ກອງອາສາສະໝັກຊາວໜຸ່ມຕະລຸມບອນ ໄດ້ຮ່ວມໃຈລົງຊ່ວຍເຫລືອຜູ້ປະສົບໄພພິບັດນໍ້າ ຖ້ວມ ຢູ່ 6 ແຂວງພາກກາງ ແລະ ພາກໃຕ້ ເຊິ່ງນໍາພາທີມງານໂດຍທ່ານ ອາລຸນໄຊ ສູນນະ ລາດ ກໍາມະການສໍາຮອງສູນກາງພັກ ສະມາຊິກສະພາແຫ່ງຊາດ ເລຂາຄະນະບໍລິຫານງານ ສູນກາງຊາວໜຸ່ມປະຊາຊົນ ປະຕິວັດລາວ ແລະ ທ່ານ ບຸນຕາ ເທບພະວົງ ຮອງເລຂາຄະນະ ບໍລິຫານງານສູນກາງຊາວໜຸ່ມ ປະຊາຊົນ ປະຕິວັດລາວ ພ້ອມດ້ວຍຄະນະ.ພ້ອມທັງໄດ້ນໍາ ເອົາວັດຖຸປັດໃຈ ລົງໄປຊ່ວຍຜູ້ປະສົບໄພນໍ້າຖ້ວມເຊັ່ນ: ເຂົ້າສານ 6 ໂຕນ, ເຮືອ 6 ລໍາ, ນໍ້າ ດື່ມ, ໝີ່, ປ໋ອງປາ ແລະ ເຄື່ອງຫນຸ່ງຈໍານວນໜຶ່ງ ລວມມູນຄ່າ 100 ລ້ານ ກວ່າກີບ (ໃນນີ້ມີ ເງິນສົດ 18 ລ້ານກີບ).

ພ້ອມດຽວກັນນີ້ ຢູ່ແຕ່ລະແຂວງກໍໄດ້ມີກໍາກອງອາສາສະໝັກຊາວໜຸ່ມຕະລຸມບອນ ຫຼາຍ ສາຂາອາຊີບເຂົ້າໄປຊ່ວຍ. ເລີ່ມໄປແຕ່ວັນທີ 7-11/9/2019 ມີກໍາລັງຊ່າວໜຸ່ມອາສາສະໝັກ ລົງຊ່ວຍປະຊາຊົນຜູ້ໄດ້ຮັບຜົນກະທົບຈາກໄພນໍ້າຖ້ວມ: ສຳລັບຢູ່ແຂວງຄໍາມ່ວນ ມີ 3.892 ຄົນ, ແຂວງສະຫວັນນາເຂດ 1.050 ຄົນ, ແຂວງສາລະວັນ 2.286 ຄົນ, ແຂວງເຊກອງ 595 ຄົນ, ແຂວງອັດຕະປື 931 ຄົນ ແລະ ແຂວງຈໍາປາສັກ 1.800 ຄົນ, ລວມທັງໝົດ 10.554 ຄົນ; ນອກຈາກນີ້ ສູນກາງຊາວຫນຸ່ມ ຍັງໄດ້ປຸກລະດົມຕາມສາຍຕັ້ງຊາວຫນຸ່ມທີ່ຢູ່ໃນກໍາລັງ ປກສ ແລະ ປກຊ ຈໍານວນຫລວງຫລາຍເຂົ້າຮ່ວມ.