ແຂວງຊຽງຂວາງ ຈັດກອງປະຊຸມວິສາມັນ ຄັ້ງທີ IV ຂອງຄະນະຮັບຜິດຊອບລະດັບຊາດ ຈັດ ງານມະຫະກໍາກິລາແຫ່ງຊາດ ຄັ້ງທີ XI ຂຶ້ນໃນວັນທີ 6 ກັນຍານີ້ ທີ່ຫ້ອງປະຊຸມຫ້ອງວ່າການ ປົກຄອງແຂວງ ພາຍໃຕ້ການເປັນປະທານຂອງທ່ານ ບຸນຕົ້ນ ຈັນທະພອນ ເຈົ້າແຂວງຊຽງ ຂວາງ ໂດຍການເຂົ້າຮ່ວມຂອງທ່ານ ນາງ ແສງເດືອນ ຫຼ້າຈັນທະບູນ ລັດ ຖະມົນຕີກະຊວງ ສຶກສາທິການ ແລະ ກິລາ, ມີບັນດາທ່ານລັດ ຖະມົນຕີ, ຮອງລັດຖະມົນຕີຈາກກະຊວງທີ່ ກ່ຽວຂ້ອງ, ມີກໍາມະການ, ຄະນະກໍາມະການຮັບຜິດຊອບລະດັບຊາດຈັດງານມະຫະກໍາກິລາ ແຫ່ງຊາດຄັ້ງທີ XI ເຂົ້າຮ່ວມ.

ໃນກອງປະຊຸມຜູ້ແທນເຂົ້າຮ່ວມໄດ້ພ້ອມກັນຄົ້ນຄ້ວາ ຕີລາຄາປະກອບຄໍາຄິດຄໍາເຫັນໃສ່ ບັນດາໜ້າວຽກທີ່ສໍາຄັນໃຫ້ແກ່ງານມະຫະກໍາກິລາ ແຫ່ງຊາດ ຄັ້ງທີ XI ເປັນຕົ້ນແມ່ນ ຄວາມຄືບໜ້າຂອງແຕ່ລະໜ້າວຽກທີ່ສໍາເລັດ ແລະ ບໍ່ທັນສໍາເລັດ, ການປັບປຸງຄະນະຮັບ ຜິດຊອບບາງອະນຸກໍາມະການ, ຄວາມກຽມພ້ອມຂອງແຕ່ລະໜ້າວຽກກໍາມະການເຕັກນິກ, ກໍາມະການເປີດ-ປິດ, ກໍາມະການປ້ອງກັນຊາດ-ປ້ອງກັນຄວາມສະຫງົບ, ກໍາມະການເສດຖະກິດ-ລະດົມທຶນ ແລະ ໜ້າວຽກສໍາຄັນອື່ນໆທີ່ປິ່ນອ້ອມ.

ພ້ອມດຽວກັນນີ້ ຜູ້ແທນ ກອງປະຊຸມຍັງໄດ້ຮັບຟັງການ ລາຍງານຄວາມຄືບໜ້າການກະ ກຽມຄວາມພ້ອມດ້ານຕ່າງໆ ໃຫ້ແກ່ງານມະຫະກໍາກິລາແຫ່ງ ຊາດ ຄັ້ງທີ XI ຈາກທ່ານ ບົວສອນ ສີນວນທອງ ຮອງເຈົ້າ ແຂວງຊຽງຂວາງວ່າ: ບາງໜ້າວຽກທີ່ສໍາເລັດ ແລະ ໃກ້ຈະສໍາເລັດ ຊຶ່ງໜ້າວຽກທີ່ສໍາເລັດແລ້ວປະກອບມີການຈັດປະມູນການປະດັບປະດາສະ ໜາມເປີດ-ປິດ, ການຈັດປະມູນຊຸດ ເຄື່ອງນຸ່ງຂອງຄະນະນໍາ ແລະ ກໍາມະການ, ຈັດປະມູນເຄື່ອງບ່ອນນອນຮັບໃຊ້ແກ່ຄູຝຶກ ແລະ ນັກກິລາ, ຈັດປະມູນເຄື່ອງຮັບໃຊ້ຄົງທີ່ ຫ້ອງການເຊັ່ນວ່າ: ຄອມພິວເຕີ, ປຣິນເຕີ… ແລະ ການຈັດການປະມູນເຄື່ອງຮັບໃຊ້ຫ້ອງ ການສໍາລັບພື້ນຖານໂຄງລ່າງທາງດ້ານສະໜາມກິລາ, ສະໜາມກິລາ ເປີດ-ປິດ ສໍາເລັດ ແລ້ວ 99%, ສະໜາມເຕະບານຕັ້ງຢູ່ບ້ານໂພນມີໄຊ ສໍາເລັດ 100%, ສະໜາມກັອຟສໍາ ເລັດ 100%, ສະໜາມກິລາໂບລິ້ງ ສໍາເລັດ 100%, ສະໜາມກິລາສະໜຸກເກີ ສໍາເລັດ 100%, ບູລະນະສ້ອມແປງບັນດາສະໂມສອນຂອງພະແນກການ, ກົມກອງ ແລະ ສະຖານທີ່ ຕ່າງໆຈໍານວນ 11 ແຫ່ງ ທີ່ໃຊ້ເປັນສະໜາມ ແຂ່ງຂັນກິລາປະເພດຕ່າງໆ ພ້ອມກັບການ ສ້ອມແປງໂຮງຮຽນເປັນທີ່ພັກຂອງນັກກິລາ ແລະ ຄູຝຶກ 27 ແຫ່ງ, ກໍ່ສ້າງເສັ້ນທາງເຊື່ອມ ຈອດເຂົ້າສູ່ສະໜາມເປີດ-ປິດ ສໍາເລັດ 100%, ຕິດຕັ້ງລະບົບນໍ້າປະປາເຂົ້າສູ່ສະໜາມສໍາ ເລັດ 100% ແລະ ປູກຕົ້ນໄມ້ປະດັບປະດາຕາມສອງຟາກທາງເຂົ້າຫາສະ ໜາມກິລາເປີດ- ປິດສໍາເລັດໂດຍພື້ນຖານ ສໍາລັບວຽກທີ່ຍັງຈະໄດ້ສືບຕໍ່ກໍ່ສ້າງໃນຕໍ່ໜ້າກໍຄື: ສະໜາມກິລາ ບານສົ່ງໃນຮົ່ມ, ສະໜາມກິລາຍິງປືນ, ສະໜາມກິລາບານບ້ວງ, ສະໜາມກິລາເທັນນິສ, ສູນຝຶກ ຫຼື ຫໍພັກນັກກິລາ ແລະ ລະບົບຕາຂ່າຍໄຟຟ້າເຂົ້າສະໜາມກິລາ ເປີດ-ປິດ.

ໃນໂອກາດນີ້, ທ່ານລັດຖະມົນຕີກະຊວງສຶກສາທິການ ແລະ ກິລາ ໄດ້ໂອ້ລົມຕໍ່ກອງປະຊຸມ ຊຶ່ງທ່ານໄດ້ເນັ້ນໃຫ້ຄະນະກໍາມະການຮັບຜິດຊອບທຸກຂັ້ນ ຈົ່ງສືບຕໍ່ປະຕິບັດໜ້າທີ່ດ້ວຍ ຄວາມຮັບຜິດຊອບຕື່ມເພື່ອໃຫ້ທັນກັບເວລາ, ເຮັດແນວໃດໃຫ້ງານມະຫະກໍາກິລາແຫ່ງ ຊາດ ຄັ້ງທີ XI ດໍາເນີນໄປດ້ວຍບັນຍາກາດຄຶກຄື້ນມ່ວນຊື່ນ, ມີຄວາມໝາຍ ແລະ ປະສົບ ຜົນສໍາເລັດຢ່າງຈົບງາມ.