ໃນວັນທີ 13 ກັນຍາ 2019 ນີ້; ໂຮງຮຽນມັດທະຍົມຕົ້ນດົງເຫັນ ເມືອງ ອາດສະພັງທອງ ແຂວງ ສະຫວັນນະເຂດ ໄດ້ສ້າງຂະບວນການອານາໄມລວມຕາມເສັ້ນທາງເພື່ອຂໍ່ານັບຮັບຕ້ອນກອງປະຊຸມໃຫ່ຍຂອງສະຫະພັນແມ່ຍິງເມືອງ.ເປັນຂະບວນການທີ່ຟົດຟືນ. ໂດຍພາຍໃຕ້ການນໍາພາຂອງທ່ານນາງ ລໍາມະທຸ ກິ່ງອັກສອນ ຜູ້ອໍານວຍການໂຮງຮຽນມັດທະຍົມຕົ້ນະດົງເຫັນ ພ້ອມດ້ວຍຄະນະ, ມີຄູອາຈານຈໍານວນ 32 ທ່ານ, ຍິງ 25 ທ່ານ ແລະ ນ້ອງນັກຮຽນແຕ່ຊັ້ນມໍ 1 ຫາຊັ້ນມໍ 4 ຈໍານວນ 344 ຄົນ, ຍິງ 193 ຄົນກໍ່ໄດ້ຮ່ວມກັນອານາໄມຢ່າງເປັນຂະບວນການ.

ສໍາຫຼັບການສ້າງຂະບວນການອານາໄມລວມໃນຄັ້ງນີ້; ກໍ່ມີຫຼາຍໜ້າວຽກທີ່ສໍາຄັນໄດ້ເຮັດເປັນຕົ້ນກໍ່ແມ່ນ ໄດ້ເກັບຂີ້ເຫຍື້ອ, ກະໂປະກະປ໋ອງ ຕາມ 2 ຂ້າງທາງໃຫ້ມີຄວາມສະອາດເຊິ່ງເປັນໄລຍະທາງ 1 ກິໂລແມັດ. ທັງນີ້ກໍ່ເພື່ອເປັນການອານາໄມ 2 ຂ້າງທາງໃຫ້ມີຄວາມສະອາດງາມຕາ, ທັງເປັນການຮັດແໜ້ນຄວາມສາມັກຄີລະຫວ່າງຄູອາຈານ ແລະ ນ້ອງນັກຮຽນ ໃຫ້ເປັນປຶກແຜນແໜ້ນໜາຂຶ້ນໄປເລື້ອຍໆພ້ອມທັງເປັນການສ້າງຂະບວນການເພື່ອການຕ້ອນຮັບ – ຮັບຕ້ອນແກ່ກອງປະຊຸມໃຫ່ຍຄັ້ງທີ IX ຂອງສະຫະພັນແມ່ຍິງເມືອງທີ່ຈະໄຂຂຶ້ນໃນມໍໆນີ້ໃຫ້ເຕັມໄປດ້ວຍຜົນງານທີ່ຫຍິ່ງໃຫ່ຍກວ່າຄັ້ງທີ່ຜ່ານມາຕື່ມອີກດ້ວຍ.

ແຫຼ່ງຂ່າວຍັງແຈ້ງໃຫ້ຮູ້ຕື່ມອີກວ່າ:ໃນວັນທີ 14 ກັນຍາ 2019 ນີ້; ປະຊາຊົນບ້ານຕະບອງເພັດ ທີ່ຂຶ້ນກັບເມືອງ ອາດສະພັງທອງ, ແຂວງ ສະຫວັນນະເຂດ, ໄດ້ຮ່ວມແຮງຮ່ວມໃຈກັນສາມັກຄີກັນສ້າງຂະບວນການສ້ອມແປງເສັ້ນທາງພາຍໃນບ້ານຂອງຕົນ ຢ່າງເປັນຂະບວນການທີ່ຝົດຝືນ. ໂດຍພາຍໃຕ້ການຊີ່ນໍາ – ນໍາພາຂອງທ່ານນາງ ສຸກສະໄໝ ແສນສີສຸນົນ ນາຍບ້ານຕະບອງເພັດພ້ອມດ້ວຍຄະນະ, ມີປະຊາຊົນພາຍໃນບ້ານຈໍານວນ 153 ຄົນ, ຍິງ 41 ຄົນກໍ່ໄດ້ອອກແຮງງານຢ່າງເປັນຂະບວນການ.
ໃນການສ້າງຂະບວນການສ້ອມແປງເສັ່ນທາງພາຍໃນບ້ານໃນຄັ້ງນີ້; ປະຊາຊົນແມ່ນໄດ້ຮ່ວມແຮງຮ່ວມໃຈກັນໃນເບື້ອງຕົ້ນ ແມ່ນເຂົາເຈົ້າໄດ້ຂຸດດິນໃຊ້ກະຊອບເພື່ອເອົາມາລຽນເຮັດເປັນແລ່ວກັ້ນດິນ ແລະ ຂຸດດິນຖົມໃນເສັ່ນທາງທີ່ເປ້ເພ້ໃນຊ່ວງລະດູຝົນທີ່ຜ່ານມາໃຫ້ໄປມາໄດ້ສະດວກຂຶ້ນໂດຍມີຄວາມຍາວ 50 ແມັດ.
ທັ່ງນີ້; ກໍ່ເພື່ອເປັນການສ້າງຂະບວນການສາມັກຄີກັນຂອງປະຊາຊົນໃນບ້ານ ຕະບອງເພັດ ໃຫ້ມີຄວາມສາມັກຄີພ້ອມພຽງກັນເຮັດໃຫ້ເສັ້ນທາງດັ່ງກ່າວສາມາດສັນຈອນໄປມາຄ້າຂາຍລະຫວ່າງບ້ານຕໍ່ບ້ານ, ບ້ານກັບຕົວເມືອງໃຫ້ມີຄວາມສະດວກສະບາຍຫຼາຍຂຶ້ນກວ່າເກົ່າ.

ຂ່າວ: ສາຍສະໝຸດ ສິມພະລີວົງ ນັກຂ່າວ: ເມືອງ ອາດສະພັງທອງ