ເມືອງໜອງບົກແມ່ນໜຶ່ງໃນບັນດາ 6 ເມືອງຂອງ ແຂວງຄຳມ່ວນທີ່ໄດ້ຮັບຜົນກະທົບຈາກໄພທຳມະຊາດ ນ້ຳ ຖ້ວມຫຼາຍພໍສົມຄວນ ເຊິ່ງເຮັດໃຫ້ເຮືອນຊານບ້ານຊ່ອງ, ຖະໜົນຫົນທາງ, ເນື້ອທີ່ທຳການຜະລິດ, ສັດສາວາສິ່ງຂອງ ປະຊາຊົນ ລວມເຖິງພື້ນຖານໂຄງລ່າງອື່ນໆກໍ່ໄດ້ຮັບຜົນກະທົບໄປຕາມໆກັນ.
ກອງເລຂາຄະນະກຳມະການປ້ອງກັນ ແລະ ຄວບຄຸມໄພພິບັດຂັ້ນເມືອງໜອງບົກ ລາຍງາຍວັນທີ 12 ກັນຍາ 2019 ໃຫ້ຮູ້ວ່າ: ເນື່ອງຈາກສະພາບຝົນຕົກຕິດຕໍ່ກັນຫຼາຍວັນ ລວມເຖິງພາຍຸຕ່າງໆທີ່ໄດ້ພັດຜ່ານເຂົ້າມາ ເຮັດໃຫ້ນ້ຳປ່າ ໄຫຼລົງຫ້ວຍຮ່ອງຜ່ານລົງສູ່ແມ່ນ້ຳສາຍຫຼັກໃນເຂດເມືອງໜອງບົກຄື:

ແມ່ນ້ຳເຊບັ້ງໄຟ ເຮັດໃຫ້ລະດັບນ້ຳເພີ່ມສູງຂຶ້ນຢ່າງ ໄວວາ ແລະ ໄດ້ລົ້ນຝັ່ງໄຫຼເຂົ້າຖ້ວມເນື້ອທີ່ທຳການຜະລິດ ແລະ ເຮືອນຊານຂອງພໍ່ແມ່ປະຊາຊົນ ເລີ່ມແຕ່ວັນທີ 3 ກັນຍາ ເປັນຕົ້ນມາ. ປະຊາຊົນຈຳນວນ 11 ບ້ານ, ມີ 540 ຄອບຄົວ ແລະ ພົນລະເມືອງ 1.893 ຄົນໄດ້ຮັບຜົນ ກະທົບເຊັ່ນ: ບ້ານສອງເໝືອນໃຕ້, ສອງເໝືອງເໜືອ, ນ້ຳພຸ, ສອກເບາະ, ນາໃຕ້, ຜັກອີ່ຕູ່, ຫາດຊຽງດີ, ດົງສະຫງໍາ, ປົ່ງກິ່ວ, ໜອງສະພັງທົ່ງ ແລະ ຫາດຊາຍຟອງ ໃນນີ້ບ້ານຖືກຖ້ວມ 100% ມີບ້ານສອກເບາະ, ນ້ຳພຸ ແລະ ດົງສະຫງຳ. ສຳລັບດ້ານພື້ນຖານໂຄງລ່າງເປັນຕົ້ນເສັ້ນທາງຖືກນໍ້າຖ້ວມມີ 11 ເສັ້ນ, ມີ 14 ຈຸດ ແລະ ມີຄວາມຍາວ 9,2 ກິໂລແມັດ, ມີຕາຝັ່ງເຈື່ອນເຂດບ້ານດ່ານປາກເຊ ກວ້າງ 5-7 ແມັດ, ຍາວ 800 ແມັດ ແລະ ມີຈຳນວນ 25 ຫຼັງຄາເຮືອນໃນເຂດດັ່ງກ່າວທີ່ມີຄວາມສ່ຽງຕໍ່ການເຊາະເຈື່ອນ, ສ່ວນດ້ານເນື້ອທີ່ທຳການຜະລິດ ມີເນື້ອທີ່ນາທີ່ຖືກຖ້ວມ 6.215 ເຮັກຕາ ກວມຢູ່ໃນ 51 ບ້ານ, ຊົນລະປະທານ 11 ແຫ່ງ, ປະເພດສັດຕາຍມີ ຄວາຍ 33 ໂຕ, ງົວ 223 ໂຕ, ແບ້ 43 ໂຕ, ໝູ 35 ໂຕ, ສັດປີກ 784 ໂຕ ແລະ ໜອງປາ 94 ໜອງ,

ດ້ານການສຶກສານ້ຳໄດ້ໄຫຼເຂົ້າຖ້ວມພື້ນທີ່ ເດີ່ນໂຮງຮຽນ ແລ້ວ 3 ແຫ່ງຄື: ໂຮງຮຽນມູນລະປະຖົມສອກເບາະ, ປະຖົມສົມບູນນາໃຕ້ ແລະ ມູນລະປະຖົມ ຫາດຊາຍຟອງ, ມີນັກຮຽນທີ່ເດີນທາງໄປຮຽນຢູ່ໂຮງຮຽນບ້ານອື່ນທີ່ບໍ່ສາມາດມາເຂົ້າໂຮງຮຽນໄດ້ຈຳນວນ 14 ບ້ານ ແລະ ປະຈຸບັນໄດ້ ຢຸດການຮຽນຊົ່ວຄາວແລ້ວຈຳນວນ 11 ແຫ່ງ. ສ່ວນລະດັບນ້ຳເຊທີ່ຫຼາວັດແທກບ້ານຊອກເບາະ ໃນວັນທີ 12 ກັນຍາ ແມ່ນມີລະດັບຫຼຸດລົງເລັກໜ້ອຍ ເມື່ອທຽບກັບມື້ກ່ອນໜ້ານີ້ ຢູ່ທີ່ 15,24 ແມັດ ຫຼຸດລົງ 0,04 ແມັດ ຈາກມື້ທີ່ຜ່ານມາ 15,28 ແມັດ ສຳລັບເຂດອັນຕະລາຍແມ່ນຢູ່ທີ່ 14,50 ແມັດ.
ສຳລັບແຜນຄວາມຕ້ອງການທາງດ້ານອຸປະກອນ, ເຄື່ອງອຸປະໂພກ-ບໍລິໂພກທີ່ຈຳເປັນໃນປະຈຸບັນປະກອບມີ ເຮືອຕິດຈັກ ຫຼືເຮືອພາຍ, ນ້ຳດື່ມ, ເຂົ້າສານ ແລະ ເຄື່ອງອຸປະໂພກ-ບໍລິໂພກອື່ນໆ, ຢາປ້ອງກັນ ແລະ ຢາປົວພະຍາດ ລວມເຖິງງົບປະມານໃນການລົງຕິດຕາມເກັບກຳຂໍ້ມູນ ແລະ ອື່ນໆ.