ໃນວັນທີ 14 ກັນຍາ 2019 ທ່ານ ນາງ ມີນາພອນ ໄຊຊົມພູ ຫົວໜ້າຄະນະຈັດຕັ້ງ ແຂວງ ອັດ ຕະປື ພ້ອມດ້ວຍສະມາຄົມ ຄອບຄົວການນໍາ, ສະມາຄົມນັກທຸລະກິດຍິງແຂວງ ອັດຕະປື ໄດ້ມອບເຄື່ອງຊ່ວຍເຫລືອບັນເທົາທຸກໃຫ້ ແຂວງ ຈຳປາສັກ ແລະ ຮັບໂດຍ ທ່ານ ຄຳໄສ ໝື່ນຫລວງ ຫົວໜ້າພະແນກ ແຮງງານ ແລະ ສະຫວັດດີການສັງຄົມແຂວງ ຈຳປາສັກ ພ້ອມດ້ວຍ ຄະນະກຳມະການປ້ອງກັນ, ຄວບຄຸມ ແລະ ຟື້ນຟູໄພພິບັດ ແຂວງ ແລະ ມີພາກ ສ່ວນກ່ຽວຂ້ອງເຂົ້າຮ່ວມ.

ສໍາລັບ ເຄື່ອງທີ່ນໍາມາມອບໃນຄັ້ງນີ້ ມີເຂົ້່າສານຈ້າວ 1 ໂຕນ, ນໍ້າດື່ມ 150 ແກັດ, ໝີ່ 10 ແກັດ, ປາກະປ໋ອງ 1 ແກັດ, ນໍ້າປາ 5 ແກັດ, ເກືອ 30 ຖົງ, ແປ້ງນົວ 1 ແກັດ, ໝາກເຜັດ ແຫ້ງ 2 ສອບ, ຜ້າຫົ່ມ 40 ຜືນ, ແຟັບ 3 ແກັດ ລວມມູນຄ່າທັງໝົດ 19 ລ້ານກ່ວາກີບ.

ການມອບເຄື່ອງບັນເທົາທຸກໃນຄັ້ງນີ້ ເພື່ອເປັນສ່ວນໜຶ່ງ ໃຫ້ຄະນະກຳມະການປ້ອງກັນ, ຄວບຄຸມ ແລະ ຟື້ນຟູໄພພິບັດ ແຂວງ ໄດ້ນໍາໄປມອບຕໍ່ໃຫ້ແກ່ປະຊາຊົນຜູ້ປະສົບໄພນໍ້າ ຖ້ວມ ພາຍໃນແຂວງຈໍາປາສັກ.