ຊຸດຝຶກອົບຮົມທິດສະດີ ການເມືອງ-ການປົກຄອງໃຫ້ ແກ່ຄະນະພັກບ້ານ ແລະ ນາຍບ້ານ ໃນທົ່ວເມືອງຜົ້ງສາລີ ໄດ້ຈັດຂຶ້ນໃນວັນທີ 4 ກັນຍາ ແລະ ສຳເລັດລົງໃນວັນທີ 12 ກັນຍາ 2019 ນີ້, ຢູ່ທີ່ສະໂມສອນຂອງເມືອງ ໂດຍການເຂົ້າຮ່ວມເປັນປະທານ ຂອງທ່ານ ທອງສຸກ ເປົາສຸລີ ກຳມະການພັກແຂວງ, ເລຂາພັກເມືອງ, ເຈົ້າເມືອງໆຜົ້ງສາລີ, ມີທ່ານ ບົວພັນ ວໍລະຈິດ ກຳມະການພັກແຂວງ, ຜູ້ອຳນວຍການໂຮງຮຽນທິດສະດີການເມືອງ-ການປົກຄອງແຂວງ , ມີທ່ານ ສຸລິວັນ ແສນສະຕິ ກໍາມະການພັກເມືອງ ຫົວໜ້າຄະນະຈັດຕັ້ງເມືອງ ພ້ອມຄະນະທິມງານຂັ້ນແຂວງ, ຂັ້ນເມືອງ ຕະຫຼອດຮອດ ຄະນະພັກບ້ານ ແລະ ນາຍບ້ານ ໃນທົ່ວເມືອງເຂົ້າຮ່ວມ.

ທ່ານ ສຸລິວັນ ແສນສະຕິ ຫົວໜ້າຄະນະຈັດຕັ້ງເມືອງ ໄດ້ຂຶ້ນສະຫຼຸບລາຍງານຜົນສຳເລັດຂອງຊຸດຝຶກອົບຮົມໃນຄັ້ງນີ້ ເຊິ່ງໄດ້ຮັບການເອົາໃຈໃສ່ຊີ້ນຳຕິດຕາມຢ່າງໃກ້ສິດ ຈາກຄະນະນຳຂອງເມືອງ ກໍ່ຄື ຄະນະຮັບຜິດຊອບ ສາມາດເຫັນໄດ້ວ່າ ການຍົກລະດັບຄວາມຮູ້-ຄວາມສາມາດ ຂອງຄະນະພັກບ້ານ, ນາຍບ້ານ ໃນໄລຍະຝຶກອົບຮົມແມ່ນມີຄວາມຮັບຮູ້ເຂົ້າໃຈທາງດ້ານທິດສະດີການເມືອງ ແລະ ການປົກຄອງ, ແນວທາງ, ແຜນນະໂຍບາຍຂອງພັກ, ມະຕິ, ຄຳສັ່ງ, ລະບຽບກົດໝາຍຂອງລັດ ເປັນພື້ນຖານທາງດ້ານແນວຄິດທິດສະດີ ເພື່ອໄປຊີ້ນຳ-ນຳພາ ປຸກລະດົມແນວຄິດຂອງປະຊາຊົນພາຍໃນບ້ານໃຫ້ມີຄວາມສາມັກຄີເປັນເອກະພາບຢ່າງໜັກແໜ້ນ, ເປັນເຈົ້າການໃນການເຂົ້າຮ່ວມ ສ້າງສາພັດທະນາປະເທດຊາດ ກໍ່ຄື ສ້າງສາພັດທະນາບ້ານໃຫ້ມີຄວາມຖືກຕ້ອງສອດຄ່ອງຕາມທິດ 3 ສ້າງ ໂດຍສະເພາະແມ່ນການສ້າງບ້ານໃຫ້ເປັນຫົວໜ່ວຍພັດທະນາ ທັງເນັ້ນໃສ່ນຳພາສ້າງບ້ານໃຫ້ມີຄວາມສະຫງົບ, ມີຄວາມເປັນລະບຽບຮຽບຮ້ອຍ ແລະ ໃຫ້ຫຼຸດພົ້ນອອກຈາກຄວາມທຸກຍາກເທື່ອລະກ້າວ. ພ້ອມນີ້, ຍັງໄດ້ມອບໃບຢັ້ງຢືນການຝຶກອົບຮົມທິດສະດີການເມືອງ-ການປົກຄອງ ໃຫ້ແກ່ຄະນະພັກບ້ານ, ນາຍບ້ານຕື່ມອີກ.
ໃນໂອກາດນີ້, ທ່ານ ທອງສຸກ ເປົາສຸລີ ເຈົ້າເມືອງໆຜົ້ງສາລີໄດ້ມີຄຳເຫັນຊີ້ທິດໃຫ້ຄະນະພັກບ້ານ, ນາຍບ້ານທີ່ເຂົ້້າຮ່ວມຝຶກອົບຮົມໃນຄັ້ງນີ້ ຈົ່ງພ້ອມກັນເອົາໃຈໃສ່ວຽກ ງານສຶກສາອົບຮົມການເມືອງ-ແນວຄິດເປັນວຽກງານສຳຄັນ, ພ້ອມທັງ ນຳເອົາເນື້ອໃນຈິດໃຈ ເອກະສານທີ່ໄດ້ຜ່ານການຝຶກອົບຮົມ ໄປຄົ້ນຄວ້າ ນຳໃຊ້ເຂົ້າໃນວຽກງານທີ່ຕົນຮັບຜິດຊອບ ແລະ ນຳໄປຈັດຕັ້ງຜັນຂະຫຍາຍ ເຮັດໃຫ້ວຽກງານຂັ້ນບ້ານດຳເນີນໄປຢ່າງມີປະສິດທິພາບ ແລະ ປະສິດທິຜົນສູງ.

ພາບ – ຂ່າວ: ວິເສດ