ໃນວັນທີ 14 ກັນຍາ 2019 ທີ່ຜ່ານມາ, ທາງຄະນະທີມງານຊ່ວຍເຫຼືອບັນເທົາທຸກຂອງເມືອງອຸທຸມພອນ ນຳໂດຍທ່ານ ປະສົງສິນ ຈະເລີນສຸກ ເຈົ້າເມືອງໆອຸທຸມພອນ ພ້ອມຄະນະສົມທົບກັບພາກສ່ວນທີ່ກ່ຽວຂ້ອງ ໄດ້ນຳເອົາເຄື່ອງຊ່ວຍເຫຼື່ອຈຳນວນໜຶ່ງ ໄປມອບໃຫ້ເມືອງເຊໂປນ ແຂວງສະຫວັນນະເຂດ ເພື່ອນຳໄປແຈກຢາຍໃຫ້ຜູ້ຖືກຜົນກະທົບຈາກໄພນ້ຳຖ້ວມ. ເຊິ່ງເຄື່ອງທີ່ນຳໄປມອບໃນຄັ້ງນີ້ມີ: ໝີ່ໄວໆ 160 ແກັດ, ນ້ຳດື່ມ 200 ແຟັກ, ເຂົ້າສານ 100 ກິໂລ, ປາກະປ໋ອງ 1 ແກັດໃຫຍ່ ແລະ ເງິນສົດ 3 ລ້ານກີບ. ນອກນີ້ຍັງມີເຄື່ອງບັນເທົາທຸກທີ່ທາງສະຫະພັນແມ່ຍິງເມືອງອຸທຸມພອນ ນຳໄປມອບໃຫ້ບ້ານແກ້ງກີ ເມືອງເຊໂປນ ຕື່ມອີກ 50 ຖົງ. ລວມມູນຄ່າໃນການຊ່ວຍເຫຼື່ອທັງໝົດ 14 ລ້ານ 4 ແສນກວ່າກີບ. ໃຫ້ກຽດມອບເຄື່ອງດັ່ງກ່າວໂດຍ ທ່ານ ປະສົງສິນ ຈະເລີນສຸກ ເຈົ້າເມືອງໆອຸທຸມພອນ ແລະ ໃຫ້ກຽດກ່າວຮັບໂດຍ ທ່ານ ວົງໄຊ ໄຊຍະຈັກ ເຈົ້າເມືອງໆເຊໂປນ. ເຊິ່ງມີບັນດາທ່ານ ຫົວໜ້າຫ້ອງການ, ຄະນະຫ້ອງການ, ຄະນະກຳມະການຕ້ານໄພພິບັດ ທັງສອງເມືອງເຂົ້າຮ່ວມເປັນສັກຂີພິຍານ.

ໂອກາດດັ່ງກ່າວ ທ່ານ ຄຳຫຼ້າ ພົມມີໄຊ ຮອງເຈົ້າເມືອງໆເຊໂປນ ກໍ່ໄດ້ລາຍງານ ກ່ຽວກັບສະພາບນໍ້າຖ້ວມແຕ່ລະຈຸດ ໃຫ້ທາງຄະນະທີມງານຂອງເມືອງອຸທຸມພອນໄດ້ຮັບຮູ້. ຕໍ່ກັບສະ ພາບການດັ່ງກ່າວ ທາງຄະນະການນຳຂອງເມືອງອຸທຸມພອນ ກໍ່ໄດ້ສະແດງຄວາມເປັນຫ່ວງເປັນໃຍ ມາຍັງບັນດາຜູ້ປະສົບໄພກໍ່ຄືຜູ້ຖືກຜົນກະທົບຈາກໄພນ້ຳຖ້ວມ ແລະ ພ້ອມທັງຢັ້ງຢືນວ່າ ຈະສືບຕໍ່ປຸກລະດົມພໍ່ແມ່ປະຊາຊົນ ກໍ່ຄືຊາວເມືອງອຸທຸມພອນ ເພື່ອຂໍລະດົມການປະກອບສ່ວນຊ່ວຍເຫຼືອທາງດ້ານທຶນຮອນ ແລະ ວັດຖຸສິ່ງຂອງ ໃຫ້ກັບຜູ້ປະສົບໄພນ້ຳຖ້ວມ ຈົນກວ່າສະພາບຈະກັບມາເປັນປົກກະຕິ.
ຂ່າວແຈ້ງຕື່ມອີກວ່າ: ໃນຕອນເຊົ້າຂອງວັນດຽວກັນ ທາງມູນນິທິກູ້ໄພແຂວງສະຫວັນນະເຂດ ໜ່ວຍບໍລິການເມືອງອຸທຸມພອນ ກໍ່ໄດ້ນຳເອົາເຄື່ອງຊ່ວຍເຫຼື່ອ ໄປມອບໃຫ້ເມືອງເຊໂປນ ເຊັ່ນດຽວກັນ.

ນັກຂ່າວເມືອງອຸທຸມພອນ
ພອນປະເສີດ ແຜນພັກດີ