ໃນຕອນເຊົ້າວັນທີ 14 ກັນຍາ 2019, ທ່ານນາງ ປານີ ຢາທໍ່ຕູ້, ປະທານສະພາແຫ່ງຊາດ ພ້ອມຄອບຄົວ ໄດ້ເດີນທາງດ້ວຍເຮືອບີນ ເພື່ອໄປຢ້ຽມຢາມ ແລະ ໃຫ້ກຳລັງໃຈແກ່ ປະຊາຊົນ ແລະພະນັກງານ ພ້ອມດ້ວຍການນຳແຂວງ ແລະ ເມືອງທີ່ໄດ້ຮັບຜົນກະທົບຈາກໄພນໍ້າຖ້ວມ ຢູ່ເຂດເມືອງ ສອງຄອນ ແລະ ເມືອງ ຊົນນະບູລີ, ແຂວງສະຫວັນນະເຂດ, ໂດຍໄດ້ຮັບການຕ້ອນຮັບຢ່າງອົບອຸ່ນຈາກທ່ານ ສັນຕິພາບ ພົມວິຫານ, ເຈົ້າແຂວງໆສະຫວັນນະເຂດ ພ້ອມພັນລະຍາ, ຮອງປະທານສະພາແຂວງ, ການນຳແຂວງ, ພະແນກການອ້ອມຂ້າງແຂວງ, ແລະການນຳເມືອງສອງຄອນ, ແລະ ເມືອງຈຳພອນ.

ທ່ານ ນັນ ສິດສານຸພາບ, ເຈົ້າເມືອງສອງຄອນ ໄດ້ລາຍງານສະພາບ ແລະ ຜົນກະທົບຈາກໄພນ້ຳຖ້ວນ ຢູ່ເມືອງສອງຄອນຄື: ນັບແຕ່ທ້າຍເດືອນສິງຫາເປັນຕົ້ນມາ, ນໍ້າໄດ້ຖ້ວມເຮືອນປະຊາຊົນ ແລະ ເນື້ອທີ່ທຳການຜະລິດມີ 7 ກຸ່ມບ້ານ, ມີ 26 ບ້ານ, 3.242 ຄອບຄົວ, 20.125 ຄົນ, ຍິງ 10.319 ຄົນ, ເນື້ອທີ່ປັກດໍາຕົວຈິງ 15.948 ເຮັກຕາ, ເນື້ອທີ່ນາຖືກຖ້ວມ 6.563 ເຮັກຕາ, ເນື້ອທີ່ສວນ 27 ເຮັກຕາ, ຖ້ວມໜອງປາ 378 ໜອງ, ຄວາຍຕາຍ 1 ໂຕ, ງົວຕາຍ 56 ໂຕ, ສູນຫາຍ 100 ໂຕ, ແບ້ 43 ໂຕ, ສູນຫາຍ 50 ໂຕ, ອ່າງເກັບນໍ້າ 2 ແຫ່ງ, ສະຖານີສູບນໍ້າ 7 ແຫ່ງ, ບ້ານທີ່ຖືກຕັດຂາດຈາກຕົວເມືອງ 16 ບ້ານ, ມີ 2.235 ຄອບຄົວ, 14.123 ຄົນ, ຍິງ 7.346 ຄົນ, ບ້ານທີ່ຖືກຍົກຍ້າຍມີ 11 ບ້ານ, ມີ 1.853 ຄອບຄົວ, 11.932 ຄົນ, ຍິງ 6.253 ຄົນ, ຖ້ວມວັດ 15 ແຫ່ງ, ໂບດ 1 ແຫ່ງ, ຕະຫລາດ 2 ແຫ່ງ, ຖ້ວມເຫຼົ້າເຂົ້າ 2.235 ຫຼັງ, ຖ້ວມນ້ຳບາດານ 362 ໜ່ວຍ, ບໍ່ສາມາດນຳໃຊ້ໄຟຟ້າໄດ້ ມີ 5 ບ້ານ, ເສົາໄຟຟ້າຫັກ 3 ຕົ້ນ, ລະບົບນ້ຳປະປາໃຊ້ບໍໄດ້, ເສັ້ນທາງຖືກນ້ຳຖ້ວມ 1 ເສັ້ນ, ຖ້ວມບາງຈຸດ 7 ເສັ້ນ, ທາງຖືກນ້ຳກັດເຊາະ 11 ເສັ້ນ, ທາງຂາດ 3 ເສັ້ນມີ 3 ຈຸດ, ຖ້ວມໂຮງຮຽນ ມັດທະຍົມສົມບູນ ແລະ ປະຖົມ 13 ແຫ່ງ, ແລະ ສຸກສາລາ 2 ແຫ່ງ.

ນອກຈາກນີ້, ກໍ່ຍັງເກີດມີສະພາບ ການເຈັບເປັນໃນໄລຍະນ້ຳຖ້ວມເຊັ່ນ: ນ້ຳຄັນກິນຕີນ, ໄຂ້ຫວັດ, ເຈັບຫົວເປັນວິນ, ປວດຕາມຕົນໂຕ, ຜື່ນຄັນ ແລະ ຄວາມດັນສູງ ແລະ ພະຍາດອຶ່ນໆອີກ.ສຳລັບແຜນຟື້ນຟູພາຍຫຼັງນ້ຳລົງ ແມ່ນຕ້ອງເກັບກຳຢ່າງລະອຽດທາງດ້ານຜົນເສຍຫາຍດ້ານຕ່າງໆ, ພ້ອມທັງ ຕິດຕາມກວດກາ ແລະ ເຝົ້າລະວັງ ເພື່ອປ້ອງກັນພະຍາດທີ່ອາດຈະເກີດຂຶ້ນກັບຄົນ ແລະ ສັດຕໍ່ໄປ.
ຈາກນັ້ນ, ທ່ານ ສັນຕິພາບ ພົມວິຫານ ກໍ່ໄດ້ລາຍງານສະພາບນ້ຳຖ້ວມຢູ່ພາຍໃນແຂວງສະຫວັນນະເຂດ ວ່າຍັງມີນ້ຳຖ້ວມສູງຢູ່ເຂດ ເມືອງສອງຄອນ, ຈຳພອນ ແລະ ຊົນນະບູລີ, ເຮືອນຊານຂອງປະຊາຊົນຫຼາຍຫຼັງຄາ ຍັງຈົມຢູ່ໃຕ້ນ້ຳ ແລະ ຄາດວ່າຍັງອີກຫຼາຍມື້ກວ່າທີ່ນ້ຳຈະຫຼຸດລົງ ແລະ ກັບຄືນສູ່ປົກກະຕິ, ໂດຍຜົນເສຍຫາຍຈາກນ້ຳຖ້ວມໃນຄັ້ງນີ້ ມີຜົນກະທົບຕໍ່ບ່ອນທີ່ຢູ່ອາໄສ ມີ 10 ເມືອງ, 165 ບ້ານ, 13.736 ຄອບຄົວ, 30.637 ຄົນ, ໃນນັ້ນຕ້ອງຍົກຍ້າຍປະຊາຊົນອອກໄປຢູ່ບ່ອນທີ່ປອດໄພມີ 81 ບ້ານ, 7.433 ຄອບຄົວ, 27.252 ຄົນ, ບາງຄອບຄົວໄດ້ສູນເສຍສະມາຊິກໃນຄອບຄົວ, ເສຍຊີວິດ 4 ຄົນ, ຜົນກະທົບຕໍ່ເນື້ອທີ່ທຳການຜະລິດຂອງປະຊາຊົນໃນ 14 ເມືອງ 1 ນະຄອນ ມີ 463 ບ້ານ, 34.910 ຄອບຄົວ, ເນື້ອທີ່ນາປີຖືກນ້ຳຖ້ວມ 49.274 ເຮັກຕາ, ເນື້ອທີ່ສວນປູກພືດ 2.585 ເຮັກຕາ, ອ່າງເກັບນ້ຳ 11 ແຫ່ງ, ຄູກັນນ້ຳ 4 ແຫ່ງ, ປະຕູນ້ຳ 12 ແຫ່ງ ແລະ ສາຖານີຈັກສູບນ້ຳ 9 ແຫ່ງ, ໜອງປາຖືກນ້ຳຖ້ວມ 1.819 ໜອງ, ສັດລ້ຽງຕາຍ ແລະ ສູນຫາຍ 3.202 ໂຕ.

ນອກຈາກນັ້ນ, ກໍ່ຍັງມີຜົນກະທົບຕໍ່ພື້ນຖານໂຄງລ່າງຄື: ເສັ້ນທາງເສຍຫາຍຫຼາຍກວ່າ 54 ເສັ້ນ, ບາງບ່ອນທາງຂາດ, ນ້ຳເຊາະເຈື່ອນ, ຂົວເປເພຍຸບລົງ, ເສັ້ນທາງຫຼາຍບ່ອນ, ຖືກຕັດຂາດບໍ່ສາມາດສັນຈອນໄປ-ມາໄດ້, ການເຂົ້າເຖິງປະຊາຊົນຜູ້ປະສົບໄພພົບຄວາມຫຍຸ້ງຍາກ, ມູນຄ່າຄວາມເສຍຫາຍເສັ້ນທາງ ແລະ ຂົວຫຼາຍກວ່າ 72 ຕື້ກີບ, ເສົາໄຟຟ້າຫຼາຍບ່ອນຫັກລົ້ມໃນບາງເຂດພື້ນທີ່ບໍ່ສາມາດກະຈາຍກະແສໄຟຟ້າໄດ້, ໜໍ້ແປງໄຟ, ກົງເຕີໄຟ, ເຄື່ອງໃຊ້ໄຟຟ້າຂອງປະຊາຊົນຈຳນວນຫຼາຍຖືກນ້ຳຖ້ວມເສຍຫາຍ ເຊິ່ງຍັງບໍ່ສາມາດສັງລວມຂໍ້ມູນໄດ້; ນອກນັ້ນ ຍັງມີໂຮງຮຽນ 165 ແຫ່ງຖືກນ້ຳຖ້ວມ ແລະ 187 ໂຮງຮຽນບໍ່ສາມາດເປີດໄຂສົກຮຽນໃຫມ່ທັນ. ມາຮອດປັດຈຸບັນ, ມີ 81 ໂຮງຮຽນໃນບ່ອນທີ່ຖືກນໍ້າຖ້ວມບໍ່ສາມາດເປີດການຮຽນ – ການສອນໄດ້, ມີສຸກສາລາ 8 ແຫ່ງຖືກນ້ຳຖ້ວມ ບໍ່ສາມາດບໍລິການປະຊາຊົນໄດ້, ນ້ຳສ້າງ, ນ້ຳບາດານ 659 ໜ່ວຍ ແລະ ວິດຖ່າຍຫຼາຍພັນໜ່ວຍຖືກຖ້ວມ. ສໍາລັບຄວາມຕ້ອງການອັນຮີບດ່ວນໃນສະເພາະໜ້າ ຕາມການຄິດໄລ່ໃນເບື້ອງຕົ້ນ ແມ່ນຈະຊ່ວຍໃຫ້ຜູ້ປະສົບໄພມີເຂົ້າກິນ 3 ເດືອນ, ເປັນເຂົ້າຢ່າງໜ້ອຍ 1.500 ໂຕນ, ງົບປະມານທີ່ຈະຊ່ວຍປັບປຸງເສັ້ນທາງ, ແລະ ຂົວໃຫ້ກັບຄືນສູ່ປົກກະຕິ ປະມານ 60 ກ່ວາຕື້ກີບ.

ນອກຈາກນັ້ນ, ຍັງຕ້ອງການງົບປະມານເພື່ອນຳໄປຟື້ນຟູ ວຽກ ງານກະສິກຳ, ເປັນຕົ້ນ ຊົນລະປະທານ, ແນວພັນເຂົ້າ ແລະ ອື່ນໆປະມານ ເກືອບ 1 ຕື້ ກີບ; ງົບປະມານສຳລັບສາທາລະນະສຸກ ໂດຍສະເພາະຢາປົວພະຍາດ, ແລະ ຟື້ນຟູສາທາລະນະສຸກຫຼັງນ້ຳລົງ ປະມານ 895 ລ້ານກີບ.
ໃນໂອກາດດ່ຽວກັນ, ທ່ານນາງປານີ ຢາທໍ່ຕູ້ ກໍ່ໄດ້ສະແດງຄວາມຄິດເຫັນ ແລະ ສັນລະເສີນຍ້ອງຍໍ ອຳນາດການປົກຄອງທຸກຂັ້ນທີ່ເອົາໃຈໃສ່ຊ່ວຍເຫຼືອປະຊາຊົນ ພ້ອມທັງສະແດງຄວາມເປັນຫວ່ງເປັນໃຍປະຊາຊົນທີ່ຖືກຜົນກະທົບຈາກໄພພິບັດນ້ຳຖ້ວນໃນຄັ້ງນີ້ ແລະ ສືບຕໍ່ໃຫ້ການຊ່ວຍເຫຼືອປະຊາຊົນ ໃນດ້ານທີ່ຢູ່ອາໄສຊົ່ວຄາວ, ອາຫານການກິນ, ນ້ຳດື່ມ, ຢາປົວພະຍາດ, ທັງສືບຕໍ່ໃນການປຸກລະດົມຂົນຂວາຍເອົາເຄື່ອງໃຊ້ເພື່ອມາຊ່ວຍເຫຼືອຜູ້ທີ່ຖືກຜົນກະທົບຈາກໄພນ້ຳຖ້ວມ. ສຳລັບບ້ານທີ່ຢູ່ເຂດນ້ຳຫຼຸດລົງແລ້ວ ກໍ່ໃຫ້ເບິ່ງຄວາມຕ້ອງການຂອງປະຊາຊົນ ບໍ່ວ່າຈະເປັນແນວພັນພືດ, ແນວພັນເຂົ້າ, ດ້ານສຸກສາລາ, ວິດຖ່າຍ, ແລະ ໂຮງຮຽນ.

ໃນໂອກາດທີ່ມາຢ້ຽມຢາມຄັ້ງນີ້, ທ່ານນາງ ປານີ ຢາທໍ່ຕູ້ ຍັງໄດ້ມອບເຄື່ອງອຸປະໂພກ ແລະບໍລິໂພກໃຫ້ປະຊາຊົນທີ່ຖືກຜົນກະທົບ ເຊິ່ງປະກອບມີ ຢາປົວພະຍາດ, ອາຫານແຫ້ງ, ນ້ຳດື່ມ, ແລະ ນ້ຳມັນເຊື້ອໄຟ ຈຳນວນ 10.000 ລິດ ລວມມູນຄ່າ 168 ລ້ານກີບ, ເຂົ້າ 27 ໂຕນ, ແລະ ມອບເງິນຊ່ວຍເຫຼືອໃຫ້ແກ່ເມືອງ ສອງຄອນ, ຈຳພອນ, ແລະ ຊົນນະບູລີ ມູນຄ່າ 100 ລ້ານກີບ. ຈາກນັ້ນ, ທ່ານ ປະທານສະພາ ແຫ່ງຊາດ ພ້ອມດ້ວຍ ທ່ານ ສັນຕິພາບ ພົມວິຫານ ແລະ ພັນລະຍາ ກໍ່ໄດ້ຂີ່ເຮືອບີນເພື່ອເດີນທາງໄປຢ້ຽມຢາມປະຊາຊົນທີ່ໄດ້ຮັບຜົນກະທົບໄພນ້ຳຖ້ວມຢູ່ເມືອງ ຊົນນະບູລີຕື່ມອີກ ໂດຍຖືກຕ້ອນຮັບຈາກທ່ານ ສຸວິໄລ ຫຼວງສະລາດ, ເຈົ້າເມືອງ ຊົນນະບູລີ ພ້ອມຄະນະ.

ພາບ-ຂ່າວຈາກ: ວິທະຍຸກະຈາຍສຽງແຫ່ງຊາດ