ໃນວັນທີ 14 ກັນຍາ 2019 ນີ້, ຢູ່ທີ່ສະໂມສອນແຂວງ ໂຄງການແບ່ງປັນນໍ້າໃຈຊ່ວຍເຫຼືອຜູ້ປະສົບໄພນໍ້າຖ້ວມ 4 ແຂວງພາກໃຕ້ ຈາກແຂວງອັດຕະປື ໄດ້ນໍາເອົາເຄື່ອງຊ່ວຍເຫຼືອປະເພດເຄື່ອງອຸປະໂພກ, ບໍລິໂພກ, ທີ່ໄດ້ຈາກການປະກອບສ່ວນຂອງການນຳແມ່ຍິງ, ຄອບຄົວການນຳ ແລະນັກທຸລະກິດຍິງແຂວງອັດຕະປື, ນໍາໂດຍ ທ່ານ ນາງ ມີນາພອນ ໄຊຊົມພູ ຮອງເລຂາພັກແຂວງ ຫົວໜ້າຄະນະຈັດຕັ້ງແຂວງ ພ້ອມຄະນະແມ່ຍິງ ໄດ້ນຳເອົາເຄື່ອງຊ່ວຍເຫຼືອປະເພດ: ເຂົ້າຈ້າວ 1 ໂຕນ, ໝີ່ 10 ແກັດ, ນໍ້າປານ້ອຍ 5 ແກັດ, ເກືອ 30 ຖົງ,ປາປ໋ອງ 1 ແກັດ, ໝາກເຜັດແຫ້ງ 2 ຖົງ, ແພັບ 3 ແກັດ, ນໍ້າດື່ມ 150 ແກັດ ແລະຜ້າຫົ່ມ 100 ຜືນ ລວມມູນຄ່າທັງໝົດເກືອບ 20 ລ້ານກີບ. ໂດຍການຮັບຂອງ ທ່ານ ພູທົງ ຄຳມະນີວົງ ຮອງເຈົ້າແຂວງສາລະວັນ ຕາງໜ້າໃຫ້ອົງການປົກຄອງແຂວງ.

ສຳລັບ ເຄື່ອງຊ່ວຍເຫຼືອຈຳນວນດັ່ງກ່າວນີ້ແມ່ນຈະໄດ້ນຳເອົາໄປສືບຕໍ່ແຈກຢາຍໃຫ້ພໍ່ແມ່ປະຊາຊົນ ທີ່ປະສົບໄພພິບັດນ້ຳຖ້ວມ ເພື່ອແບ່ງເບົາບັນເທົາທຸກໃຫ້ກັບພໍ່ແມ່ປະຊາຊົນໄດ້ສ່ວນໃດສ່ວນໜຶ່ງ.
ໂອກາດດຽວກັນນີ້, ທ່ານຮອງເຈົ້າແຂວງໆສາລະວັນ ກໍ່ໄດ້ສະແດງຄວາມຂອບໃຈຕໍ່ຄະນະນຳຂອງແຂວງອັດຕະປື ທີ່ມີນໍ້າຈິດນໍ້າໃຈໃນການປະກອບສ່ວນຊ່ວຍເຫຼືອຜູ້ປະສົບໄພນໍ້າຖ້ວມແຂວງສາລະວັນ.

ໂດຍ: ທິດລານີ ໂຄດໂຍທາ