ໃນວັນທີ 13 ກັນຍາ 2019 ນີ້ ຄະນະປະຕິບັດງານພິເສດ 2 ແຂວງສະຫວັນະເຂດ – ກວາງຈິ ສສ ຫວຽດນາມ ໄດ້ເປີດກອງປະຊຸມ,ເພື່ອແນໃສ່ເອກະພາບແຜນການນະໂຍບາຍ,ສືບຕໍ່ຈັດຕັ້ງຜັນຂະຫຍາຍວຽກງານສຳຫຼວດ,ຊອກຫາ,ທ້ອນໂຮມອັດຖິທະຫານອາສາສະມັກ ແລະ ຊ່ຽວຊານຫວຽດນາມທີ່ເສຍສະຫຼະຊິວິດໃນປາງສົງຄາມຢູ່ຂອບເຂດຂອງແຂວງສະຫວັນເຂດເຊິ່ງໄດ້ຈັດຂື້ນທີ່ໂຮງແຮມເຊໂປນ ເມືອງເຫືອງຮວາ ແຂວງກວາງຈິ ປະຈຳສົກປີ 2019 -2020.

ໂດຍການເຂົ້າຮ່ວມຂອງທ່ານ ຄຳພູນ ຕຸໄພທູນ ຄະນະປະຈຳພັກແຂວງ ຮອງເຈົ້າແຂວງ, ຫົວໜ້າຄະນະປະຕິບັດງານພິເສດແຂວງສະຫວັນະເຂດ, ມີທ່ານ ຮ່ວາງນາມ ຮອງປະທານຄະນະກຳມະການປະຊາຊົນແຂວງ, ຫົວໜ້າຄະນະປະຕິບັດງານພິເສດແຂວງກວາງຈິ, ມີຄະນະປະຕິບັດງານພິເສດແຂວງສະຫວັນະເຂດ-ກວາງຈິ, ຄະນະພັກ-ຄະນະບັນຊາກອງບັນຊາການທະຫານແຂວງ -ປກສ ແຂວງ ຂອງ 2 ແຂວງ ພ້ອມດ້ວຍກອງປະຕິບັດງານ 584 ຂອງແຂວງກວາງຈິເຂົ້າຮ່ວມ. ໃນກອງປະຊຸມຄະນະປະຕິບັດງານທັງສອງຝ່າຍໄດ້ແລກປ່ຽນຄຳຄິດຄຳເຫັນ ແລະ ຕີລາຄາສູງໝາກຜົນໃນການປະສານສົມທົບ, ປະຕິບັດໜ້າທີ່ຊອກຫາທ້ອນໂຮມອັດຖິທະຫານອາສາສະມັກ ແລະ ຊ່ຽວຊານຫວຽດນາມທີ່ເສຍສະຫຼະຊິວິດໃນປາງສົງຄາມຢູ່ພື້ນທີ່ຂອງແຂວງສະຫວັນະເຂດ ສົກປີ 2019 -2020,ສືບຕໍ່ປະສານສົມທົບຊີ້ນຳອຳນາດການປົກຂອງເມືອງບ້ານທີ່ມີເປົ້າໝາຍໃຫ້ໄດ້ດີກວ່າເກົ່າໂດຍການປະຕິບັດຫຼາຍວິທີການທີ່ເໝາະສົມ,ຕິດແທດກັບສະພາບຕົວຈິງ,

ເພື່ອໃຫ້ຖືກຕ້ອງກັບແນວທາງແຜນນະໂຍບາຍຂອງສອງລັດຖະບານລາວ -ຫວຽດນາມວາງອອກ ເພີ່ມທະວີໃນການຊີ້ນຳອຳນາດການປົກຄອງເມືອງ, ບ້ານ ແລະ ກຳລັງປະກອບອາວຸດແຕ່ລະຂັ້ນເຮັດໃຫ້ດີວຽກງານໂຄສະນາປຸກລະດົມຂົນຂວາຍພໍ່ແມ່ປະຊາຊົນບັນດາເຖົ້າແກ່ແນວໂຮມຜູ້ທີ່ເຄີຍໄດ້ເຂົ້າຮ່ວມໃນບັ້ນຮົບຜ່ານມາເພື່ອສະໜອງຂໍ້ມູນຂ່າວສານໃຫ້ຊັດເຈນ,ຖືກຈຸດ ແລະ ມີປະສິດທິຜົນສູງ,ສຳລັບເມືອງທີ່ມີເປົ້າໝາຍລົງຊອກຄົ້ນມີ ເມືອງອາດສະພອນ,ເມືອງພະລານໄຊ,ເມືອງອາດສະພັງທອງ,ເມືອງເຊໂປນ,ເມືອງວິລະບູລີ,ເມືອງທ່າປາງທອງ ແລະ ບາງເມືອງທີ່ມີເປົ້າໝາຍ,ເຫັນວ່າຍັງມີຂໍ້ມູນຂຸມຝັງສົບຢູ່.ເຊິ່ງກຳນົດເວລາຈະເລີ້ມລົງມືແມ່ນຕົ້ນເດືອນຕຸລາ 2019 ນີ້ ຈາກນັ້ນທັງສອງຝ່າຍກໍ່ໄດ້ປະກອບຄຳຄິດຄຳເຫັນ ແລະ ຮ່ວມກັນເຊັນບົດບັນທຶກ. ຕອນທ້າຍກອງປະຊຸມທັງສອງຄະນະຍັງໄດ້ມອບຂອງຂວັນ ແລະ ຂອງທີ່ລະນືກໃຫ້ກັນ ແລະ ກັນຕື່ມອີກ.

ກວດຂ່າວໂດຍ ບກ ທະຫານແຂວງ ພາບ-ຂ່າວ ພານິດ ພິລາວົງ