ເພື່ອເປັນການສ້າງຂະບວນການຂໍ່ານັບຮັບຕ້ອນກອງປະຊຸມໃຫຍ່ ຄັ້ງທີ່ VII ຂອງອົງຄະນະພັກເມືອງແກ່ນທ້າວທີ່ຈະໄຂຂຶ້ນໃນຕໍ່ໜ້ານີ້. ໃນວັນທີ 11 ກັນຍາ 2019 ນີ້, ພະນັກງານຢູ່ພາຍໃນເມືອງແກ່ນທ້າວ ແຂວງໄຊຍະບູລີ ຈໍານວນ 350 ກວ່າຄົນ, ຍິງ 100 ກວ່າຄົນ ໄດ້ສ້າງຂະບວນການສ້ອມແປງທາງ, ອະນາໄມເສັ້ນທາງ-ຮ່ອງນໍ້າຢູ່ພາຍໃນເທດສະບານເມືອງ ຕາມເສັ້ນທາງ ເລກທີ 3895 ແຕ່ 5 ແຍກຕະຫຼາດ ຫາ ສາມແຍກດ່ານສາກົນ ໂດຍແບ່ງອອກເປັນ 5 ໄລຍະ 6.000 ແມັດ, ໄລຍະທີ 1 ເລີ່ມແຕ່ ກມ 0+000 (ຫ້າແຍກຕະຫຼາດ) ຫາ ກມ 1+200 ມອບໃຫ້ຫ້ອງວ່າການເມືອງ, ຄະນະຈັດຕັ້ງ, ອົງການກວດກາລັດ, ພາຍໃນ, ໂຄສະນາອົບຮົມ, ປກສ, ປກຊ ແລະ ຫ້ອງການຊັບພະຍາກອນທໍາມະຊາດ ແລະ ສິ່ງແວດລ້ອມ;

ໄລຍະທີ 2 ເລີ່ມແຕ່ ກມ 1+200 ຫາ ກມ 2+400 ມອບໃຫ້ຫ້ອງການກະສິກໍາ ແລະ ປ່າໄມ້, ຍຸຕິທໍາ, ນັກຮົບເກົ່າ, ອຸດສາຫະກໍາ-ການຄ້າ, ສູນບໍລິການໄຟ້ຟ້າ ແລະ ຫ້ອງການພະລັງງານ ແລະ ບໍ່ແຮ່; ໄລຍະທີ 3 ເລີ່ມແຕ່ ກມ 2+400-ກມ 3+600 ມອບໃຫ້ຫ້ອງການສຶກສາທິການ ແລະ ກິລາ, ແຜນການ ແລະ ການລົງທຶນ, ຖະແຫຼງຂ່າວ, ວັດທະນະທໍາ ແລະ ທ່ອງທ່ຽວ, ສະຫະພັນແມ່ຍິງ ແລະ ຫ້ອງການແນວລາວສ້າງຊາດ; ໄລຍະທີ 4 ເລີ່ມແຕ່ ກມ 3+600 ຫາ ກມ 4+800 ມອບໃຫ້ຫ້ອງການສາທາລະນະສຸກ, ກາແດງ, ກໍາມະບານ, ການເງິນ, ວິທະຍາສາດ ແລະ ເຕັກໂນໂລຊີ ແລະ ຫ້ອງການຊາວໜຸ່ມ; ໄລຍະທີ 5 ເລີ່ມແຕ່ ກມ 4+800 ຫາ ກມ 6+000 ມອບໃຫ້ຫ້ອງການໂຍທາທິການ ແລະ ຂົນສົ່ງ, ນໍ້າປະປາ, ລາວໂທລະຄົມ, ແຮງງານ ແລະ ສະຫວັດດີການສັງຄົມ ແລະ ສະມາຄົມລົດໂດຍສານແກ່ນທ້າວ ໂດຍໄດ້ນໍາໃຊ້ລົດອີ່ແຕນ ຈໍານວນ 8 ຄັນ ເພື່ອຂົນດິນ, ຫີນ ແລະ ນໍາໃຊ້ແຮງງານຄົນ ສ້ອມແປງທາງທີ່ເປ່ເພ ດ້ວຍການຖົມບວກ, ຂຸມ ແລະ ອັດແໜ້ນ.
ສະເພາະບ້ານເທດສະບານ ແມ່ນມອບໃຫ້ອົງການປົກຄອງບ້ານ ນໍາພາພໍ່ແມ່ປະຊາຊົນ ສ້າງຂະບວນການສ້ອມແປງເສັ້ນທາງ, ອະນາໄມເສັ້ນທາງ-ຮ່ອງນໍ້າ ພາຍໃນຂອບເຂດບ້ານຂອງຕົນ ພ້ອມທັງປະດັບປະດາທຸງຊາດ, ທຸງພັກ ແລະ ທຸງທິວ ໃຫ້ຈົບງາມ.

ຂ່າວ – ພາບນັກຂ່າວ ເມືອງແກ່ນທ້າວ