ສະຫະພັນກຳມະບານແຂວງສະຫວັນນະເຂດຖືເອົາການຊ່ວຍເຫຼືອຜູ້ປະສົບໄພນ້ຳຖ້ວມເປັນບັນຫາສຳຄັນທີ່ຮີບດ່ວນ

0
185

ອີງໃສ່ສະພາບດິນຟ້າອາກາດໃນປະຈຸບັນມີການຜັນແປຢ່າງສັບສົນ ແລະ ຕໍ່ເນື່ອງ ເຮັດໃຫ້ບາງທ້ອງຖິ່ນຢູ່ແຂວງສະຫວັນນະເຂດເວົ້າລວມ ເວົ້າສະເພາະກໍ່ຄືບາງເມືອງເກີດມີຝົນຕົກໜັກ ແລະ ມີໄພນ້ຳຖ້ວມເກີດຂື້ນ ປະຊາຊົນບາງສ່ວນຂາດທີ່ຢູ່ອາໃສ ແລະ ຂາດອາຫານການກິນ.

ສະນັ້ນ, ມາໃນຕົ້ນເດືອນ ກັນຍາ 2019 ທີ່ຜ່ານມາ ຄະນະປະທານສະຫະພັນກຳມະບານແຂວງສະຫວັນນະເຂດ ນຳໂດຍ ທ່ານ ບຸນລ້ຽງ ຈັນວັນເພັງ ປະທານຄະນະບໍລິຫານງານສະຫະພັນກຳມະບານແຂວງ ຈຶ່ງໄດ້ມີການຄົ້ນຄວ້າປຶກສາຫາລືກັບໝູ່ຄະນະຢ່າງຮີບດ່ວນ ເພື່ອນຳເອົາເຄື່ອງບໍລິໂພກທີ່ສຳຄັນຈຳນວນໜຶ່ງເປັນຕົ້ນແມ່ນ: ໝີ່ໄວໆ, ປ໋ອງປາ, ນໍ້າດື່ມ ແລະ ອື່ນໆ ລວມມູນຄ່າ 7 ລ້ານກີບ ໂດຍຈັດແບ່ງເປັນ 3 ທີມ ລົງມອບໃຫ້ແກ່ປະຊາຊົນທີ່ຖືກຜົນກະທົບຈາກໄພນ້ຳຖ້ວມໜັກຫຼາຍກວ່າໝູ່ ຄື ເມືອງຊົນນະບູລີ, ເມືອງສອງຄອນ ແລະ ເມືອງຈຳພອນ ເພື່ອໃຫ້ທ່ວງທັນກັບສະພາບການ. ຊຶ່ງໃນນັ້ນທ່ານ ບຸນລ້ຽງ ຈັນວັນເພັງ ໄດ້ມີການນຳພາລົງມອບເຄື່ອງດັ່ງກ່າວດ້ວຍຕົນເອງ ໃຫ້ແກ່ການນຳຂອງເມືອງຊົນນະບູລີເພື່ອນຳໄປແຈກຢາຍຕໍ່ໃຫ້ແກ່ປະຊາຊົນ ໂດຍການຮັບເອົາໃນຄັ້ງນີ້ ຂອງທ່ານ ຄຳມອນ ທິລະວົງ ຮອງເລຂາພັກເມືອງໆຊົນນະບູລີຢ່າງສົມກຽດ.

ຂ່າວ – ພາບ:ວັນນະເລດ ມະນີວົງ.