ປະທານສພຊ ລົງຢ້ຽມຢາມຜູ້ປະສົບໄພນ້ຳຖ້ວມ ຢູ່ເມືອງ ສອງຄອນ ແລະ ເມືອງ ຊົນນະບູລີ

0
82

ໃນຕອນເຊົ້າວັນທີ 14 ກັນຍາ 2019 ທ່ານນາງ ປານີ ຢາທໍ່ຕູ້ ປະທານສະພາ ແຫ່ງຊາດ ພ້ອມຄອບຄົວ ໄດ້ເດີນທາງດ້ວຍເຮືອບີນ ເພື່ອມາຢ້ຽມຢາມ ແລະ ໃຫ້ກຳລັງໃຈແກ່ ການນຳແຂວງ, ເມືອງ, ພ້ອມດ້ວຍພະນັກງານ ປະຊາຊົນ ຜູ້ທີ່ໄດ້ຮັບຜົນກະທົບຈາກໄພນໍ້າຖ້ວມ ຢູ່ເຂດເມືອງ ສອງຄອນ ແລະ ເມືອງ ຊົນນະບູລີ ໂດຍການຕ້ອນຮັບຂອງທ່ານ ສັນຕິພາບ ພົມວິຫານ ເຈົ້າແຂວງສະຫວັນນະເຂດ ພ້ອມພັນລະຍາ, ຮອງປະທານສະພາແຂວງ ການນຳແຂວງ, ພະແນກການອ້ອມຂ້າງແຂວງ, ການນຳເມືອງສອງຄອນ, ເມືອງຈຳພອນ, ກໍ່ໄດ້ເຂົ້າຮ່ວມຕ້ອນຮັບໃນຄັ້ງນີ້.

ທ່ານ ນັນ ສິດສານຸພາບ ເຈົ້າເມືອງສອງຄອນກໍ່ໄດ້ລາຍງານຜົນກະທົບຈາກໄພນ້ຳຖ້ວນ ຢູ່ເມືອງສອງຄອນຄື: ນັບແຕ່ທ້າຍເດືອນສິງຫາເປັນຕົ້ນມານໍ້າໄດ້ຖ້ວມເຮືອນປະຊາຊົນ ແລະ ເນື້ອທີ່ທຳການຜະລິດມີ 7 ກຸ່ມບ້ານ, ມີ 26 ບ້ານ, 3.242 ຄອບຄົວ, 20.125 ຄົນ, ຍິງ 10.319 ຄົນ, ເນື້ອທີ່ປັກດໍາຕົວຈິງ 15.948 ເຮັກຕາ, ເນື້ອທີ່ນາຖືກຖ້ວມ 6.563 ເຮັກຕາ, ເນື້ອທີ່ສວນ 27 ເຮັກຕາ, ຖ້ວມໜອງປາ 378 ໜອງ, ຄວາຍຕາຍ 1 ໂຕ, ງົວຕາຍ 56 ໂຕ, ເສຍຫາຍ 100 ໂຕ, ແບ້ 43 ໂຕ, ເສຍຫາຍ 50 ໂຕ, ອ່າງເກັບນໍ້າ 2 ແຫ່ງ, ສະຖານີສູບນໍ້າ 7 ແຫ່ງ, ບ້ານທີ່ຖືກຕັດຂາດຈາກຕົວເມືອງ 16 ບ້ານ, ມີ 2.235 ຄອບຄົວ, 14.123 ຄົນ, ຍິງ 7.346 ຄົນ, ບ້ານທີ່ຖືກ ຍົກຍ້າຍມີ 11 ບ້ານ, ມີ 1.853 ຄອບຄົວ, 11.932 ຄົນ, ຍິງ 6.253 ຄົນ, ຖ້ວມວັດ 15 ແຫ່ງ, ໂບດ 1 ແຫ່ງ, ຕະຫລາດ 2 ແຫ່ງ, ຖ້ວມເຫຼົ້າເຂົ້າ 2.235 ຫຼັງ, ຖ້ວມນ້ຳບາດານ 362 ໜ່ວຍ, ບໍ່ສາມາດນຳໃຊ້ໄຟຟ້າໄດ້ ມີ 5 ບ້ານ, ເສົາໄຟຟ້າຫັກ 3 ຕົ້ນ, ລະບົບນ້ຳປະປາໃຊ້ບໍໄດ້, ເສັ້ນທາງຖືກນ້ຳຖ້ວມ 1 ເສັ້ນ, ຖ້ວມບາງຈຸດ 7 ເສັ້ນ, ທາງຖືກນ້ຳກັດເຊາະ 11 ເສັ້ນ, ທາງຂາດ 3 ເສັ້ນມີ 3 ຈຸດ, ຖ້ວມໂຮງຮຽນ ມັດທະຍົມສົມບູນ ແລະ ປະຖົມ 13 ແຫ່ງ, ສຸກສາລາ 2 ແຫ່ງ. ນອກຈາກນີ້ແລ້ວກໍ່ຍັງມີສະພາບການເຈັບເປັນໃນໄລຍະນ້ຳຖ້ວມເຊັ່ນ:

ນ້ຳຄັນກິນຕີນ, ໄຂ້ຫວັດ, ເຈັບຫົວເປັນວິນ, ປວດຕາມຕົນໂຕ, ຜື່ນຄັນ ແລະ ຄວາມດັນສູງ ແລະພະຍາດອຶ່ນໆ ສຳລັບແຜນຟື້ນຟູພາຍຫຼັງນ້ຳລົງ ແມ່ນຕ້ອງເກັບກຳຢ່າງລະອຽດທາງດ້ານຜົນເສຍຫາຍດ້ານຕ່າງໆ, ຕິດຕາມກວດກາ ແລະ ເຝົ້າລະວັງ ເພື່ອປ້ອງກັນພະຍາດທີ່ເກີດຂຶ້ນກັບຄົນ ແລະ ສັດ. ຈາກນັ້ນ ທ່ານ ສັນຕິພາບ ພົມວິຫານ ກໍ່ລາຍງານສະພາບນ້ຳຖ້ວມຢູ່ພາຍໃນແຂວງສະຫວັນນະເຂດ ວ່າຍັງມີນ້ຳຖ້ວມສູງຢູ່ເຂດ ເມືອງສອງຄອນ, ຈຳພອນ ແລະ ຊົນນະບູລີ ເຮືອນຊານຂອງປະຊາຊົນຫຼາຍຫຼັງຄາ ຍັງຈົມຢູ່ໃຕ້ນ້ຳ ແລະ ຄາດວ່າຍັງອີກຫຼາຍມື້ກວ່າທີ່ນ້ຳຈະຫຼຸດລົງເຂົ້າສູ່ປົກກະຕິ ເຊິ່ງຜົນເສຍຫາຍຈາກນ້ຳຖ້ວມໃນຄັ້ງນີ້ ມີຜົນກະທົບຕໍ່ບ່ອນຢູ່ອາໄສ ມີ 10 ເມືອງ, 165 ບ້ານ, 13.736 ຄອບຄົວ, 30.637 ຄົນ, ໃນນັ້ນຕ້ອງຍົກຍ້າຍປະຊາຊົນອອກໄປຢູ່ບ່ອນທີ່ປອດໄພມີ 81 ບ້ານ, 7.433 ຄອບຄົວ, 27.252 ຄົນ, ບາງຄອບຄົວໄດ້ສູນເສຍສະມາຊິກໃນຄອບຄົວ, ເສຍຊີວິດ 4 ຄົນ, ຜົນກະທົບຕໍ່ເນື້ອທີ່ທຳການຜະລິດຂອງປະຊາຊົນໃນ 14 ເມືອງ 1 ນະຄອນ ມີ 463 ບ້ານ, 34.910 ຄອບຄົວ, ເນື້ອທີ່ນາປີຖືກນ້ຳຖ້ວມ 49.274 ເຮັກຕາ, ເນື້ອທີ່ສວນປູກພືດ 2.585 ເຮັກຕາ, ອ່າງເກັບນ້ຳ 11 ແຫ່ງ, ຄູກັນນ້ຳ 4 ແຫ່ງ, ປະຕູນ້ຳ 12 ແຫ່ງ ແລະ ສາຖານີຈັກສູບນ້ຳ 9 ແຫ່ງ, ໜອງປາຖືກນ້ຳຖ້ວມ 1.819 ໜອງ, ສັດລ້ຽງຕາຍ ແລະ ສູນຫາຍ 3.202 ໂຕ ນອກຈາກນັ້ນກໍ່ຍັງມີຜົນກະທົບຕໍ່ພື້ນຖານໂຄງລ່າງຄື:

ເສັ້ນທາງເສຍຫາຍຫຼາຍກວ່າ 54 ເສັ້ນ, ບາງບ່ອນທາງຂາດ, ນ້ຳເຊາະເຈື່ອນ, ຂົວເປ້ເພຍຸບລົງ, ເສັ້ນທາງຫຼາຍບ່ອນຖືກຕັດຂາດບໍສາມາດສັນຈອນໄປ-ມາໄດ້, ການເຂົ້າເຖິງປະຊາຊົນຜູ້ປະສົບໄພພົບຄວາມຫຍຸ້ງຍາກ, ມູນຄ່າຄວາມເສຍຫາຍເສັ້ນທາງ ແລະ ຂົວຫຼາຍກວ່າ 72 ຕື້ກີບ, ເສົາໄຟຟ້າຫຼາຍບ່ອນຫັກລົ້ມໃນບາງເຂດພື້ນທີ່ບໍ່ສາມາດກະຈາຍກະແສໄຟຟ້າໄດ້, ໜໍ້ແປງໄຟ, ກົງເຕີໄຟ, ເຄື່ອງໃຊ້ໄຟຟ້າຂອງປະຊາຊົນຈຳນວນຫຼາຍຖືກນ້ຳຖ້ວມເສຍຫາຍ ເຊິ່ງຍັງບໍ່ສາມາດສັງລວມຂໍ້ມູນໄດ້, ມີໂຮງຮຽນ 165 ແຫ່ງຖືກນ້ຳຖ້ວມ ແລະ 187 ໂຮງຮຽນບໍ່ສາມາດເປີດໄຂສົກຮຽນໃຫມ່ທັນ, ມາຮອດປັດຈຸບັນມີ 81 ໂຮງຮຽນໃນບ່ອນທີ່ຖືກນໍ້າຖ້ວມບໍ່ສາມາດເປີດການຮຽນ – ການສອນໄດ້, ມີສຸກສາລາ 8 ແຫ່ງຖືກນ້ຳຖ້ວມບໍ່ສາມາດບໍລິການປະຊາຊົນໄດ້, ນ້ຳສ້າງ, ນ້ຳບາດານ 659 ໜ່ວຍ ແລະ ວິດຖ່າຍຫຼາຍພັນໜ່ວຍຖືກຖ້ວມ. ສໍາລັບຄວາມຕ້ອງການອັນຮີບດ່ວນໃນສະເພາະໜ້າ ຕາມການຄິດໄລ່ໃນເບື້ອງຕົ້ນ ຊ່ວຍຜູ້ປະສົບໄພເຂົ້າກິນ 3 ເດືອນ, ເປັນເຂົ້າຢ່າງໜ້ອຍ 1.500 ໂຕນ, ງົບປະມານທີ່ຈະຊ່ວຍປັບປຸງເສັ້ນທາງ, ຂົວໃຫ້ກັບຄືນສູ່ປົກກະຕິ ປະມານ 60ກວ່າ ຕື້ ນອກຈາກນັ້ນຍັງຕ້ອງການງົບປະມານເຂົ້າໄປຟື້ນຟູວຽກງານກະສິກຳ ເປັນຕົ້ນ ຊົນລະປະທານ, ແນວພັນເຂົ້າ ແລະ ອື່ນໆປະມານ ເກືອບ ຕື້ ກີບ, ງົບປະມານສຳລັບສາທາລະນະສຸກ ໂດຍສະເພາະຢາປົວພະຍາດ, ຟື້ນຟູສາທາລະນະສຸກຫຼັງນ້ຳລົງ ປະມານ 895 ລ້ານກີບ.

ໂອກາດດ່ຽວກັນ ທ່ານນາງປານີ ຢາທໍ່ຕູ້ ກໍ່ໄດ້ສະແດງຄວາມຄິດເຫັນຍໍຍ້ອງ ອຳນາດການປົກຄອງທຸກຂັ້ນທີ່ເອົາໃຈໃສ່ຊ່ວຍເຫຼືອປະຊາຊົນ ພ້ອມທັງສະແດງຄວາມເປັນຫວ່ງເປັນໃຍປະຊາຊົນທີ່ຖືກຜົນກະທົບຈາກໄພພິບັດນ້ຳຖ້ວນໃນຄັ້ງນີ້ ແລະ ສືບຕໍ່ໃຫ້ການຊ່ວຍເຫຼືອປະຊາຊົນ ໃນດ້ານທີ່ຢູ່ອາໄສຊົ່ວຄາວ, ອາຫານການກິນ, ນ້ຳດື່ມ, ຢາປົວພະຍາດ, ສືບຕໍ່ໃນການປຸກລະດົມຂົນຂວາຍເອົາເຄື່ອງໃຊ້ເພື່ອມາຊ່ວຍເຫຼືອຜູ້ທີ່ຖືກຜົນກະທົບຈາກໄພນ້ຳຖ້ວມ, ສຳລັບບ້ານທີ່ນ້ຳຫຼຸດລົງແລ້ວໃຫ້ເບິ່ງຄວາມຕ້ອງການຂອງປະຊາຊົນ ບໍວ່າຈະເປັນແນວພັນພືດ, ແນວພັນເຂົ້າ, ດ້ານສຸກສາລາ, ວິດຖ່າຍ, ແລະ ໂຮງຮຽນ.
ໂອກາດທີ່ມາຢ້ຽມຢາມຄັ້ງນີ້ທ່ານນາງ ປານີ ຢາທໍ່ຕູ້ ຍັງໄດ້ມອບເຄື່ອງອຸປະໂພກ ແລະບໍລິໂພກໃຫ້ປະຊາຊົນທີ່ຖືກຜົນກະທົບ ປະກອບມີ ຢາປົວພະຍາດ, ອາຫານແຫ້ງ, ນ້ຳດື່ມ, ນ້ຳມັນເຊື້ອໄຟ ຈຳນວນ 10.000 ລິດ ລວມມູນຄ່າ 168 ລ້ານກີບ, ເຂົ້າ 27 ໂຕນ, ແລະ ມອບເງິນໃນການຊ່ວຍເຫຼືອໃຫ້ເມືອງ ສອງຄອນ, ຈຳພອນ, ຊົນນະບູລີ ຈຳນວນ 100 ລ້ານກີບ.
ຈາກນັ້ນ ທ່ານ ປະທານສະພາ ແຫ່ງ ສປປ ລາວ ພ້ອມດ້ວຍ ສັນຕິພາບ ພົມວິຫານ ແລະ ພັນລະຍາ ກໍ່ໄດ້ຂີ່ເຮືອບີນເພື່ອເດີນທາງໄປຢ້ຽມຢາມປະຊາຊົນທີ່ໄດ້ຮັບຜົນກະທົບໄພນ້ຳຖ້ວມຢູ່ເມືອງ ຊົນນະບູລີຕື່ມອີກ ໂດຍການຕ້ອນຮັບຂອງທ່ານ ສຸວິໄລ ຫຼວງສະລາດ ເຈົ້າເມືອງ ຊົນນະບູລີ ພ້ອມຄະນະ.