ໃນວັນທີ 12 ກັນຍາ 2019 ນີ້; ຢູ່ທີ່ໂຮງຮຽນມັດທະຍົມປາຍ ດົງເຫັນ ເມືອງ ອາດສະພັງທອງ ແຂວງ ສະຫວັນນະເຂດ ໄດ້ສ້າງຂະບວນການອານາໄມລວມຕາມບໍລິເວນຂອບເຂດຂອງໂຮງຮຽນຂອງຕົນຢ່າງເປັນຂະບວນການທີ່ຝົດຝືນ. ໂດຍພາຍໃຕ້ການນໍາພາຂອງທ່ານ ຄໍາພຸກ ບຸດຕະໂຄດ ຜູ້ອໍານວຍການໂຮງຮຽນມັດທະຍົມປາຍດົງເຫັນ ພ້ອມດ້ວຍຄະນະ, ມີຄູອາຈານຈໍານວນ 38 ທ່ານ, ຍິງ 26 ທ່ານ ແລະ ນ້ອງນັກຮຽນແຕ່ຊັ້ນມໍ 5 ຫາຊັ້ນມໍ 7 ຈໍານວນ 381 ຄົນ, ຍິງ 232 ຄົນກໍ່ໄດ້ຮ່ວມກັນອານາໄມຢ່າງເປັນຂະບວນການ.

ສໍາຫຼັບການສ້າງຂະບວນການອານາໄມລວມໃນຄັ້ງນີ້; ກໍ່ມີຫຼາຍໜ້າວຽກທີ່ສໍາຄັນໄດ້ເຮັດເປັນຕົ້ນກໍ່ແມ່ນໄດ້ຖ່າງປ່າໄມ້ນ້ອຍໃຫ່ຍ ອ້ອມຮອບບໍລິເວນຂອບເຂດຂອງເດິນໂຮງຮຽນ, ຫຼົກໝາກຫຍ້າ ແລະ ໄດ້ເກັບຂີ້ເຫຍື່ອ, ກະໂປະກະປ໋ອງ ຕາມໂຮງຮຽນ. ທັງນີ້ກໍ່ເພື່ອເປັນການອານາໄມເດິນໂຮງຮຽນມັດທະຍົມປາຍ ດົງເຫັນ ໃຫ້ມີຄວາມສະອາດງາມຕາ, ທັງເປັນການຮັດແໜ້ນຄວາມສາມັກຄີລະຫວ່າງຄູອາຈານ ແລະ ນ້ອງນັກຮຽນ ໃຫ້ເປັນປຶກແຜນແໜ້ນໜ້າຂຶ້ນໄປເລື່ອຍໆພ້ອມທັງເປັນການສ້າງຂະບວນເພື່ອການຕ້ອນຮັບ – ຮັບຕ້ອນແກ່ກອງປະຊຸມໃຫ່ຍຄັ້ງທີ 9 ຂອງສະຫະພັນແມ່ຍິງເມືອງທີ່ຈະໄຂຂຶ້ນໃນໝໍໆນີ້ໃຫ້ເຕັມໄປດ້ວຍຜົນງານທີ່ຫຍິ່ງໃຫ່ຍກວ່າຄັ້ງທີ່ຜ່ານມາຕື່ມອີກດ້ວຍ.

ພາບຂ່າວ: ສາຍສະໝຸດ ສິມພະລີວົງ