ໃນຕອນບ່າຍວັນທີ 11/9/2019, ທີ່​ໂຮງງານເບຍລາວແຂວງຈຳປາສັກ, ບໍລິສັດ​ ເບຍລາວ​ ໄດ້ມອບທຶນສົມທົບຊ່ວຍເຫຼືອຟື້ນຟູໄພພິບັດນໍ້າຖ້ວມໃຫ້ 4 ແຂວງ​ພາກໃຕ້ລວມມູນຄ່າທັງໝົດ 500 ລ້ານກີບ,​ ໃນນັ້ນ​ ໃຫ້​ແຂວງຈຳປາສັກ​ 200​ ລ້ານກີບ.​ ມອບໂດຍທ່ານ ສູນທອນ ສີລິສັກ ຮອງຜູ້ອຳນວຍການໃຫຍ່​ ບໍລິສັດ​ ເບຍລາວ, ຮັບໂດຍ ທ່ານຄຳໄສ ໝື່ນຫຼວງ ຫົວໜ້າພະແນກແຮງງານ ແລະ ສະຫວັດດີການສັງຄົມແຂວງ, ຮອງ​ປະທານ​ຄະນະກຳມະການປ້ອງກັນ, ຄວບຄຸມ ແລະ ຟື້ນຟູໄພພິບັດແຂວງຈຳປາສັກ, ຈາກນີ້ກໍມອບໃຫ້ແຂວງສາລະວັນ 120 ລ້ານກີບ, ອັດຕະປື 100 ລ້ານກີບ ແລະ ແຂວງເຊກອງ 80 ລ້ານກີບ.
ເຂົ້າຮ່ວມຮັບມີປະທານ​-ຮອງປະທານຄະນະກຳມະການປ້ອງກັນ​, ຄວບຄຸມ​ ແລະຟື້ນຟູໄພພິບັດ​ຂັ້ນແຂວງ​ ແຕ່ລະແຂວງ, ມີການນຳຈາກ​ພາກສ່ວນ​ທີ່​ກ່ຽວຂ້ອງ​ຂອງແຂວງ​ 4 ແຂວງ​ພາກໃຕ້​ ແລະ​ ໂຮງງານເບຍລາວ​ແຂວງ​ຈຳປາສັກ​ ເຂົ້າຮ່ວມເປັນສັກຂີພະຍານ.