ໃນຕອນເຊົ້າວັນທີ 17 ກັນຍາ 2019 ນີ້ ກອງບັນຊາການທະຫານແຂວງສະຫວັນະເຂດ ໄດ້ຈັດພິທີປະກາດເລື່ອນຊັ້ນ ແລະ ເລື່ອນທຽບຊັ້ນໃຫ້ນາຍທະຫານ,ຜູ້ທີ່ມີຜົນງານດີເດັ່ນ ແລະ ຮອດກຳນົດເວລາເລື່ອນ,ພ້ອມທັງປະກາດການຈັດຕັ້ງຂັ້ນພະແນກການທີ່ຂື້ນກັບຫ້ອງເສນາ,ເປັນກຽດເຂົ້າຮ່ວມຂອງ ສະຫາຍ ພົນຈັດຕະວາ ຈະເລີນ ວົງວິໄຊ ເລຂາຄະນະພັກ ຫົວໜ້າການເມືອງ ກອງບັນຊາການທະຫານແຂວງສະຫວັນະເຂດ,ມີຄະນະພັກ-ຄະນະບັນຊາໃນອົງການ 5 ຫ້ອງ ແລະ ກົມກອງຕ່າງໆທີ່ຂື້ນກັບກອງບັນຊາການທະຫານແຂວງສະຫວັນະເຂດເຂົ້າຮ່ວມ.ໃນພິທີ ສະຫາຍ ພັນໂທ ສົມຕາ ສີລິປັນຍາ ຫົວໜ້າພະແນກ ພະນັກງານທະຫານແຂວງ,ຂື້ນຜ່ານຂໍ້ຕົກລົງຂອງກະຊວງປ້ອງກັນປະເທດ ແລະ ຂໍ້ຕົກລົງຂອງກົມໃຫ່ຍການເມືອງກອງທັບວ່າດ້ວຍການເລື່ອນຊັ້ນ,ເລື່ອນທຽບຊັ້ນໃຫ້ນາຍທະຫານຜູ້ທີ່ມີຜົນງານດີເດັ່ນ ແລະ ຮອດກຳນົດເວລາເລື່ອນ,ໂດຍອີງໃສ່ກົດໝາຍນາຍທະຫານກອງທັບປະຊາຊົນລາວສະບັບປັບປຸງພາກທີ2 ໜວດ 3,ມາດຕາ 22 ແລະ 23 ວ່າດ້ວຍການເລື່ອນຊັ້ນ,ເລື່ອນທຽບຊັ້ນໃຫ້ນາຍທະຫານໃນກອງທັບປະຊາຊົນລາວ,ໃນນີ້ເລື່ອນຊັ້ນຮ້ອຍເອກຂື້ນພັນຕີມີ 24 ສະຫາຍ,ເລື່ອນທຽບຊັ້ນຮ້ອຍເອກຂື້ນພັນຕີມີ 20 ສະຫາຍ,ເລື່ອນທຽບຊັ້ນຮ້ອຍໂທຂື້ນຮ້ອຍເອກ56 ສະຫາຍ,ເລື່ອນຊັ້ນຮ້ອຍຕີຂື້ນຮ້ອຍໂທ 30 ສະຫາຍ,ເລື່ອນຊັ້ນວາທີຂື້ນຮ້ອຍຕີ 93 ສະຫາຍ,ໃນນັ້ນຍັງໄດ້ປະກາດທຽບຊັ້ນຮ້ອຍໂທໃຫ້ນັກຮຽນທີ່ຮຽນຈົບວິຊາສະເພາະມາ ມີ 64 ສະຫາຍ,ຮ້ອຍຕີມີ 6 ສະຫາຍ,ວາທີມີ 21 ສະຫາຍ.

ຈາກນັ້ນຍັງໄດ້ປະກາດການຈັດຕັ້ງຂັ້ນຫົວໜ້າພະແນກ,ຮອງພະແນກທີ່ຂື້ນກັບຫ້ອງເສນາທິການທະຫານແຂວງສະຫວັນະເຂດຕື່ມອີກ. ໂອກາດດັ່ງກ່າວນີ້ ສະຫາຍ ພົນຈັດຕະວາ ຈະເລີນ ວົງວິໄຊ ເລຂາຄະນະພັກ ຫົວໜ້າການເມືອງ ກອງບັນຊາການທະຫານແຂວງສະຫວັນະເຂດ,ໄດ້ສະແດງຄຳຍ້ອງຍໍຊົມເຊີຍຕໍ່ນາຍທະຫານທີ່ໄດ້ຮັບການເລື່ອນຊັ້ນໃໝ່ໃນຄັ້ງນີ້,ພ້ອມທັງໄດ້ເນັ້ນໜັກໃຫ້ແຕ່ລະສະຫາຍຕະຫຼອດນາຍທະຫານທຸກສະຫາຍ,ສືບຕໍ່ເພີ່ມທະວີຄວາມສາມັກຄີເປັນປືກແຜ່ນແໜ້ນໜາ,ເພີ່ມທະວີຄວາມຮັບພິຊອບຂອງຕົນໃຫ້ສູງກວ່າເກົ່າ,ປັບປຸງແບບແຜນວິທີເຮັດວຽກໃຫ້ມີວິທະຍາສາດໂດຍສອດຄ່ອງກັບໜ້າທີ່ການເມືອງຂອງຕົນ,ເປັນແບບຢ່າງໃນການຝືກຝົນຫຼໍ່ຫຼອມຕົນເອງຮອບດ້ານ,ເອົາໃຈໃສ່ສຶກສາອົບຮົມການເມືອງແນວຄິດໃຫ້ພະນັກງານສະມາຊິກພັກ-ນັກຮົບເປັນກົກ ແລະ ຕັ້ງໜ້າປະຕິບັດໜ້າທີ່ວິຊາສະເພາະຂອງຕົນໃຫ້ສຳເລັດຜົນເປັນຢ່າງດີ.

ພາບ-ຂ່າວ ພານິດ ພິລາວົງ