ໃນຕອນເຊົ້າຂອງວັນທີ 16 ກັນຍາ 2019 ນີ້ ຢູ່ທີ່ຫ້ອງການບ້ານ ນາພົງ ເມືອງແປກ ແຂວງຊຽງຂວາງ ໄດ້ຈັດພິທີປະກາດຮັບຮອງເອົາ ບ້ານ ນາພົງ ເປັນຄອບຄົວ ແລະ #ບ້ານສາມັກຄີປອງດອງ ຂອງແນວລາວສ້າງຊາດ ຂື້ນຢ່າງເປັນທາງການ. ພາຍໃຕ້ການເປັນປະທານຂອງທ່ານ ເພັດສະໝອນ ວັນວິໄລ ເລຂາພັກບ້ານນາພົງ ແລະ ເປັນກຽດເຂົ້າຮ່ວມພິທີໂດຍທ່ານ ສົມຄວນ ພົນເສນາ ກຳມະການເມືອງ ປະທານແນວລາວສ້າງຊາດເມືອງ , ທ່ານ ທອງເພັດ ວົງພະຈັນ ຫົວໜ້າຂະແໜງສາສະຫນາ ແນວລາວສ້າງຊາດແຂວງຊຽງຂວາງ, ມີແຂກຖືກເຊີນ ແລະເຖົ້າແກ່ແນວໂຮມຕະຫຼອດຮອດປະຊາຊົນບັນດາເຜົ່າພາຍໃນບ້ານເຂົ້າຮ່ວມ.

ໃນພິທີ່ທ່ານ ເພັດສະໝອນ ວັນວິໄລ ໄດ້ຂຶ້ີນກ່າວເປີດພິທີຂຶ້ນຢ່າງເປັນທາງການ. ຈາກນັ້ນ, ທ່ານ ນາງ ທອງສີ ວົງແສງດາລາ ປະທານແນວລາວສ້າງຊາດບ້ານ ຕາງໜ້າຄະນະຮັບຜິດຊອບ ຂຶ້ນຜ່ານບົດສະຫຼູບການເຄື່ອນໄຫວວຽກງານການສ້າງ ຄອບຄົວແລະບ້ານສາມັກຄີປອງດອງ ຂອງແນວລາວສ້າງຊາດໃນໄລຍະຜ່ານມາ ແລະ ທິດທາງແຜນການໃນຕໍ່ໜ້າ. ທ່ານໄດ້ຍົກໃຫ້ເຫັນເຖີງການຈັດຕັ້ງປະຕິບັດວຽກງານໃນໄລຍະຜ່ານມາ, ໄດ້ເອົາໃຈໃສ່ສຶກສາອົບຮົມ, ການເມືອງແນວຄິດ ໃຫ້ພໍ່ແມ່ປະຊາຊົນມີຄວາມຮັກແພງ, ຊ່ວຍເຫຼືອເຊີ່ງກັນ ແລະກັນ, ຮັກສາມູນເຊື້ອອັນດີງາມຂອງເຜົ່າ, ຕິດພັນກັບການສ້າງຂະບວນການຮັກຊາດ ແລະພັດທະນາ, ເຮັດໃຫ້ບັນດາໜ້າວຽກໄດ້ຮັບຜົນສໍາເລັດໃນຫຼາຍໆດ້ານ ໂດຍສະເພາະແມ່ນການຊີ້ນຳ-ນຳພາ ຈັດຕັ້ງປະຕິບັດຂໍ້ແຂ່ງຂັນການສ້າງ ຄອບຄົວແລະບ້ານສາມັກຄີປອງດອງ ຢ່າງເປັນຂະບວນການຟົດຟື້ນ.

ບ້ານນາພົງ, ເມືອງແປກ, ແຂວງຊຽງຂວາງ ປະກອບມີ 2 ຊົນເຜົ່າຄື: ເຜົ່າລາວ, ແລະເຜົ່າມົ້ງ ລວມມີ 63 ຄອບຄົວ ຜ່ານການປະເມີນຕາມມາດຕະຖານການສ້າງ #ຄອບຄົວແລະບ້ານສາມັກປອງດອງ ຂອງສູນກາງແນວລາວສ້າງຊາດ ວາງອອກໄດ້ 63ຄອບຄົວ ເທົ່າກັບ 100%.ຈາກນັ້ນ, ໃນພິທີໄດ້ມອບຮັບໃບຢັ້ງຢືນຄອບຄົວ ແລະບ້ານສາມັກຄີປອງດອງ ໃຫ້ແກ່ອຳນາດການປົກຄອງບ້ານ ແລະ ຄອບຄົວຜ່ານການຮັບຮອງ, ເປັນກຽດຂຶ້ນມອບໂດຍທ່ານ ທອງເພັດ ວົງພະຈັນ ແລະ ທ່ານ ສົມຄວນ ພົນເສນາ.

ພາບ+ຂ່າວ: ເບ່ຕ່າ ໄຊປັນຍາ (ແນວລາວສ້າງຊາດແຂວງຊຽງຂວາງ)