ໃນຕອນເຊົ້າວັນທີ 10 ກັນຍາ 2019 ນີ້ ກອງບັນຊາການທະຫານນະຄອນໄກສອນພົມວິຫານແຂວງສະຫວັນະເຂດ,ໄດ້ເປີດຊດອົບຮົມການເມືອງ, ການທະຫານ, ພະລາທິການເຕັກນິກປະຈຳປີ 2019 ໂດຍການເປັນປະທານຂອງສະຫາຍ ພັນໂທ ຈັນລືໄຊ ມູນທິສານ ເລຂາຄະນະພັກຮາກຖານ ຫົວໜ້າການເມືອງ ກອງບັນຊາການທະຫານນະຄອນໄກສອນ ພົມວິຫານ, ມີພັນໂທ ທອງດຳ ເດືອນແສງດີ ຫົວໜ້າການທະຫານກອງບັນຊາການທະຫານນະຄອນໄກສອນ,ແຂກທີ່ຖືກເຊີນ ແລະ ພະນັກງານ – ນັກຮົບໃນກົມກອງດັ່ງກ່າວເຂົ້າຮ່ວມ.

ສະຫາຍ ຮ້ອຍເອກ ສີຄູນ ສີດາວົງ ຫົວໜ້າຂະແໜງທ້ອງຖິ່ນທະຫານນະຄອນໄກສອນ ໄດ້ຂື້ນຜ່ານແຜນການອົບຮົມປະຈຳປີ 2019 ເຊິ່ງພາກການເມືອງຈະໄດ້ຮຽນເອກະສານຍົກສູງພາລະບົດບາດການນຳພາຂອງພັກ,ຮຽນວຽກງານນະໂຍບາຍຕໍ່ພະນັກງານ ແລະ ພົນທະຫານ,ຮຽນວຽກງານປະກັນສັງຄົມ,ວຽກງານກໍ່ສ້າງຮາກຖານການເມືອງ,ວຽກງານຊາວໜຸ່ມປະຊາຊົນປະຕິວັດລາວ,ໜ້າທີ່ຝືກຜົນຫຼໍ່ຫຼອມຄຸນທາດການເມືອງ ແລະ ຄຸນສົມບັດສິນທຳປະຕິວັດ,ຮຽນເອກະສານເສີມຂະຫຍາຍມູນເຊື້ອຂອງຊາດລາວຂອງຄົນລາວ ແລະ ວຽກງານໄອຍະການ,ພາກການທະຫານຈະໄດ້ຮຽນເອກະສານກໍ່ສ້າງພື້ນຖານປ້ອງກັນຊາດ-ປ້ອງກັນຄວາມສະຫງົບທົ່ວປວງຊົນຮອບດ້ານ,ຮຽນເອກະສານ 7 ລະບອບ 18 ວຽກ,ເອກະສານສະເໜີທິດສະດີກ່ຽວກັບການເຄົາລົບທຸງ,ຫັດແອບເຄົາລົບທຸງຕົວຈິງ,ຮຽນຄຸນຄ່າສະມັດຕະພາບ ແລະ ການປະກອບສ້າງຂອງປືນອາກ້າ,ພາກພະລາທິການເຕັກນິກຈະໄດ້ຮຽນເອກະສານວຽກງານພະລາທິການທ້ອງຖິ່ນ,ຮຽນວິທີຄິດໄລ່ເງິນຕາມຊັ້ນນາຍ ແລະ ພົນທະຫານ,ເອະສານຄຳສັ່ງແນະນຳກ່ຽວກັບການຈັດຕັ້ງປະຕິບັດດຳລັດວ່າດ້ວຍເອກະສານທາງການ,ເອກະສານ 5 ຫຼັກການເຊີດຊູກະທັນຫັນຂອງແພດ ແລະ ເອກະສານວິທີປ້ອງກັນພະຍາດໄຂ້ຍຸງ,ຊຸດອົບຮົມຄັ້ງນີ້ຈະໃຊ້ເວລາ 60 ວັນຈິ່ງຈະສຳເລັດ.ຕອນທ້າຍ ສະຫາຍ ພັນໂທ ທອງດຳ ເດືອນແສງດີ ຫົວໜ້າການທະຫານກອງບັນຊາການທະຫານນະຄອນໄກສອນພົມວິຫານ ກໍ່ໄດ້ໂອ້ລົມພ້ອມທັງຮຽກຮ້ອງໃຫ້ພະນັກງານ-ນັກຮົບແຕ່ລະສະຫາຍ ຕ້ອງເອົາໃຈໃສ່ເກັບກຳເອົາບົດຮຽນທີ່ຄູອາຈານໄດ້ຖ່າຍຖອດໃຫ້ເພື່ອນຳໄປໝູນໃຊ້ເຂົ້າໃນໜ້າທີ່ວຽກງານໃນກົມກອງຂອງຕົນໃຫ້ໄດ້ຮັບໝາກຜົນຕົວຈິງ.

ກວດຂ່າວໂດຍ ບກ ທະຫານແຂວງ ພາບ-ຂ່າວ ພານິດ ພິລາວົງ