ສະຖານະການນ້ຳຖ້ວມຢູ່ເມືອງຈຳພອນ ແຂວງສະຫວັນນະເຂດຍັງໜ້າເປັນຫ່ວງ, ທ່ານ ຄຳລຸຍ ຍາດຕິວົງ ເຈົ້າເມືອງໆຈຳພອນ ແຂວງສະຫວັນນະເຂດ ກ່າວວ່າ: ສະຖານະການນ້ຳ ຖ້ວມເມືອງຈຳພອນມາຮອດວັນທີ 8 ກັນຍາຜ່ານມາ ນ້ຳໄດ້ຍື່ງ ຂຶ້ນຖ້ວມ 17 ບ້ານ, ໃນນັ້ນ 12 ບ້ານຖືກຕັດຂາດລວມທັງເຂດເທດສະບານເມືອງ (ບ້ານ ແກ້ງກອກທົ່ງ, ທ່າລວມ, ທັງ ຕະຫຼາດເມືອງ) ໄດ້ຖືກຕັດຂາດລວມທັງໝົດປະມານ 2 ພັນ ກວ່າຄອບຄົວໂດຍໄດ້ຈັດສູນ ພັກຊົ່ວຄາວໄວ້ 2 ແຫ່ງຄື: ຫ້ອງວ່າການປົກຄອງເມືອງຫຼັງເກົ່າ ແລະ ຫ້ອງວ່າການປົກຄອງ ເມືອງຫຼັງປັດຈຸບັນ, ແຕ່ປະຊາຊົນສ່ວນໃຫຍ່ຍ້າຍໄປຢູ່ນຳຍາດຕິພີ່ນ້ອງ ແລະ ຄົນຮູ້ຈັກ, ມີ ແຕ່ເຄື່ອງຂອງ ແລະ ສັດລ້ຽງທີ່ຍ້າຍມາໄວ້ສູນພັກຊົ່ວຄາວ ໂດຍມີເຈົ້າໜ້າທີ່ເວນຍາມຕະ ຫຼອດ 24 ຊົ່ວໂມງ. ທ່ານກ່າວອີກວ່າ: ການຍົກຍ້າຍປະຊາຊົນທີ່ຖືກນ້ຳຖ້ວມ ໂດຍສະເພາະ ແມ່ນເຂດເທດສະບານເມືອງໄດ້ເລີ່ມຍົກຍ້າຍມາແຕ່ຄືນວັນທີ 6 ກັນ ຍາເປັນຕົ້ນມາ, ຈົນ ມາຮອດຕອນຄ່ຳຂອງວັນທີ 8 ກັນຍາກໍຍັງມີປະຊາຊົນຮ້ອງຂໍຊ່ວຍເຫຼືອຍົກຍ້າຍ ໂດຍສະ ເພາະແມ່ນເຄື່ອງຂອງ ແລະ ສັດລ້ຽງໂດຍມີທະຫານແຂວງ, ເມືອງ, ຕຳຫຼວດແຂວງ, ເມືອງ, ຊາວໜຸ່ມຕະລຸມບອນຈາກແຂວງລວມທັງອາສາສະໝັກຕ່າງໆໄດ້ຊ່ວຍກັນຍົກຍ້າຍ.

ການຍົກຍ້າຍເຄື່ອງຂອງແລະ ສັດລ້ຽງຂອງປະຊາຊົນອາດຈະແກ່ຍາວໄປອີກ 2-3 ວັນຫາກ ນ້ຳຍັງສືບຕໍ່ເພີ່ມຂຶ້ນໂດຍສະເພາະແມ່ນປະຊາຊົນຢູ່ເຂດທີ່ຢູ່ນອກເທດສະບານທີ່ຕ້ອງການຍົກຍ້າຍ, ໃນຂະນະທີ່ຄວາມຕ້ອງການ ການຊ່ວຍເຫຼືອເລັ່ງດ່ວນແມ່ນນ້ຳດື່ມແລະອາຫານ ແຫ້ງ. ນ້ຳຖ້ວມຄັ້ງນີ້ ຖືວ່າເປັນຄັ້ງຮ້າຍແຮງທີ່ສຸດໃນຮອບກວ່າ 40 ປີ ຊຶ່ງກວມເອົາປະມານ 10 ພັນເຮັກຕາ, ສ່ວນເຂດຢູ່ໄກທີ່ສຸດ ນັ່ງເຮືອແຕ່ບ້ານແກ້ງກອກທົ່ງເຂົ້າໄປຫາໃຊ້ເວລາ ກວ່າຊົ່ວໂມງ ຈຶ່ງເຂົ້າໄປເຖິງ, ໃນຂະນະທີ່ຈຸດຖ້ວມເລິກທີ່ສຸດສູງເຖິງ 4 ແມັດ ໂດຍສະເພາະ ເຂດແຄມນ້ຳເຊ, ສ່ວນຢູ່ເຂດເທດສະບານເມືອງບາງບ່ອນສູງປະມານ 2 ແມັດ.

ທ່ານເຈົ້າເມືອງກ່າວອີກວ່າ: ນ້ຳທີ່ຍື່ງຂຶ້ນຖ້ວມເມືອງຈຳພອນຄັ້ງນີ້ ແມ່ນນ້ຳເຊບັ້ງຫຽງທີ່ມີ ມວນນ້ຳມາຈາກປະເທດໃກ້ຄຽງ, ໄຫຼຜ່ານເຊໂປນ, ເມືອງພີນກ່ອນຈະມາເຖິງເມືອງຈຳ ພອນເຮັດໃຫ້ນ້ຳເຊບັ້ງຫຽງຍູ້ນ້ຳເຊຈຳພອນຍື່ງຂຶ້ນຖ້ວມບ້ານເຮືອນປະຊາຊົນຈຳນວນ 17 ບ້ານ, ສ່ວນເນື້ອທີ່ການຜະລິດກວມເອົາ 59 ບ້ານແຕ່ຍັງບໍ່ສາມາດປະເມີນຜົນກະທົບໄດ້.