ໂຮງຮຽນ ສາມັນກິນນອນຊົນເຜົ່າແຂວງສະຫວັນນະເຂດ ໄຂສົກຮຽນໃໝ່ 2019-2020

0
133

ໃນຕອນບ່າຍວັນທີ 12 ກັນຍາ 2019ນີ້ຢູ່ທີ່ສະໂມສອນໂຮງຮຽນສາມາກິນນອນຊົນເຜົ່າສະຫວັນນະເຂດ ໄດ້ຈັດພິທີໄຂສົກຮຽນໃໝ່ປະຈຳສົກຮຽນ 2019-2020 ຂຶ້ນຢ່າງເປັນທາງການໂດຍການເຂົ້າຮ່ວມຂອງທ່ານ ສົມນຶກ ໄຊສົງຄາມຮອງຫົວໜ້າຂະແໜງສາມັນສຶກສາ ຕາງໜ້າພະແນກສຶກສາທິການແລະກິລາແຂວງ, ທ່ານ ອາຈານ ສົມລິດ ອຸ່ນທະວີ ຜູ້ອຳນວຍການ ໂຮງຮຽນສາມາກິນນອນຊົນເຜົ່າ ສະຫວັນນະເຂດ ພ້ອມມີບັນດາ ຄູ-ອາຈານ ແລະ ນ້ອງນັກຮຽນເຂົ້າຮ່ວມ.

ທ່ານ ນາງ ບັນເທົາ ແກ້ວສີວິໄລ ຮອງຜູ້ອຳນວຍການໂຮງຮຽນສາມາກິນນອນຊົນເຜົ່າ ກໍ່ໄດ້ຜ່ານບົດສະຫຼຸບການເຄື່ອນໄຫວວຽກງານຕ່າງໆ ເປັນຕົ້ນວຽກພັດທະນາຫຼັກສູດ,ວຽກປັບປຸງຄຸນນະພາບການຮຽນ-ການສອນ,ວຽກບໍລິຫານຄຸ້ມຄອງການສຶກສາ,ການປັບປຸງການຈັດຕັ້ງ,ການເຄື່ອນໄຫວນອກຫຼັກສູດ ໂດຍສະເພາະ5ຫຼັກມູນຂອງການສຶກສາ,ການດູແລຊີວິດການເປັນຢູ່ຂອງນັກຮຽນ,ການຈັດຕັ້ງນະໂຍບາຍແລະອື່ນໆ, ສຳລັບວຽກການຮຽນ-ການສອນ ສົກຮຽນຜ່ານມາ ນັກຮຽນສາມາດເສັງເລື່ອນຊັ້ນແລະຈົບຂັ້ນໄດ້ຕາມຄາດໝາຍເກືອບ 100%,ຄື:ຊັ້ນມ 1 ມີນັກຮຽນ 84 ຄົນ ເສັງໄດ້ 83ຄົນ ເທົ່າກັບ 98,8%,ມໍ 2 ມີ 83ຄົນ ເສັງໄດ້ 100%,ມໍ3 77ຄົນ ເສັງໄດ້ 77ຄົນ ເທັ່າກັບ 97,3%,ມໍ 4 ມີ 70ຄົນ ເສັງໄດ້ 100%,ມໍ5 ມີ 98ຄົນ ເສັງໄດ້ 96ຄົນ ເທົ່າກັບ 92,14%, ມໍ 6 ມີ98ຄົນ ເສັງໄດ້ 95ຄົນ ເທົ່າກັບ 96,8% ແລະມໍ7ມີ 92ຄົນ ເສັງໄດ້ 100%,ນອກຈາກການຮຽນໄດ້ດີພາຍໃນໂຮງຮຽນແລ້ວ ຍັງໄດ້ສົ່ງນັກຮຽນເກັ່ງ ເຂົ້າໄປເສັງນັກຮຽນເກັ່ງຂັ້ນແຂວງ ໄດ້ອັນດັບທີ1 ວິຊາພາສາລາວວັນນະຄະດີ ມໍ4 ແລະອັນດັບທີ 1 ແລະທີ2 ວິຊາຟີຊິກສາດ ຊັ້ນມໍ7.ຈາກນັ້ນກໍ່ມີການເຄື່ອນໄຫວຝຶກຊ້ອມແລະສະແດງສິລະປະ-ວັນນະຄະດີ ຮັບໃຊ້ງານສຳຄັນຕ່າງໆ ໄດ້ 22 ຄັ້ງ,ແຂ່ງຂັນກິລາມິດຕະພາບ,ການເພີ່ມພູນຜະຫຼິດຜົນ,

ສຳລັບອົງການຈັດຕັ້ງມະຫາຊົນ ຊາວໜຸ່ມ,ແມ່ຍິງ,ກຳມະບານ ກໍ່ໄດ້ມີການເຄື່ອນໄຫວຢ່າງເປັນຂະບວນການ.
ໃນພິທີຍັງໄດ້ຜ່ານແຜນພັດທະນາການສຶກສາ ປະຈໍາສົກຮຽນ 2019-2020 ໂດຍເລັ່ງໃສ່ ປະຕິບັດໃຫ້ຄົບຕາມ5ຫຼັກມູນຂອງການສຶກສາ ຄື ຄຸນສົມບັດສຶກສາ,ປັນຍາສຶກສາ,ແຮງງານສຶກສາ,ສິລະປະສຶກສາແລະພາລະສຶກສາ,ພ້ອມສືບຕໍ່ປັບປຸງຫຼັກສູດການຮຽນ-ການສອນ ໃຫ້ມີຄຸນະພາບສູງຂຶ້ນ,ຈາກນັ້ນຄະນະຮັບຜິດຊອບທັງ 4 ໜ່ວຍງານຂອງໂຮງຮຽນ ກໍ່ໄດ້ອອກຈັບມືແຂ່ງຂັນກັນ ເພື່ອສູ້ຊົນປະຕິບັດແຜນການຕ່າງໆທີ່ວາງອອກໃຫ້ສຳເລັດ ຕາມຄາດໝາຍ….
ໂອກາດດຽວກັນທ່ານ ອາຈານ ສົມລິດ ອຸ່ນທະວີ ຜູ້ອຳນວຍການ ໂຮງຮຽນສາມາກິນນອນຊົນເຜົ່າກໍ່ໄດ້ມີຄຳເຫັນວ່າ: ການສຶກສາເປັນເຄື່ອງມືທີ່ສຳຄັນໃນການພັດທະນາປະເທດຊາດເຊິ່ງມີຄວາມຜູກພັນກັບຊີວິດຂອງຄົນເຮົາໃນສັງຄົມເພາະການພັດທະນາຕ້ອງອາໃສສັງຄົມ, ນັກຮຽນຮູ້ ແລະ ປັນຍາຊົນສິ່ງສຳຄັນໃນການລຶບລ້າງຄວາມທຸກຍາກເປັນຂໍກຸນແຈທີ່ມີຄວາມສາມາດພັດທະນາປະເທດຊາດອອກຈາກຄວາມດ້ອຍພັດທະນາທຸກປະເທດໃນໂລດໂດຍສະເພາະ ສປປລາວ.

ຂ່າວ: ວິລັດດາ ດວງຈັນທາ