຄັນໃຫ້ແກ່ ແຂວງໄຊສົມບູນ ໂດຍສະເພາະ ໄດ້ກໍ່ສ້າງໂຮງຮຽນ ມັດທະຍົມສົມບູນ ບ້ານອ້ອມ ເມືອງອະນຸວົງ ໃນມູນຄ່າ 3.851.616.127 ( ສາມຕື້ແປດຮ້ອຍຫ້າສິບເອັດລ້ານຫົກແສນຫົກພັນໜຶ່ງຮ້ອຍຊາວເຈັດກີບ ) ສິ່ງດັ່ງກ່າວມັນໄດ້ປະກອບສ່ວນ ເຂົ້າໃນການພັດທະນາຊັບພະຍາກອນມະນຸດ ເວົ້າລວມເວົ້າສະເພາະ ກໍຄືການອໍານວຍຄວາມສະດວກໃຫ້ລູກຫລານປະຊາຊົນບ້ານອ້ອມ ໄດ້ມີສະຖານທີຮໍ່າຮຽນ ຢ່າງສະດວກສະບາຍ. ພ້ອມດຽວກັນນີ້ຍັງໄດ້ຮັບຟັງການຜ່ານລັດຖະດໍາລັດ ຂອງປະທານປະເທດວ່າດ້ວຍການມອບ ຫລ້ຽນໄຊພັດທະນາຊັ້ນ 1 ໃຫ້ກັບບໍລິສັດຈະເລີນເຊກອງກຣຸບ ແລະ ຜ່ານໃບມອບສິດຂອງນາຍົກລັດຖະມົນຕີ. ຈາກນັ້ນໄດ້ມີພິທີປະດັບຫລຽນໄຊໃຫ້ທ່ານ ລິດສະໝີ ລາດສະວົງ, ຮອງປະທານບໍລິສັດຈະເລີນເຊກອງ ພະລັງງານ ຈໍາກັດ ຢ່າງເປັນທາງການ ໂດຍການປະດັບຂອງທ່ານ ພົຕ ຄໍາລຽງ ອຸທະໄກສອນ, ເຈົ້າແຂວງໄຊສົມບູນ. ສຽງສໍາພາດ.
ທັງນີ້ກໍ່ເພື່ອເປັນການຍ້ອງຍໍສັນລະເສີນ ທັງເປັນການຊຸກຍູ້ດ້ານຈິດໃຈ ຕໍ່ຜູ້ທີ່ມີຜົນງານດີເດັ່ນ ເພື່ອໃຫ້ເຂົາເຈົ້າໄດ້ສ້າງຜົນງານຕໍ່ໄປ ໃນການປະກອບສ່ວນທີ່ສໍາຄັນ ເຂົ້າໃນກາານພັດທະນາ ແຂວງໄຊສົມບູນໃນຕໍ່ໜ້າ.

ພາບ-ຂ່າວ: ຕູດ ຄຳພໍໃຈ