ວັນທີ 17 ກັນຍານີ້, ທ່ານ ສຸກສະຫວັນ ໄຊຍະແສງ ຫົວໜ້າທະນາຄານການຄ້າຕ່າງປະເທດລາວ ມະຫາຊົນ ສາຂາແຂວງສາລະວັນ ພ້ອມຄະນະ ໄດ້ນຳເອົາເຂົ້າສານໜຽວໄປມອບໃຫ້ຜູ້ປະສົບໄພນ້ຳຖ້ວມ ຈຳນວນ 20 ໂຕນ ມູນຄ່າ 160 ລ້ານກວ່າກີບ, ໃນນັ້ນໄດ້ມອບໃຫ້ເມືອງວາປີ 10 ໂຕນ ແລະ ເມືອງຄົງເຊໂດນ 10 ໂຕນ, ຕາງໜ້າຮັບໂດຍ: ເຈົ້າເມືອງໆວາປີ ແລະ ເມືອງຄົງເຊໂດນ ຕາງໜ້າໃຫ້ອົງການປົກຄອງເມືອງ, ຊື່ງເປັນການປະກອບສ່ວນຂອງທະນາຄານການຄ້າຕ່າງປະເທດລາວ ມະຫາຊົນ ເພື່ອຊ່ວຍເຫຼືອຜູ້ປະສົບໄພນ້ຳຖ້ວມຢູ່ແຂວງສາລະວັນ.

ທ່ານ ສຸກສະຫວັນ ໄຊຍະແສງ ໃຫ້ຮູ້ວ່າ: ທະນາຄານການຄ້າຕ່າງປະເທດລາວ ມະຫາຊົນ ກໍ່ຄືຄະນະນຳສຳນັກງານໃຫຍ່ ມີຄວາມເປັນຫ່ວງເປັນໄຍປະຊາຊົນ ໄດ້ປຶກສາຫາລື, ຄົ້ນຄວ້າ ແລະ ບິແບ່ງທຶນຮອນຈຳນວນໜື່ງເຂົ້າຊ່ວຍເຫຼືອປະຊາຊົນທີ່ໄດ້ຮັບຜົນກະທົບຈາກໄພນໍ້າຖ້ວມ ຢູ່ 6 ແຂວງ ຄື: ແຂວງຄຳມ່ວນ, ສະຫວັນນະເຂດ, ຈຳປາສັກ, ເຊກອງ, ອັດຕະປື ແລະ ແຂວງສາລະວັນ ມູນຄ່າ 600 ລ້ານກີບ ໂດຍໄດ້ຈັດຊື້ເປັນເຂົ້າສານໜຽວຈາກໂຮງສີເຂົ້າ IDP ມາມອບໃຫ້ແຕ່ລະແຂວງ, ແຕ່ລະເມືອງ.

ສຳລັບແຂວງສາລະວັນ ກໍ່ໄດ້ມອບໃຫ້ຢູ່ 2 ເມືອງ ຄື: ເມືອງວາປີ ຈຳນວນ 10 ໂຕນ ມູນຄ່າ 82 ລ້ານກີບ ແລະ ເມືອງຄົງເຊໂດນ 10 ໂຕນ ມູນຄ່າ 82 ລ້ານກີບ ເປັນການປະກອບສ່ວນເພື່ອຊ່ວຍເຫຼືອພໍ່ແມ່ປະຊາຊົນທີ່ປະສົບໄພນ້ຳຖ້ວມຢູ່ແຂວງສາລະວັນ ດ້ວຍຄວາມມຸ່ງມາດປາດຖະໜາ ແບ່ງເບົາບັນເທົາທຸກຊ່ວຍເຫຼືອປະຊາຊົນທີ່ປະສົບໄພ, ປະກອບສ່ວນເປັນເຂົ້າສານ ທີ່ເຫັນວ່າ: ມີຄວາມຈຳເປັນ ແລະ ສຳຄັນຕໍ່ກັບຊີວິດການເປັນຢູ່ຫຼັງນ້ຳຖ້ວມ.
ທ່ານຍັງໄດ້ກ່າວຕື່ມອີກວ່າ: ນອກຈາກການຊ່ວຍເຫຼືອໃນຄັ້ງນີ້ ກໍ່ຍັງຈະສືບຕໍ່ຊ່ວຍເຫຼືອ ໂດຍສະເພາະໄດ້ເປີດໂຄງການຊ່ວຍເຫຼືອແບ່ງປັນນ້ຳໃຈຈາກສັງຄົມ ທີ່ໄດ້ເລີ່ມເປີດມາແຕ່ວັນທີ 2 ກັນຍາ ເປັນຕົ້ນມາ ແລະ ມາຮອດປັດຈຸບັນມີຍອດລາຍຮັບບໍລິຈາກທັງໝົດ 40 ລ້ານກວ່າກີບ, ພ້ອມນັ້ນກໍ່ຈະໄດ້ສືບຕໍ່ນໍາໄປມອບໃຫ້ປະຊາຊົນຜູ້ປະສົບໄພນໍ້າຖ້ວມ ທັງເປັນວັດຖຸ ແລະ ເງິນສົດຈຳນວນໜຶ່ງ ໂດຍຈະໄດ້ນຳສະເໜີອົງການປົກຄອງເມືອງ ເພື່ອຈະໄດ້ໄປແຈກຢາຍໃຫ້ພໍ່ແມ່ຊາຊົນໃນບ້ານ ທີ່ໄດ້ຮັບຜົນກະທົບຢ່າງໜັກ ດ້ວຍຕົນເອງ.

ຂ່າວ-ພາບ: ວິໄລວອນ ສິດທິໄຊ