ອີງຕາມແຫຼ່ງຂ່າວຈາກສຳນັກຂ່າວ ຂປລ: ໃນວັນທີ 12 ກັນຍາ 2019 ເຈົ້າໜ້າທີ່ຮັກສາຄວາມສະຫົງບ ເມືອງໂພນທອງ ແຂວງຈໍາປາສັກ ໄດ້ກັກຕົວ ນາງ ຮ່ວາຍເຮືອງ ໄຊຍະບູລີ (ໝວຍ) ອາຊີບຄ້າຂາຍ, ຢູ່ບ້ານສະເຫຼົ້າ, ເມືອງໂພນທອງ ແຂວງຈຳປາສັກ ເພື່ອດຳເນີນຄະດີຕາມກົດໝາຍ ຍ້ອນຜູ້ກ່ຽວໄດ້ເຄື່ອນໄຫວໂຄສະນາຕ້ານ ສປປລາວ ຜ່ານສື່ສັງຄົມອອນລາຍ.

ປະມວນກົດໝາຍອາຍາ
ມາດຕາ: 117 ລະບຸວ່າ: ບຸກຄົນໃດ ຫາກໄດ້ໂຄສະນາໃສ່ຮ້າຍປ້າຍສີ ສາທາລະນະລັດ ປະຊາທິປະໄຕ ປະຊາຊົນລາວ ບິດເບືອນແນວທາງຂອງພັກ ແລະ ນະໂຍບາຍຂອງລັດປ່າວຂ່າວອະກຸສົນ, ເຮັດໃຫ້ມີຄວາມວຸ້ນວາຍດ້ວຍການເວົ້າ, ການຂຽນ, ການພິມ, ໜັງສືພິມ, ຮູບເງົາ, ວີດີໂອ, ຮູບພາບ, ເອກະສານ, ສື່ເອເລັກໂຕຣນິກ ຫຼື ຮູບການອື່ນ ທີ່ມີເນື້ອໃນຕ້ານ ສາທາລະນະລັດ ປະຊາທິປະໄຕ ປະຊາຊົນລາວ ເພື່ອເຮັດໃຫ້ອຳນາດແຫ່ງລັດອ່ອນເພຍ ຈະຖືກລົງໂທດ ຕັດສິນອິດສະຫຼະພາບ ແຕ່ໜື່ງປີ ຫາ ຫ້າປີ ແລະ ຈະຖືກປັບໃໝແຕ່ 5.000.000 ກີບ 20.000.000 ກີບ.

ເຈົ້າໜ້າທີ່ຮັກສາຄວາມສະຫົງບ ເມືອງດັ່ງກ່າວ ໄດ້ກ່າວວ່າ: ການກັກຕົວຜູ້ກ່ຽວໃນຄັ້ງນີ້ແມ່ນໄດ້ຮັບຄຳເຫັນດີຈາກ ອົງການໄອຍະການທ້ອງຖີ່ນ ແລະ ປະຕິບັດຕາມຂະບວນຍຸຕິທຳ ຂອງລາວ ຢ່າງຄົບຖ້ວນ.

ນັບແຕ່ໄພພິບັດນ້ຳຖ້ວມເກີດຂື້ນຢູ່ພາກກາງ ແລະ ພາກໃຕ້ ເປັນຕົ້ນມາ ຜູ້ກ່ຽວໄດ້ປ່ອຍຂໍ້ຄວາມໂຄສະນາຢ່າງຕໍ່ເນື່ອງ ທີ່ສ້າງຄວາມເຂົ້າໃຈຜິດ ແລະ ປັ່ນປ່ວນສັງຄົມ ຊື່ງສວນທາງກັບຄວາມເອົາໃຈໃສ່ ຂອງລັດຖະບານ ໃນການແກ້ໄຂຜົນຮ້າຍຂອງໄພພິບັດ ແລະ ການໃຫ້ຄວາມຊ່ວຍເຫຼືອບັນເທົາທຸກສຸກເສີນແກ່ປະຊາຊົນ ຢ່າງບໍ່ລົດລະຕະຫຼອດເວລາ.

ຕາມທີ່ໄດ້ຊາບ ອຳນາດການປົກຄອງທ້ອງຖີ່ນ ກໍ່ໄດ້ຕັກເຕືອນ ແລະ ສຶກສາອົບຮົມຜູ້ກ່ຽວຫຼາຍຄັ້ງແລ້ວໃນຜ່ານມາແຕ່ຜູ້ກ່ຽວຍັງສືບຕໍ່ເຄື່ອນໄຫວໂຄສະນາທີ່ຜິດກົດໝາຍ ຕາມທີ່ໄດ້ລະບຸມາໃນຂ້າງເທີງນັ້ນ.

ທຸກໆປະເທດກໍຍ່ອມມີກົດໝາຍ ແລະ ມີລະບຽບໃນການປົກຄອງ, ທຸກຄຳວ່າປະຊາທິປະໄຕໃນໂລກນີ້ກໍເຊັ່ນດຽວກັນກໍຍ່ອມມີຂອບເຂດຂອງມັນ. ສະນັ້ນ, ເຫດການໆກັກຕົວຄັ້ງນີ້ຈຶ່ງເປັນອຸທາຫອນວ່າທຸກຢ່າງຕ້ອງມີຂອບເຂດຂອງມັນ ແລະ ທຸກຄົນຕ້ອງໄດ້ເຄົາລົບລະບຽບໂດຍສະເພາະຄົນລາວເຮົາທີ່ມີນິໃສອ່ອນນ້ອມໂອບເອື້ອອາລີ ແລະ ປະເພນີທີ່ດີງາມຢູ່ແລ້ວເຊິ່ງເຮົາຄົນລາວຕ້ອງໄດ້ຮັກສາເພື່ອໃຫ້ຢູ່ຄູ່ບ້ານເມືອງເຮົາຕະຫລອດໄປຢູ່ແລ້ວແຕ່ ກົງກັນຂ້າມບໍ່ແມ່ນເຮົາຈະຕ້ອງເຮັດ ແລະ ເອົາຕາມໂລກຕາເວັນຕົກຫຼືຕາມກະແສຂອງເຂົາທຸກຢ່າງເຊັ່ນວ່າຢາກເວົ້າຫຍັງກາເວົ້າຢາກດ່າໃຜກໍດ່າຜ່ານທາງສື່ສັງຄົມອອນລາຍທີ່ບໍ່ແມ່ນຂອງເຮົາ. ນອກຈາກກົດໝາຍຂ້າງເທິງແລ້ວມີເດຍລາວຍັງເຫັນວ່າຍັງມີອີກຫລາຍກົດໝາຍທີ່ພຶດຕິກຳດັ່ງກ່າວນີ້ຍັງຂັດຕໍ່ເຊັ່ນ: ກົດໝາຍຕ້ານ ແລະ ສະກັດກັ້ນອາສະຍາກຳທາງຄອມພິວເຕີ ແລະ ກົດໝາຍວ່າດ້ວຍສື່ມວນຊົນ(ສະບັບປັບປຸງ) ເຊິ່ງມືຄີບອດທັງຫລາຍຕໍ່ໄປຈະຕ້ອງໄດ້ເອົາໃຈໃສ່ສຶກສາຮໍ່າຮຽນຢ່າງລະອຽດເພື່ອບໍ່ໃຫ້ເກີດກໍລະນີແບບນີ້ຊໍ້າອີກ ແລະ ຖ້າຍັງຢາກເປັນຜູ້ນຳສະເໜີຂໍ້ມູນຂ່າວສານຄ້າຍກັບສຳນັກຂ່າວ.