ພະນັກງານແພດທະຫານ ໂຮງຫມໍບໍລິເວນ109 ແຂວງສາລະວັນ ເອົາໃຈໃສ່ດ້ວຍຈັນຍາບັນແພດປະຕິວັດ ເພື່ອຮັບປະກັນການກວດ ແລະ ປິ່ນປົວ ຄົນເຈັບ ກໍຄື ພໍ່ແມ່ປະຊາຊົນ ຜູ້ປະສົບໄພນ້ໍາຖ້ວມຢູ່ ເມືອງຄົງເຊໂດນ ແຂວງ ສາລະວັນ ໃຫ້ ວ່ອງໄວທັນການ ແລະ ມີປະສິດທິພາບ, ພໍ່ແມ່ປະຊາຊົນ 5 ພັນກວ່າຄົນ ທີ່ຖືກອົບພະຍົກຈາກເຫດການໄພພິບັດນ້ໍາຖ້ວມ ຢູ່ເມືອງຄົງເຊໂດນ ເຂົ້າສູ່ສູນພັກສຸກເສີນຕາມຈຸດຕ່າງໆ ແລະໄດ້ຮັບການ ຮັກສາປິ່ນປົວດ້ານສຸຂະພາບ ເພື່ອເຮັດໃຫ້ພວກເພີ່ນຫາຍດີຈາກການໄດ້ຮັບບາດເຈັບ ແລະ ຕິດເຊື້ອພະຍາດຕ່າງໆ ກັບມາມີສຸຂະ ພາບແຂງແຮງສາມາດດໍາລົງຊີວິດໄດ້ເປັນປົກກະຕິ. ມາ ຮອດປັດຈຸບັນ ຜູ້ປະສົບໄພດັ່ງກ່າວໄດ້ກັບຄືນສູ່ພູມລໍາເນົາຂອງຕົນເອງດ້ວຍຄວາມປອດໄພ ແລະ ມີສຸຂະພາບແຂງ ແຮງດີ ເປັນສ່ວນຫລາຍ.

ສະຫາຍ ພັນໂທ ສຸພານິມິດ ອິນທະຜົນ ຫົວຫນ້າຮັບຜິດ ຊອບ ທີມງານແພດ ປະຈໍາຢູ່ສູນພັກສຸກເສີນ ສໍານັກງານປົກຄອງເມືອງຄົງເຊໂດນ ຈາກໂຮງຫມໍບໍລິເວນ 109 ແຂວງ ສາລະວັນ ໃຫ້ສໍາພາດວ່າ: ໂດຍປະຕິບັດຕາມຄໍາສັ່ງຈາກກົມເສນາຮັກ ກົມໃຫຍ່ພະລາທິການ ກອງທັບ ໃຫ້ຮີບຮ້ອນລົງໃຫ້ການບໍລິການປິ່ນປົວ ດ້ານສຸຂະພາບໃຫ້ແກ່ພໍ່ແມ່ປະຊາຊົນ ຜູ້ປະສົບໄພນ້ໍາຖ້ວມຢ່າງຫນັກຫນ່ວງ ຢູ່ສູນພັກສຸກເສີນຕາມແຕ່ລະຈຸດ ຂອງເມືອງຄົງເຊໂດນ ແຂວງສາລະວັນ ເຮັດໃຫ້ຊັບສິນຖືກເສຍຫາຍ,ຊີວິດການເປັນຢູ່ພົບຄວາມຫຍຸ້ງຍາກລໍາບາກ ແລະ ປະເຊີນກັບພະຍາດລະບາດຕ່າງໆທີ່ເກີດຂຶ້ນ.ດັ່ງນັ້ນ,ເພື່ອຮັບປະກັນດ້ານສຸຂະພາບໃຫ້ພໍ່ແມ່ປະຊົນໄດ້ຮັບການປິ່ນປົວ ຢ່າງວ່ອງໄວທັນການ ແລະ ມີປະສິດທິພາບ, ຄະນະພັກ-ຄະນະບັນຊາໂຮງຫມໍ ບໍລິເວນ 109 ຈຶ່ງໄດ້ຈັດຕັ້ງກໍາລັງແພດຫມໍ ລົງບໍລິການປິ່ນປົວດ້ານ ສຸຂະພາບໃຫ້ແກ່ພໍ່ແມ່ປະຊາຊົນ ຢູ່ສູນພັກສຸກເສີນຕາມແຕ່ລະຈຸດ ຢ່າງຮີບດ່ວນ ໂດຍໄດ້ເລັ່ງໃສ່ປິ່ນປົວ , ແຈກຢາຍຢາ ແລະ ປ້ອງກັນພະຍາດ ໃຫ້ຄໍາແນະນໍາ ການກິນ,ການຢູ່ຖືກກັບຫລັກອະນະໄມ ,ພ້ອມນີ້ຍັງໄດ້ອະນາໄມເຮັດຄວາມສະອາດສະຖານທີ່ສູນພັກສຸກເສີນຕາມແຕ່ລະຈຸດໃຫ້ປັດສະຈາກເຊື້ອພະຍາດຕ່າງໆທີ່ຈະເກີດຂຶ້ນ.

ສະຫາຍ ພັນໂທ ສຸພານິມິດ ອິນທະຜົນ ກ່າວຕື່ມວ່າ: ສະເພາະຢູ່ສູນພັກສຸກເສີນສໍານັກງານປົກຄອງເມືອງ ຄົງເຊໂດນ ມີປະຊາຊົນຈໍານວນ 3.000 ກວ່າຊີວິດໄດ້ຮັບຜົນກະທົບທາງດ້ານຈິດໃຈ ແລະ ສຸຂະພາບ.ຕໍ່ສະພາບການແນວນັ້ນ,ກໍາລັງອ້າຍນ້ອງແພດຫມໍຈໍານວນ 23 ສະຫາຍທີ່ປະຈໍາການຢູ່ຈຸດດັ່ງກ່າວ ຕະຫລອດ 24 ຊົ່ວໂມງ ໄດ້ສຸມທຸກເຫື່ອແຮງເລັ່ງໃສ່ການປິ່ນປົວປະຊາຊົນຜູ້ທີ່ໄດ້ຮັບເຊື້ອພະຍາດຕ່າງໆເປັນຕົ້ນ: ພະຍາດຕີນເປື່ອຍ, ຖອກທ້ອງ, ໄຂ້ຫວັດ ແລະ ອື່ນໆ. ໄດ້ຈໍານວນ 600 ກວ່າຄົນ , ແຈກຢາຍຢາປິ່ວປົວສຸຂະພາບ ແລະ ຢາບໍາລຸງຮ່າງກາຍ ເຮັດໃຫ້ສຸຂະພາບຂອງພວກເພີ່ນແຂງແຮງຂຶ້ນຕາມລໍາດັບ.ມາຮອດປັດຈຸບັນຜູ້ປະສົບໄພດັ່ງກ່າວໄດ້ຍົກຍ້າຍກັບຄືນສູ່ພູມລໍາເນົາຕົນເອງທັງຫມົດແລ້ວດ້ວຍຄວາມປອດໄພ.ເຖີງຢ່າງໄດ້ກໍຕາມພະງານແພດຫມໍພວກເຮົາຍັງຈະສືບຕໍ່ເຄື່ອນໄຫວໃຫ້ບໍ່ລິການປິ່ນປົວພໍ່ແມ່ປະຊາຊົນຕາມແຕ່ລະຈຸດເຂດບ້ານໃຫ້ພົ້ນຈາກໂລກໄພໄຂ້ເຈັບ ສາມາດ ດໍາລົງຊີວິດໄດ້ຕາມປົກກະຕິ.

ໂດຍ: ໂຊເລ້