ໃນຕອນເຊົ້າຂອງວັນທີ 12 ກັນຍາ ປີ 2019 ຢູ່ທີ່ຫ້ອງປະຊຸມຫ້ອງວ່າການເມືອງອຸທຸມພອນ ໄດ້ຈັດໃຫ້ມີ ກອງປະຊຸມ ຄົ້ນຄວ້າປຶກສາຫາລື ການຈັດຕັ້ງປະຕິບັດ ແກ້ໄຂ ປະກົດການຫຍໍ້ທໍ້ ຢູ່ຮ້ານບັນເທີງ, ຮ້ານອາຫານ, ຮ້ານກິນດື່ມ-ປີ້ງແກ້ມ ທົ່ວເມືອງຂຶ້ນ ໂດຍພາຍໃຕ້ການເຂົ້າຮ່ວມຂອງ ທ່ານ ໂພໄຊ ອິນທະວົງສາ ຮອງເຈົ້າເມືອງໆອຸທຸມພອນ, ມີບັນດາທ່ານ ຫົວໜ້າຫ້ອງການ, ຄະນະຫ້ອງການ, ພະນັກງານວິຊາການທີ່ກ່ຽວຂ້ອງ.

ຕໍ່ກອງປະຊຸມ ທ່ານ ນາງ ລຳທອງ ພູນປະກອນ ຫົວໜ້າຫ້ອງການຖະແຫຼງຂ່າວ, ວັດທະນະທຳ ແລະ ທ່ອງທ່ຽວເມືອງ ກໍ່ໄດ້ຜ່ານແຈ້ງການຂອງພະແນກ ຖວທ ແຂວງ ສະບັບເລກທີ 0749/ຖວທ.ສຂ ລົງວັນທີ 6 ພຶດສະພາ 2019 ເລື່ອງ ການຢຸດຕິ ການບໍລິການ ການສະແດງກາງແຈ້ງ ຢູ່ຮ້ານບັນເທີງ, ຮ້ານອາຫານ, ຮ້ານກິນດື່ມ-ປີ້ງແກ້ມ, ຜ່ານໜັງສືແຈ້ງຂອງພະແນກ ຖວທ ແຂວງ ສະບັບເລກທີ 1143/ຖວທ.ສຂ ລົງວັນທີ 17 ກໍລະກົດ 2019 ເລື່ອງ ການຈັດຕັ້ງປະຕິບັດ ແກ້ໄຂ ປະກົດການຫຍໍ້ທໍ້ ຢູ່ຮ້ານບັນເທີງ, ຮ້ານອາຫານ, ຮ້ານກິນດື່ມ-ປີ້ງແກ້ມ ແລະ ຜ່ານຂໍ້ຕົກລົງຂອງທ່ານເຈົ້າເມືອງໆອຸທຸມພອນ ສະບັບເລກທີ 556/ຈມ.ອທພ, ລົງວັນທີ 2 ກັນຍາ 2019 ວ່າດ້ວຍການແຕ່ງຕັ້ງຄະນະກຳະານແກ້ໄຂປະກົດການຫຍໍ້ທໍ້ ຢູ່ຮ້ານອາຫານ, ຮ້ານກິນດື່ມ-ປິ້ງແກ້ມ ແລະ ສະຖານທີ່ບັນເທີງ ທົ່ວເມືອງອຸທຸມພອນ.

ຈາກນັ້ນ ທ່ານ ໂພໄຊ ອິນທະວົງສາ ປະທານກອງປະຊຸມ ກໍ່ໄດ້ນຳພາຄົ້ນຄ້ວາແລກປ່ຽນຄວາມຮູ້ ແລະ ປະກອບຄຳຄິດຄຳເຫັນຢ່າງພາສະວິໄສ. ທັງນີ້ ກໍ່ເພື່ອເປັນການຮີບໂຮມເອົາຄໍາຄິດເຫັນ ທີ່ກໍາລັງພົບພໍ້ໃນປະຈຸບັນ ຈາກບັນດາຜູ້ເຂົ້າຮ່ວມ ທີ່ມາຈາກຂະແໜງການຕ່າງໆ ເພື່ອເປັນພື້ນຖານໃນການຈັດຕັ້ງປະຕິບັດ ແກ້ໄຂ ປະກົດການຫຍໍ້ທໍ້ ຢູ່ຮ້ານບັນເທີງ, ຮ້ານອາຫານ, ຮ້ານກິນດື່ມ-ປີ້ງແກ້ມ ຕາມແຈ້ງການຂອງພະແນກ ຖວທ ແຂວງ ສະບັບເລກທີ 0749/ຖວທ.ສຂ ລົງວັນທີ 6 ພຶດສະພາ 2019 ໃຫ້ມີປະສິດທິຜົນສູງສຸດ ແນໃສ່ໃຫ້ສະພາບສັງຄົມໃນທົ່ວເມືອງ ມີຄວາມສະຫງົບປອດໄພ ແລະ ມີຄວາມເປັນລະບຽບຮຽບຮ້ອຍປະສະຈາກປະກົດການຫຍໍ້ທໍ້ຕ່າງໆ.

ນັກຂ່າວເມືອງອຸທຸມພອນ: ພອນປະເສີດ ແຜນພັກດີ