ໃນຕອນບ່າຍວັນທີ 13 ກັນຍາ 2019 ນີ້. ທ່ານ ສັນຕິພາບ ພົມວິຫານ ເຈົ້າແຂວງສະຫວັນນະເຂດ ໄດ້ຕ້ອນຮັບການເຂົ້າຢ້ຽມຢາມຂອງທ່ານ ຈຸລິນ ລັກສະນະວິສິດ ຮອງນາຍົກລັດຖະມົນຕີ ແຫ່ງລາຊະອານາຈັກໄທ ໂດຍມີພະແນກການຕ່າງໆຂອງແຂວງ,ຄະນະຮັບຜິດຊອບເຂດເສດຖະກິດພິເສດ ເຂົ້າຮ່ວມ.
ທ່ານເຈົ້າແຂວງສ.ຂໄດ້ລາຍງານສະພາບ,ຈຸດພິເສດແລະທ່າແຮງໃນການພັດທະນາເສດຖະກິດຂອງແຂວງ,ເຊິ່ງເປັນແຂວງທີ່ໃຫຍ່,ມີເນື້ອທີ່ທຳການຜະຫຼິດທີ່ກວ້າງຂວາງ,ໃນປີຜ່ານມາສາມາດຜະຫຼິດເຂົ້າກຸ້ມກິນແລະສົ່ງຂາຍອອກຕ່າງປະເທດຈຳນວນໜຶ່ງ ແລະ ມີສ່ວນແຮໄວ້, ຈາກນັ້ນຍັງໄດ້ກ່າວເຖິງການພົວພັນຮ່ວມມືລະຫວ່າງລາວ-ໄທ ໂດຍສະເພາະ ແຂວງສະຫວັນນະເຂດ ສປປລາວ ກັບແຂວງມຸກດາຫານ ແລະ ແຂວງໄກ້ຄຽງທີ່ມີຊາຍແດນຕິດຈອດກັນ ທີ່ເຄີຍໄດ້ພົບປະແລກປ່ຽນບົດຮຽນເຊິ່ງກັນແລະກັນ,ຮ່ວມງານປະເພນີນຳກັນ ຕະຫຼອດມາ, ພ້ອມນັ້ນກໍ່ຍັງໄດ້ສະເໜີຕໍ່ຮອງນາຍົກລັດຖະມົນຕີແຫ່ງອານາຈັກໄທຕໍ່ກັບການຊື້ຂາຍ ລະຫວ່າງ ລາວ – ໄທ ໃຫ້ເປັນສະກຸນເງິນທ້ອງຖິ່ນ.

ອີກດ້ານໜຶ່ງແຂວງສະຫວັນນະເຂດແມ່ນຕັ້ງຢູ່ໃນແລວທາງເສດຖະກິດຕາເວັນອອກ-ຕາເວັນຕົກຕາມເສັ້ນທາງເລກທີ9,ມີເຂດເສດຖະກິດພີເສດສະຫວັນ-ເຊໂນ,ເຊິ່ງເປັນທີ່ສົນໃຈຂອງນັກລົງທຶນພໍສົມຄວນ,ປະຈຸບັນມີນັກລົງທຶນຈາກ20ກວ່າປະເທດໄດ້ມາລົງທຶນໃນເຂດດັ່ງກ່າວ.ໃນນັ້ນນັກລົງທຶນຈາກປະເທດໄທ ກໍ່ແມ່ນນອນຢູ່ໃນອັນດັບຕົ້ນໆຂອງການລົງທຶນຂະໜາດໃຫຍ່ແລະທັນສະໄໝ.ໂດຍລວມການພັດທະນາເສດຖະກິດແມ່ນມີການຂະຫຍາຍຕົວດີ.ສ່ວນດ້ານທີ່ຍັງມີຄວາມຫຍຸ້ງຍາກແມ່ນບັນດາພື້ນຖານໂຄງລ່າງ,ລະບົບເສັ້ນທາງຄົມະນາຄົມຢູ່ໃນບັນດາເມືອງ ລົງຫາບ້ານ, ມີເນື້ອທີ່ການຜະຫຼິດຫຼາຍແຕ່ບໍ່ມີແຫຼ່ງນ້ຳຕອບສະໜອງແລະກໍ່ຍັງມີຫຼາຍດ້ານທີ່ຍັງບໍ່ທັນບັນລຸຄາດໝາຍ

ຂ່າວ: ວິລັດາດາ ດວງຈັນທາ