ດ້ວຍຄວາມເປັນຫ່ວງເປັນໄຍຂອງການນຳຂັ້ນແຂວງພ້ອມຄະນະ ທີ່ມີຕໍ່ປະຊາຊົນທີ່ໄດ້ຮັບຜົນກະທົບຈາກໄພນ້ຳຖ້ວມ ຈຶ່ງໄດ້ມີການລະດົມວັດຖຸ,ປັດໃຈນຳສັງຄົມ ແລະ ພະແນກການຕ່າງໆອ້ອມຂ້າາງແຂວງ ເພື່ອນຳມາມອບຊ່ວຍເຫຼືອ ປະຊາຊົນຜູ້ທີ່ຖືກປະສົບໄພນໍ້າຖ້ວມ ດັ່ງນັ້ນມາໃນວັນຕອນບ່າຍວັນທີ 11 ກັນຍາ 2019ນີ້ ຢູ່ທີ່ບ້ານປ່າຜັກເນົ່າເມືອງວິລະບູລີ ການນຳຂັ້ນແຂວງພ້ອມຄະນະນຳໂດຍ ທ່ານ ສັນຕິພາບ ພົມວິຫານ ເຈົ້າແຂວງສະຫວັນນະເຂດ , ສະມາຄົມນັກທຸລະກິດຍິງແຂວງ, ຄອບຄົວເຈົ້າແຂວງ ບໍລິສັດຫ້າງຮ້ານ ພ້ອມມີບັນດາການນຳເມືອງວິລະບູລີ ໄດ້ລົງມອບເຄື່ອງຊ່ວຍເຫຼືອ ໃຫ້ປະຊາຊົນ ຈຳນວນ 5 ບ້ານຂອງເມືອງວິລະບູລີ ຄື: ບ້ານ ປ່າຜັກເນົ່າ, ນາສະເລາະ, ເລົ່າຫຼວງ, ຂີ່ຄັ່ງ ແລະ ບ້ານນາຊູ.

ສຳລັບເຄື່ອງທີ່ນຳມາມອບໃນຄັ້ງນີ້ປະກອບມີເຂົ້າສານ, ນໍ້າດື່ມ ແລະ ເກືອຈຳນວນໜຶ່ງ ລວມມູນຄ່າເປັນເງິນ 44.200.000 ກີບ ໃນນັ້ນກໍ່ໄດ້ມີໂຄງການຂຸດຄົ້ນບໍ່-ທອງຄຳເຊໂປນ ມອບເຂົ້າສານ10 ໂຕນລວມມູນຄ່າເປັນເງິນ 90.000.000 ລ້ານກີບ ໃຫ້ການນໍາເມືອງວິລະບູລີ ເພື່ອຊ່ວຍເຫຼືອຜູ້ປະສົບໄພນໍ້າຖ້ວມ ຕ່າງໜ້າເປັນສັກຂີພະຍານຂອງທ່ານເຈົ້າແຂວງ , ມີບໍລິສັດ vsv ມອບຊ່ວຍເຫຼືອ 50.000.000 ກີບ, ບໍລິສັດໂຊກໄຊການຄ້າ 30.000.000 ກີບ, ສະມາຄົມຈີນປະກອບສ່ວນ ເຂົ້າສານ ແລະ ນໍ້າດື່ມ ມູນຄ່າ 5.500.000ກີບ, ຄອບຄົວການນໍາ+ສະມາຄົມນັກທຸລະກິດຍິງແຂວງ+ບໍລິສັດອິນທິຈັກ+ບໍລິສັດສະຫວັນວາລີການຄ້າ+ກຸ່ມເລດີ່ຈາກວຽງຈັນ+ຄອບຄົວທ່ານ ສຽວສະຫວາດ ຈຸນລະມຸນຕີ ປະກອບອາຫານແຫ້ງ, ຢາແດງ 382 ຊຸດ, ເຂົ້າຈີ່ປາເຕ 300 ກ້ອນ, ເຂົ້າສຸກຊີ້ນແຫ້ງ 100 ຊຸດລວມມູນຄ່າ ທັງໝົດຈາກການລະດົມແລະການປະກອບສ່ວນ ຂອງບໍລິສັດຫ້າງຮ້ານ 162. 960.000 ກີບ.

ຈາກນັ້ນທ່ານ ສັນຕິພາບ ພົມວິຫານ ເຈົ້າແຂວງສະຫວັນນະເຂດ ກໍ່ໄດ້ມີຄຳເຫັນໂອ້ລົມປະຊາຊົນພາຍໃນ 5 ບ້ານຂອງເມືອງວິລະບູລີວ່າ:ປີນີ້ແຂວງຂອງພວກເຮົາໄດ້ຮັບຜົນກະທົບໜັກຈາກໄພພິບັດທຳມະຊາດນໍ້າຖ້ວມເຮັດໃຫ້ຖືກຜົນກະທົບຈາກການຜະລິດພ້ອມທັງເຮືອນຊານບ້ານຊ່ອງເປັນຕົ້ນແມ່ນເຮືອນຊານບ້ານຊ່ອງທີ່ເມືອງວິລະບູລີ ແລະ ເມືອງອື່ນໆ ແນວໃດກໍ່ຕາມການນຳແຂວງພວກເຮົາກໍ່ໄດ້ເອົາໃຈໃສ່ ປຸກລະດົມຂົນຂວາຍ ທຸກພາກສ່ວນຂອງແຂວງ-ເມືອງ ເພື່ອມາຊ່ວຍເຫຼືອ ປະຊາຊົນຈາກໄພນໍ້າຖ້ວມ, ຖືວ່າພວກເຮົາກໍ່ໄດ້ມີການກະກຽມໃນການຕ້ານໄພພິບັດສຸດຄວາມສາມາດແລ້ວ ແຕ່ມັນກໍ່ບໍ່ສາມາດສະກັດກັ້ນໄດ້ ຕໍ່ກັບໄພທຳມະຊາດທີ່ເກີດຂຶ້ນ ເພື່ອເປັນການຊ່ວຍເຫຼືອບັນເທົາທຸກຈຶ່ງໄດ້ນຳເອົາວັດຖຸສິ່ງຂອງຕ່າງໆທີ່ລະດົມໄດ້ນຳມາມອບຊ່ວຍເຫຼືອຄອບຄົວປະຊາຊົນທີ່ ຖືກໄພພິບັດໃນຄັ້ງນີ້ພ້ອມທັງຮຽກຮ້ອງໃຫ້ປະຊາຊົນ ແລະ ອຳນາດການປົກຄອງບ້ານ-ເມືອງທຸກພາກສ່ວນຕ້ອງໄດ້ພ້ອມພຽງກັນເປັນນ້ຳເໜຶ່ງໃຈດຽວສາມັກຄີກັນ ພ້ອມກັນສູ້ຊົນເພື່ອແກ້ໄຂບັນຫາຕ່າງໆທີ່ຫຍຸ້ງຍາກໃຫ້ຜ່ານພົ້ນໄປໄດ້
ທ່ານ ທ່ານ ສັນຕິພາບ ພົມວິຫານ ເຈົ້າແຂວງສະຫວັນນະເຂດ ຍັງເວົ້າຕື່ມອີກວ່າ: ທາງແຂວງພວກເຮົາກໍ່ຍັງໄດ້ມີແຜນສືບຕໍ່ປຸກລະດົມກັນເລື້ອຍໆເພື່ອຊ່ວຍເຫຼືອຜູ້ຖືກຜົນກະທົບຈາກໄພນໍ້າຖ້ວມ ແລະ ແຜນຟື້ນຟູຄືນຫຼັງຈາກໄພພິບັດ

ຂ່າວ: ວິລັດດາ ດວງຈັນທາ