ໃນຕອນເຊົ້າວັນທີ 11 ກັນຍາ 2019 ອົງການແນວລາວສ້າງຊາດ, ອົງການຈັດຕັ້ງມະຫາຊົນ ແລະ ສະຫະພັນນັກຮົບເກົ່າ ນຳໂດຍທ່ານ ສົມເພັດ ອິນທະທິລາດ ປະທານແນວລາວສ້າງຊາດແຂວງ ໄດ້ລົງຢ້ຽມຢາມ ແລະ ມອບເຄື່ອງອຸປະໂພກ,ບໍລິໂພກ ໃຫ້ຄົນເຈັບທີ່ນອນປິ່ນປົວຢູ່ໂຮງໝໍແຂວງສະຫວັນນະເຂດ ໂດຍການຕ້ອນຮັບຂອງທ່ານ ນາງ ພູວິໄລ ແກ້ວມຸງຄຸນ ຜູ້ອຳນວຍການໂຮງໝໍແຂວງສະຫວັນນະເຂດ ພ້ອມດ້ວຍພະນັກງານແພດໝໍໃຫ້ການຕ້ອນຮັບຢ່າງອົບອຸ່ນ.

ໃນໂອກາດຕ້້ອນຮັບການລົງຢ້ຽມຢາມ ຄັ້ງນີ້ທ່ານນາງ ພູວິໄລ ແກ້ວມຸງຄຸນ ກໍ່ໄດ້ລາຍງານການເຄື່ອນໄຫວຂອງໂຮງໝໍແຂວງສະຫວັນນະເຂດ ໂດຍຖືວິໄສທັດທີ່ວ່າ ໂຮງໝໍແຂວງສະຫວັນນະເຂດ ເປັນໂຮງໝໍກຳລັງພັດທະນາເພື່ອກ້າວສູ້ຄຸນນະພາບ 5 ດີ 1 ພໍໃຈ ມີມາດຕະຖານດ້ານການແພດ ການບໍລິການ ບໍລິຫານດີ ມີປະສິດທິພາບ ໃຊ້ເຕັກໂນໂລຊີທີ່ທັນສະໄໝ ເປັນສູນກາງແຫ່ງການຮຽນຮູ້ ພະນັກງານແພດເຮັດວຽກຢ່າງມີຄວາມສຸກ. ສ່ວນສະພາບໄຂ້ຍຸງລາຍໃນປັດຈຸບັນຢູ່ແຂວງສະຫວັນນະເຂດ ມີຈຳນວນຜູ້ຕິດເຊື້ອທັງໝົດ 5.413 ຄົນ ກວມເອົາ 596 ບ້ານ ສໍາລັບໂຮງໝໍແຂວງມີຄົນເຈັບໄຂ້ຍຸງລາຍ 2.593 ຄົນ ເສຍຊີວິດ 20 ຄົນ, ເດັກ 9 ຄົນ. ສຳລັບເດັກທີ່ມານອນປິ່ນປົວຢູ່ໂຮງໝໍມີ 1.039 ຄົນ ແລະ ຜູ້ໃຫຍ່ 1.564 ຄົນ

ໂອກາດນີ້ທ່ານ ສົມເພັດ ອິນທະທິລາດ ກໍ່ໄດ້ໂອລົມພະນັກງານແພດໝໍ ໃຫ້ເອົາໃຈໃສ່ໃນການປິ່ນປົວຄົນເຈັບ ພ້ອມກັນສະກັດກັ້ນພະຍາດໄຂ້ຍຸງລາຍບໍ່ໃຫ້ມັນລະບາດໜັກໄປກວ່າເກົ່າ ນອກນັ້ນ ອົງການຈັດຕັ້ງທີ່ກ່ຽວຂ້ອງກໍ່ໄດ້ຊ່ວຍກັນໃນການປຸກລະດົມທຶນຈາກນັກທຸລະກິດ, ສຳນັກງານຕ່າງໆເພື່ອເປັນແຫຼ່ງທຶນ ປະກອບສ່ວນເຂົ້າໃນການຊື້ອຸປະກອນການແພດ, ຕຽງນອນຄົນເຈັບທີ່ເຫັນວ່າຍັງບໍພຽງພໍກັບຄວາມຕ້ອງການຂອງຄົນເຈັບທີ່ມານອນປິ່ນປົວຢູ່ໂຮງໝໍແຂວງສະຫວັນນະເຂດ ຈາກນັ້ນທັງ 4 ອົງການຈັດຕັ້ງແນວລາວສ້າງຊາດ, ຊາວໜຸ່ມ, ສະຫະພັນແມ່ຍິງ ແລະ ສະຫະພັນນັກຮົບເກົ່າ ກໍ່ໄດ້ລົງຢ້ຽມຢາມຄົນເຈັບທີ່ນອນປິ່ນປົວຢູ່ໂຮງໝໍແຂວງ ພ້ອມທັງມອບເຄື່ອງອຸປະໂພກ ແລະ ບໍລິໂພກໃຫ້ຄົນເຈັບ ລວມມູນຄ່າ 7.300.000 ກວ່າກີບ. ຈາກນັ້ນ ກໍ່ໄດ້ເດີນທາງລົງຢ້ຽມຢາມຄົນເຈັບທີ່ນອນປິ່ນປົວຢູ່ໂຮງໝໍທະຫານແຂວງສະຫວັນນະເຂດ ພ້ອມທັງນຳເອົາເຄື່ອງໄປມອບໃຫ້ຄົນເຈັບທີ່ນອນປິ່ນປົວຢູ່ໂຮງໝໍທະຫານແຂວງ ເຊິ່ງປະກອບມີ ນ້ຳດື່ມ, ໝີ່ສຳເລັດຮູບ, ອາຫານແຫ້ງ ລວມມູນຄ່າ 2.820.000 ກີບ. ເຄື່ອງທີ່ນໍາມາມອບໃນຄັ້ງນີ້ແມ່ນໄດ້ຈາກການປະກອບສ່ວນຂອງສະມາຊິກ ຊາວໝຸ່ມແຂວງ, ສະຫະພັນແມ່ຍິງແຂວງ, ແນວລາວສ້າງຊາດແຂວງ ແລະ ສະຫະພັນນັກຮົບເກົ່າແຂວງ.

ພາບ-ຂ່າວ: ວິທະຍຸກະຈາຍສຽງ ສະຫວັນນະເຂດ