ການຜະລິດຫົວໜ່ວຍທຸລະກິດ ແລະການປູກພືດເປັນສິນຄ້າຂອງປະຊາຊົນແຂວງເຊກອງສືບຕໍ່ຂະຫຍາຍຕົວເປັນຂະບວນຟົດຟື້ນ ສົ່ງຜົນເຮັດໃຫ້ການສົ່ງອອກມີແນວໂນ້ມເພີ່ມຂຶ້ນ, ຂະນະທີ່ 6 ເດືອນຕົ້ນປີນີ້ ການສົ່ງອອກບັນລຸ 12,6 ລ້ານກວ່າໂດລາສະຫະລັດ ຫຼື ປະມານ 113 ຕື້ 905 ລ້ານກວ່າກີບ ເທົ່າກັບ 116,16% ຂອງແຜນປີ ໂດຍຕະຫຼາດສົ່ງອອກສ່ວນໃຫຍ່ແມ່ນ ສສ ຫວຽດນາມ.

ທ່ານ ພັນສອນ ແສນສົ່ງເສີມ ຫົວໜ້າພະແນກອຸດສາຫະກຳ ແລະການຄ້າແຂວງ ໃຫ້ຮູ້ວ່າ: ແຂວງເຊກອງມີຕົວເລກສົ່ງອອກສິນຄ້າໄດ້ທັງໝົດ: 17.170 ໂຕນຄິດເປັນມູນຄ່າລວມ 12.656.192 ໂດລາ ຫຼື ປະມານ 113 ຕື້ 905 ລ້ານກວ່າກີບ ທຽບໃສ່ແຜນປະຕິບັດໄດ້ 116,16% ທຽບໃສ່ໄລຍະດຽວຂອງປີຜ່ານມາເພີ່ມຂຶ້ນ 124,29% ຊຶ່ງສິນຄ້າທີ່ສົ່ງອອກສ່ວນໃຫຍ່ແມ່ນກາເຟ, ໝາກແໜ່ງ, ຢາງພາລາ, ມັນຕົ້ນແຫ້ງ, ພິກໄທ, ຖົ່ວອິນຄາ, ພືດຜັກ, ໂສມ, ຜະລິດຕະພັນໂສມ, ໝາກເຜັດ, ໝາກກ້ວຍ, ໝາກໜອດ, ອ້ອຍ, ໜໍ່ໄມ້ຫວານ, ຊາຂຽວທຳມະຊາດ, ສາລີ ແລະອື່ນໆ ຕະຫຼາດສົ່ງອອກຕົ້ນຕໍແມ່ນ ສສ ຫວຽດນາມ. ສ່ວນມູນຄ່າການນໍາເຂົ້າປະຕິບັດໄດ້ 9.321.440 ໂດລາ ຫຼື ປະມານ 83 ຕື້ 892 ລ້ານກວ່າກີບ ທຽບໃສ່ແຜນປະຕິບັດໄດ້ 39,24% ທຽບໃສ່ໄລຍະດຽວຂອງປີຜ່ານມາຫຼຸດລົງເກືອບ 50% ໂດຍສິນຄ້າທີ່ນຳເຂົ້າສ່ວນໃຫຍ່ແມ່ນເຄື່ອງກົນຈັກຮັບໃຊ້ໂຄງການລົງທຶນ, ເຄື່ອງມືການກໍ່ສ້າງ ແລະອຸປະກອນຮັບໃຊ້ການຜະລິດ.
ຂະນະທີ່ຕົວເລກການແລກປ່ຽນຊື້-ຂາຍຂອງປະຊາຊົນລາວ-ຫວຽດນາມຕາມຊາຍແດນ, ທ່ານ ພັນສອນ ແສນສົ່ງເສີມ ລະບຸວ່າ: ໃນ 6 ເດືອນມີມູນຄ່າສູງເຖິງ 47.913,06 ໂດລາ ຫຼື ປະມານ 431 ລ້ານກວ່າກີບ ໃນນັ້ນຂາຍສົ່ງອອກຕ່າງປະເທດ 21.227,89 ໂດລາ ຫຼື ປະມານ 191 ລ້ານກວ່າກີບ, ສິນຄ້າຊື້-ຂາຍແລກປ່ຽນສົ່ງອອກສ່ວນໃຫຍ່ແມ່ນຜົນຜະລິດກະສິກຳ, ສັດລ້ຽງ, ເຄື່ອງປ່າຂອງດົງ ແລະຊື້ເຂົ້າມາຕາມຊາຍແດນ 26.685,17 ໂດລາ ຫຼື ປະມານ 240 ລ້ານກວ່າກີບ, ສິນຄ້າທີ່ຊື້-ຂາຍ ແລກປ່ຽນນຳເຂົ້າ ສ່ວນໃຫຍ່ແມ່ນ ເກືອ, ນໍ້າຕານ, ແປ້ງນົວ, ສະບູ ເຄື່ອງນຸ່ງຫົ່ມ, ອຸປະກອນເຄື່ອງຮັບໃຊ້ການສຶກສາ, ຢາປົວພະຍາດ ແລະອື່ນໆ.

ຂ່າວ: ພຸດທະສອນ