ທ່ານ ສຸກສະຫວັນ ໄຊຍະແສງ ຫົວໜ້າທະນາຄານການຄ້າຕ່າງປະເທດລາວ ມະຫາຊົນ ສາຂາແຂວງສາລະວັນ ໃຫ້ສຳພາດວ່າ: ໜ່ວຍບໍລິການທະນາຄານການຄ້າຕ່າງປະເທດລາວ ມະຫາຊົນ ແຕ່ລະໜ່ວຍແມ່ນມີຄວາມສ່ຽງທີ່ຈະເກີດນ້ຳຖ້ວມ ແລະ ສ່ຽງຈະສ້າງຄວາມເສຍຫາຍຕໍ່ຊັບສິນຂອງທະນາຄານ ກໍ່ຄືຂອງປະຊາຊົນ ເປັນຕົ້ນ: ທະນະບັດເງິນ ຈຳນວນຫຼວງຫຼາຍ ໂດຍສະເພາະເຂດທີ່ມີຄວາມສ່ຽງຫຼາຍ ຄື: ສຳໜັກງານໜ່ວຍບໍລິການບ້ານນາເຫຼັກ ເມືອງສາລະວັນ ແລະ ຕູ້ບໍລິການ ATM ອີກຈຳນວນ 2 ໜ່ວຍ ຊື່ງພາຍໃນມີເງິນຈຳນວນຫຼວງຫຼາຍ ຕໍ່ກັບເຫດການດັ່ງກ່າວນັ້ນ, ທາງຄະນະສາຂາ ແລະ ພະນັກງານ ໄດ້ຕິດຕາມ, ເຝົ້າລະວັງສະພາບນ້ຳຂຶ້ນຢ່າງໃກ້ຊິດ ໃນວັນທີ 3 ກັນຍາ ຜ່ານມານັ້ນ ແລະ ໄດ້ມີການປຶກສາຫາລື ໂດຍດ່ວນ ເພື່ອປະຕິບັດແຜນງານກອບກູ້ເອົາຊັບສິນ, ເອກະສານ, ເຄື່ອງໃຊ້ຫ້ອງການ ແລະ ອື່ນໆ ໄດ້ທັນການ,

ນອກນັ້ນຍັງມີຈຸດບໍລິການຕູ້ ATM ຢູ່ບ້ານຂົວເສັດ ທີ່ມີຄວາມສ່ຽງອາດເກີດນ້ຳຖ້ວມ ຊື່ງໄດ້ສັ່ງການໃຫ້ໜ່ວຍບໍລິການເມືອງເລົ່າງາມ ເລັ່ງກອບກູ້ໂດຍໄວ. ສຳລັບຢູ່ເມືອງຄົງເຊໂດນ ກໍ່ໄດ້ປະຕິບັດເຊັ່ນດຽວກັນ. ໄພພິບັດໃນຄັ້ງນີ້ ກໍ່ປາສະຈາກບໍ່ໄດ້ຕໍ່ຄວາມເສຍຫາຍ ເປັນຕົ້ນ: ແມ່ນສຳນັກງານໜ່ວຍບໍລິການບ້ານນາເຫຼັກ ທີ່ຖືກນ້ຳຖ້ວມ ແລະ ມີວັດຖຸສິ່ງຂອງຈຳນວນໜື່ງເສຍຫາຍ ເປັນຕົ້ນ: ປະເພດເອກະສານ, ເຄື່ອງຈັກປັ່ນໄຟຟ້າ ແລະ ອື່ນໆ ຄຽງຄູ່ກັນນີ້, ນອກຈາກຈະກອບກູ້ເອົາຊັບສິນໄດ້ທ່ວງທັນແລ້ວ ຍັງໄດ້ຊ່ວຍເຫຼືອສັງຄົມ ເປັນຕົ້ນ: ໄດ້ນຳເອົານ້ຳດື່ມ, ໜີ່ ແລະ ປາປ໋ອງ ໄປມອບໃຫ້ຄະນະກຳມະການຄວບຄຸມໄພພິບັດຂັ້ນແຂວງ ເພື່ອນຳໄປແຈກຢາຍໃຫ້ປະຊາຊົນຜູ້ປະສົບໄພ.
ທ່ານຍັງໄດ້ກ່າວຕື່ມອີກວ່າ: ທາງຄະນະສາຂາແຂວງສາລະວັນ ກໍ່ຍັງໄດ້ສະເໜີສຳນັກງານໃຫຍ່ ເພື່ອຊ່ວຍເຫຼືອແບ່ງເບົາບັນທຸກໃນແຕ່ລະເມືອງ ທີ່ປະສົບໄພນ້ຳຖ້ວມ, ນອກນັ້ນຍັງໄດ້ເປີດໂຄງການຊ່ວຍເຫຼືອແບ່ງປັນນ້ຳໃຈຈາກສັງຄົມ ນັບແຕ່ວັນທີ 2 ກັນຍາເປັນຕົ້ນມາ, ຊື່ງເປີດຮັບການຊ່ວຍເຫຼືອຈາກສັງຄົມທຸກພາກສ່ວນ ມາຮອດປັດຈຸບັນນີ້ລວມຍອດເງິນບໍລິຈາກໄດ້ທັງໝັດ 40 ລ້ານກວ່າກີບ ແລະ ຈະສືບຕໍ່ຮັບບໍລິຈາກ, ທັງໄດ້ກະກຽມນໍາໄປມອບໃຫ້ຄະນະກຳມະການຄວບຄຸມໄພພິບັດຂັ້ນແຂວງ.

ຂ່າວ-ພາບ: ວິໄລວອນ ສິດທິໄຊ