ກອງພັນປ້ອງກັນເຄື່ອນທີ່ ປກສ ແຂວງສະຫວັນນະເຂດ ໄດ້ຈັດພິທີປາຖະກາຖາ ການກຳເນີດເຕີບໃຫຍ່ຂະຫຍາຍຕົວ ແລະ ມູນເຊື້ອອັນສະຫງ່າລາສີຂອງແນວລາວສ້າງຊາດ ເນື່ອງໃນໂອກາດວັນສ້າງຕັ້ງແນວລາວສ້າງຊາດ ຄົບຮອບ 69 ປີ 13 ສິງຫາ 1950 – 13 ສິງຫາ 2019 ໃນວັນທີ 10 ກັນຍາ 2019 ໂດຍປາຖະກາຖາ ຂອງ ທ່ານ ພັທ ອິນປັນ ລວຍຍະລາດ ຮອງກອງພັນປ້ອງກັນເຄື່ອນທີ່ ປກສ ແຂວງ ມີພະແນກແລະ ສະມາຊິກ ກອງພັນປ້ອງກັນເຄື່ອນທີ່ເຂົ້າຮວມຮັບຟັງ.

ໃນພິທີ ທ່ານ ພັທ ອິນປັນ ລວຍຍະລາດ ຮອງກອງພັນປ້ອງກັນເຄື່ອນທີ່ ໄດ້ຍົກໃຫ້ເຫັນການກຳເນີດເຕີບໃຫຍ່ຂະຫຍາຍຕົວຂອງອົງການແນວລາວສ້າງຊາດຕະຫລອດໄລຍະ 69 ປີ ຜົນສຳເລັດ ແລະ ຜົນງານອັນພົ້ນເດັ່ນແຫ່ງການຕໍ່ສູ້ກູ້ຊາດ ຕ້ານຈັກກະພັດລ່າເມືອງຂື້ນແບບເກົ່າ ແລະ ແບບໄໝ່ ສະໄໝ່ແນວລາວອິດສະຫຼະ ແລະ ແນວລາວຮັກຊາດ ຊາດລາວແມ່ນຊາດໜຶ່ງທີ່ມີດິນແດນບໍ່ກ້ວາງໃຫຍ່ ຈຳນວນຜົນລະເມືອງໜ້ອຍ ແຕ່ມີຄວາມອຸດົມສົມບູນດ້ວຍຊັບພະຍາກອນທຳມະຊາດ ແລະ ມີຫລາຍຊົນເຜົ່າຢູ່ຮ່ວມກັນ ມີມູນເຊື້ອສາມັກຄີປອງດອງເປັນປຶກແຜນແໜ້ນໜາ ແລະ ມີປະຫວັດຊາດແຫ່ງການຕໍ່ສູ້ເພື່ອປົກປັກຮັກສາຜືນແຜນດິນຂອງຊາດລາວຢ່າງເດັດດ່ຽວ,ອົງອາດກ້າຫານ ໂດຍບໍ່ຍອມເປັນຂ້ອຍຂ້າມ້າຕ່າງໃຫ້ແກ່ພວກລ່າເມືອງຂື້ນນັ້ນ.ປະຊາຊົນລາວບັນດາເຜົ່າໄດ້ລຸກຂື້ນຕໍ່ສູ້ຕ້ານພວກລ່າເມືອງຂື້ນຢ່າງເນືອງນິດລຽນຕິດ,ຂະບວນການຕໍ່ສູ້ດ້ວຍອາວຸດຂອງປະຊາຊົນຢູ່ແຂວງສະຫວັນະເຂດ ພາຍໃຕ້ການນຳພາຂອງພໍ່ກະດວດ (ປີ 1901-1902) ຂະບວນການຕໍ່ສູ້ຂອງປະຊາຊົນຢູ່ເຂດດົງບໍລິເວນ ພາຍໃຕ້ການນຳພາຂອງອົງແກ້ວ-ອົງກົມມະດຳ (ປີ 1902-1937) ຂະບວນການຕໍ່ສູ້ຂອງປະຊາຊົນເຜົ່າມົ້ງຢູ່ທາງພາກເໜືອ ພາຍໃຕ້ການນຳພາຂອງເຈົ້າຟ້າປັດໃຈ (ປີ 1918-1922) ແລະ ຂະບວນການຕໍ່ສູ້ອື່ນໆ.

ຈົນຍາດມາໄດ້ຜົນສຳເລັດອັນຍິງໃຫຍ່ ສາມາດຕີເອົາໄຊຊະນະຈັກກະພັດຕ່າງດ້າວ ແລະ ປົດປ່ອຍປະເທດຊາດອອກຈາກແອກລ່າເມືອງຂື້ນແບບເກົ່າ ບັງຄັບໃຫ້ພວກລ່າເມືອງຂື້ນແບບເກົ່າ ຕ້ອງເຊັນສັນຍາເຊີແນວ 1954 ຍອມຮັບຮູ້ເອກະລາດອຳນາດອາທິປະໄຕ ແລະ ຜືນແຜນດິນອັນຄົບຖ້ວນຂອງລາວ.ພ້ອມນີ້ໃນພິທີ່ດັ່ງກ່າວກໍ່ໄດ້ບັນຍາຍເອກະສານວັນສຳຄັນຄື: ວັນຊາດສາທາລະນະລັດສັງຄົມນິຍົມຫວຽດນາມ ແລະ ດຳລັດວ່າດ້ວຍຈັນຍາບັນຂອງພະນັກງານ-ລັດຖະກອນຕື່ມອີກ.

ຂ່າວ-ພາບ: ວິທະຍຸກະຈາຍສຽງສະຫວັນນະເຂດ