ໃນຕອນເຊົ້າວັນທີ 13 ກັນຍາ 2019 ທ່ານ ສັນຕິພາບ ພົມວິຫານ ເຈົ້າແຂວງສະຫວັນນະເຂດ ພ້ອມດ້ວຍພະແນກການ ກະສິກຳ ແລະ ປ່າໄມ້ ແຂວງ, ຫ້ອງການປົກຄອງແຂວງ, ພະແນກໂຍທາທິການ ແລະ ຂົນສົ່ງແຂວງ ແລະ ພາກສ່ວນທີ່ກ່ຽວ ໄດ້ລົງຢ້ຽມຢາມປະຊາຊົນທີ່ຖືກຜົນກະທົບຈາກໄພພິບັດນ້ຳຖ້ວມ ແລະ ລົງຕິດຕາມ-ຊຸກຍູ້ຂະບວນການປ້ານຄູ້ກັ້ນນໍ້າຖ້ວນ ຢູ່ເມືອງ ໄຊບູລີ ແຂວງສະຫວັນນະເຂດ ໂດຍການຕ້ອນຮັບຂອງທ່ານ ອ່ອນລໍາພັນ ບົວສີແກ້ວ ເຈົ້າເມືອງໄຊບູລີ ພ້ອມຄະນະ

ຈາກນັ້ນ ທ່ານ ສັນຕິພາບ ພົມວິຫານ ພ້ອມຄະນະ ກໍ່ໄດ້ລົງຕິດຕາມ ຂະບວນການປ້ານຄູ້ກັ້ນນໍ້າຖ້ວມຂອງປະຊາຊົນ ຢູ່ບ້ານ ຫາດຊາຍສູງ ເມືອງ ໄຊບູລີ ແຂວງສະຫວັນນະເຂດ ເຊິ່ງຄູ້ກັ້ນນ້ຳຖ້ວມດັ່ງກ່າວມີທັງໝົດ 12 ຈຸດ ມີ 9 ບ້ານຄື: ບ້ານສົມສະອາດ, ຜັກເພື້ອ, ສະກອງ, ແກ້ງໂພສີ, ກ້າງປາ , ຫາດຊາຍສູງ, ບຶງເຊ, ຕົ້ນແຫນ ແລະ ບ້ານດ່າງສະຫວັນ ເຊິ່ງເປັນບ້ານທີ່ຕັ້ງລຽບແຄມເຊບັ້ງໄຟ ມີຄວາມຍາວທັງໝົດ 42 Km ປັດຈຸບັນລະດົມກະສອບໄດ້ 25.000 ກະສອບ.

ໃນໂອກາດດ່ຽວກັນ ທ່ານ ສັນຕິພາບ ພົມວິຫານ ກໍ່ໄດ້ມອບນ້ຳດື່ມ ຈໍານວນ 130 ແພັກ ໃຫ້ບ້ານຫາດຊາຍສູງ ຕາງໜ້າຮັບໂດຍນາຍບ້ານຫາດຊາຍສູງ ເພື່ອເປັນການຊຸກຍູ້ປະຊາຊົນໃນການສ້າງຂະບວນການປ້ານຄູ້ກັ້ນນ້ຳຖ້ວມໃນເທື່ອນີ້ ຈາກນັ້ນກໍ່ໄດ້ມອບ ນ້ຳດື່ມ ແລະ ໝີ່ສຳເລັດຮູບ ຈຳນວນໜຶ່ງໃຫ້ເມືອງຕື່ມອີກ ໂດຍຕາງໜ້າຮັບທ່ານ ອ່ອນລຳພັນ ບົວສີແກ້ວ ເຈົ້າເມືອງໄຊບູລີ ເພື່ອນຳໄປແຈກຢາຍໃຫ້ປະຊາຊົນ ທີ່ປະສົບໄພນ້ຳຖ້ວມພາຍໃນເມືອງ.