ເມືອງໄຊສະຖານສ້າງຂະບວນການດ້ານຕ່າງໆເພື່ອຂໍານັບຮັບຕ້ອນກອງປະຊຸມໃຫຍ່ຄັ້ງທີ 2

0
458

ເພື່ອເປັນການຈັດຕັ້ງປະຕິບັດມະຕິ 10 ຂອງພັກ, ມະຕິກອງປະຊຸມໃຫຍ່ຄັ້ງທີ 6 ຂອງອົງຄະນະພັກແຂວງ ແລະ ມະຕິກອງປະຊຸມໃຫຍ່ຄັ້ງທີ່ 1 ຂອງອົງຄະນະພັກເມືອງໄຊສະຖານ ແລະ ເພື່ອເປັນການສ້າງຄະບວນການຄໍານັບຮັບຕ້ອນກອງປະຊຸມໃຫຍ່ຄັ້ງທີ 2 ຂອງອົງຄະນະພັກເມືອງໄຊສະຖານ ທີ່ຈະໄດ້ໄຂຂື້ນໃນຕໍ່ໜ້ານີ້ໃຫ້ເປັນຂະບວນການອັນຟົດຟື້ນ ແລະ ມີຄວາມໝາຍຄວາມສໍາຄັນອັນເລິກເຊິ່ງ ທາງຄະນະພັກ ອົງການປົກຄອງເມືອງ ໄດ້ພ້ອມກັນເອົາໃຈໃສ່ຈັດຕັ້ງຜັນຂະຫຍາຍມະຕິດັ່ງກ່າວ ເຂົ້າໃນວຽກງານຕົວຈິງໃນແຕ່ລະຂົງເຂດວຽກງານ
ເມືອງໄຊສະຖານມີທັງໝົດ 21 ບ້ານ, , ມີພົນລະເມືອງທັງໝົດ 15.693 ຄົນ, ຍິງ 8.039 ຄົນ, ມີ 2.782 ຄອບຄົວ ໃນໄລຍະ 5 ປີຜ່ານມາສາມາດສ້າງຄອບຄົວ ແລະ ບ້ານແບບຢ່າງດ້ານຕ່າງໆໄດ້ດັ່ງນີ້ : ສ້າງບ້ານວັດທະນະທໍາໄດ້ທັງໝົດ 5 ບ້ານ,ສ້າງຄອບຄົວວັດທະນະທໍາໄດ້ 1.880 ຄອບຄົວ, ສ້າງບ້ານ ປ້ອງກັນຊາດ ປ້ອງກັນຄວາມສະຫງົບດີໄດ້ 17 ບ້ານ, ສ້າງຄອບຄົວປ້ອງກັນຄວາມສະງົບດີໄດ້ 2018 ຄອບຄົວ, ສ້າງບ້ານພັດທະນາແຮງງານສະຫວັດດີການສັງຄົມໄດ້ 2 ບ້ານ, ສ້າງຄອບຄົວແຮງງານສະຫວັດດີການສັງຄົມໄດ້ 608 ຄອບຄົວ, ບ້ານແມ່ຍິງ 3 ດີໄດ້ 21 ບ້ານ, ສ້າງບ້ານແບບຢ່າງສາທາລະນະສຸກໄດ້ 8 ບ້ານ, ສ້າງບ້ານປອດຢາເສບຕິດໄດ້ 15 ບ້ານ, ສ້າງບ້ານປະຕິບັດກົດໝາຍໄດ້ 19 ບ້ານ ແລະ ສ້າງບ້ານຢຸດຕິການຖ່າງປ່າແບບເລື່ອນລອນໄດ້ 16 ບ້ານ ສ້ງຄອບຄົວຍຸດຕິການຖ່າງປ່າແບບເລື່ອນລອຍໄດ້ 1.984 ຄອບຄົວ.

ວຽກງານອົງການຈັດຕັ້ງມະຫາຊົນກໍ່ໄດ້ມີການສ້າງຂະບວນການດ້ານຕ່າງໆເປັນຕົ້ນແມ່ນ : ມີໜ່ວຍຊາວໜຸ່ມທັງໝົດ 49 ໜ່ວຍ, ໃນນີ້ຮາກຖານບ້ານ 21 ຮາກຖານ, ສໍານັກງານອົງການ 22 ໜວຍ, ໂຮງຮຽນ 6 ໜ່ວຍ, ສາມາດປະກາດເປັນໜ່ວຍຊາວໜຸ່ມ 4 ບຸກແລ້ວຈໍານວນ 39 ໜ່ວຍ, ໜ່ວຍສໍານັກງານອົງການ 17 ໜ່ວຍ, ໂຮງຮຽນ 6 ໜ່ວຍ, ຮາກຖານບ້ານໄດ້ 14 ຮາກຖານ ແລະ ສາມາດປະກາດໂຮງຮຽນ ເປັນໂຮງຮຽນ 3 ດີ 4 ຮູ້ຂອງເຍົາວະຊົນທັນວາແລ້ວ ຈໍານວນ 20 ໂຮງຮຽນ, ສະຫະພັນແມ່ຍິງສາມາດປະກາດເປັນໜ່ວຍແມ່ຍິງ 3 ດີ ແລ້ວຈໍານວນ 36 ໜ່ວຍ, ໃນນີ້ຮາກຖານບ້ານ 21 ຮາກຖານ, ສໍານັກງານອົງການ 13 ໜ່ວຍ ແລະ ໂຮງຮຽນ 2 ໜ່ວຍ, ທົ່ວເມືອງມີໜ່ວຍກໍາມະບານຮາກຖານທັງໝົດ 36 ຮາກຖານ ສາມາດປະກາດກໍາມະບານຮາກຖານ 5 ເປັນເຈົ້າແລ້ວ ຈໍານວນ 32 ຮາກຖານ ໃນນີ້ຮາກຖານສໍານັກງານອົງການມີ 16 ຮາກຖານ, ໂຮງຮຽນ 16 ຮາກຖານ ເຊິ່ງປະຈຸບັນມີທັງໝົດ 36 ຮາກຖານ. ຈາກຜົນງານດັ່ງກ່າວສາມາດປະກາດເປັນເມືອງ 4 ບຸກ, ເມືອງແມ່ຍິງ 3 ດີ ແລະ ໄດ້ປະກາດເປັນເມືອງ 2 ດີ 5 ເປັນເຈົ້າ.
ນອກນີ້ ການຈັດຕັ້ງປະຕິບັດ ແຜນພັດທະນາເສດຖະກິດສັງຄົມແຫ່ງຊາດ 5 ປີ ຄັ້ງທີ່ 8 ຂອງລັດ ເຫັນວ່າເສດຖະກິດໂດຍລວມຂອງເມືອງໄດ້ມີການຂະຫຍາຍຕົວຢ່າງຕໍ່ເນື່ອງ ຖືກຕາມທິດທາງແຜນພັດທະນາເສດຖະກິດ – ສັງຄົມ ໄດ້ມີຫຼາຍໜໍ່ແໜງປັດໃຈໃໝ່ເກີດຂື້ນ ຊີວິດການເປັນຢູ່ດ້ານວັດຖຸ ແລະ ຈິດໃຈໄດ້ຮັບການເສີມຂະຫຍາຍດີຂື້ນເປັນກ້າວໆ. ວຽກງານກະສິກໍາ ແລະ ປ່າໄມ້ ຜ່ານມາໄດ້ມີການຕິດຕາມນໍາພາປົກປັກຮັກສາປ່າໄມ້ ແລະ ເກັບກູ້ຜົນຜະລິດລະດູແລ້ງ – ລະດູຝົນໃນແຕ່ລະປີ ນໍາພາຈັດສັນດິນທໍາການຜະລິດມອບດິນ – ມອບປ່າ ໃຫ້ປະຊາຊົນຈໍານວນ 21 ບ້ານ, ວຽກງານການລົງທຶນໄດ້ມີການລົງທືນທັງໝົດ 29 ໂຄງການ ມູນຄ່າ 168,3 ຕື້ກີບ ໃນນີ້ໂຄງການລົງທຶນຂອງລັດລັດມີ 25 ໂຄງການ, ຂອງການລົງທຶນຂອງຕ່າງປະເທດມີ 4 ໂຄງການ ແລະ ໂຄງການສືບຕໍ່ທີ່ພວມຈັດຕັ້ງປະຕິບັດ 4 ໂຄງການ.

ວຽກງານໂຍທາທິການ ແລະ ຂົນສົງກໍ່ໄດ້ມີການສອມແປງເສັ້ນທາງເຂົ້າຫາບ້ານຕ່າງໆຢູ່ພາຍໃນເມືອງ ສາມາດທຽວໄປມາຫາສູ່ກັນໄດ້ 2 ລະດູ, ວຽກງານອຸດສາຫະກໍາ ແລະ ການຄ້າ ໄດ້ມີການກວດກາ ແລະ ອອກທະບຽນເກັບຊື້ເຄື່ອງປ່າຂອງນາ, ເກັບຊື້ສັດ ແລະ ຮ້ານຂາຍເຄື່ອງຍ່ອຍໄດ້ທັງໝົດ ຈໍານວນ 72 ທະບຽນ ສາມາດຈັດເກັບລາຍຮັບ ໄດ້ 3 ຕື້ 600 ລ້ານກວ່າກີບ, ວຽກງານການເງິນ ສາມາດປະຕິບັດລາຍຮັບທັງໝົດ 35 ຕື້ 108 ລ້ານກ່ວາກີບ ທຽບໃສ່ 5 ປີຜ່ານມາເຜີ້ມຂື້ນ 58,14 % , ໃນນີ້ຮັບດຸ່ນດຽງຈາກແຂວງ 32. ຕື້ 193 ລ້ານກວ່າກີບ ແລະ ຮັບພາຍໃນເມືອງ 2 ຕື້ 914 ລ້ານກວ່າກີບ. ນອກນີ້ຍັງໄດ້ມີການເບີກຈ່າຍເງິນເດືອນໃຫ້ພະນັກງານລັດຖະກອນຢ່າງເປັນປົກກະຕິ ແລະ ວຽກງານອື່ນໆກໍ່ເຫັນວ່າໄດ້ມີການຂະຫຍາຍຕົວຢ່າງຕໍ່ເນື່ອງ.
ສັງລວມແລ້ວທາງຄະນະພັກ ອົງການປົກຄອງເມືອງແມ່ນໄດ້ມີການອອກແຮງແຂ່ງຂັນກັນສ້າງຂະບວນການເພື່ອຂໍານັບຮັບຕ້ອນກອງປະຊຸມໃຫຍ່ ຄັ້ງທີ່ 2 ຂອງອົງຄະນະພັກເມືອງ ໄຊສະຖານ ທີ່ຈະໄດ້ໄຂຂື້ນໃນມໍ່ໆນີ້ໃຫ້ມີບັນຍາກາດ ແລະ ເປັນຂະບວນການທີ່ຟົດຟື້ນ.

ຂ່າວ-ພາບ: ນັກຂ່າວເມືອງໄຊສະຖານ.