ໃນວັນທີ 17 ກັນຍາ 2019 ສະມາຄົມ​ຈີນ ນະຄອນຫລວງ​ວຽງຈັນ,​ ​ໄດ້​ຈັດ​ງານ​ລ້ຽງພົບ​ປະ​ສັງ​ສັນ ຄົນ​ເຊື້ອ​ຊາດ​ຈີນ ຫວຽດນາມ-ກຳປູ​ເຈຍ-​ລາວ, ​ເນື່ອງ​ໃນ​ໂອກາດ ວັນ​ສະຖາປະນາ ສປ ຈີນ ຄົບຮອບ 70 ປີ, ພ້ອມ​ທັງ​ລະດົມ​ທຶນ​ຊ່ວຍ​ເຫລືອຜູ້​ປະສົບ​ໄພ​ນໍ້າ​ຖ້ວມ ​ຢູ່​ແຂວງ​ພາກ​ໃຕ້​ຂອງ​ລາວ ໃຫ້ກຽດເຂົ້າຮ່ວມໂດຍ ທ່ານ ໄຊສົມພອນ ພົມວິຫານ ປະທານສູນກາງ ແນວລາວ ສ້າງຊາດ, ທ່ານ ນາງ ແສງເດືອນ ອ່າງຄໍານາຄະ​ວິດ ປະທານສະມາຄົມຈີນ ນະຄອນຫລວງ, ພ້ອມດ້ວຍຄົນເຊື້ອຊາດຈີນ ທີ່ອາໃສ່ຢູ່ ຫວຽດນາມ-ກຳປູ​ເຈຍ-​ລາວ ເຂົ້າຮ່ວມ.

ພາຍໃນງານບັນດາຄົນ​ເຊື້ອ​ຊາດ​ຈີນ ຫວຽດນາມ-ກຳປູ​ເຈຍ-​ລາວ ໄດ້ພ້ອມ​ໃຈກັນລະດົມທຶນ ຊ່ວຍ​ເຫລືອ​ຜູ້​ປະສົບ​ໄພ​ນໍ້າ​ຖ້ວມ ລວມມູນ​ຄ່າທັງ​ໝົດ 4.750 ​ໂດ​ລາ​ສະ​ຫະລັດ, 900 ​ໂດ​ລາ​ອົດ​ສະ​ຕາ​ລີ ​ແລະ 3 ​ແສນ​ກີບ,  ​ເຊິ່ງຕ່າງໜ້າມອບ​ເງິນ​ໂດຍ ທ່ານ ອີ​ຈ້ຽງຊຽງ ປະທານ​ສະມາ ຄົມ​ເຊື້ອ​ຊາດ​ຈີນ ຫວຽດນາມ-ກຳປູ​ເຈຍ-​ລາວ ​ແລະ ຮັບ​ໂດຍ ທ່ານ ໄຊສົມພອນ ພົມວິຫານ ປະທານສູນກາງ ແນວລາວສ້າງຊາດ.

ໃນໂອກາດນີ້, ທ່ານ ຄຳມະນີ ອິນທິລາດ ລັດຖະມົນຕີ ກະຊວງພະລັງງານ ແລະ ບໍ່ແຮ່ ທັງ ເປັນປະທານສະມາຄົມມິດຕະພາບ ລາວ-ຈີນ ຂັ້ນສູງກາງ ແຈ້ງໃຫ້ຮູ້ວ່າ: ສປປ ລາວ ​ແລະ ສ​ປ ຈີນ ​ໄດ້​ມີ​ການ​ພັດທະນາ​ຄວາມ​ສຳພັນ ​ແລະ ການ​ຮ່ວມ​ມື​ຊ່ວຍ​ເຫລືອ​ເຊິ່ງກັນ ​ແລະ ກັນ ຢ່າງ​ມີໝາກຜົນ ອັນ​ໄດ້​ນຳ​ມາ​ເຊິ່ງຜົນ​ປະ​ໂຫຍ​ດຕົວ​ຈິງ​ໃຫ້​ແກ່​ປະ​ເທດ ​ແລະ ປະຊາຊົນ​ຂອງ​ທັງ​ສອງ​ປະ​ເທດ ລາວ-​ຈີນ ​ມາ​ໂດຍ​ຕະຫລອດ ສາມາດ​ເວົ້າ​ໄດ້​ວ່າ ສາຍ​ພົວພັນ​ສອງ​ປະ​ເທດ​ລາວ ​ແລະ ຈີນ ​ໃນ​ໄລຍະ​ນີ້ ​ເປັນ​ໄລຍະ​ສາຍ​ພົວພັນ​ທີ່​ດີ​ທີ່​ສຸດ ​ເຊິ່ງນັບ​ແຕ່​ ປີ 2009 ສອງ​ປະ​ເທດ ​ໄດ້​ຍົກ​ລະດັບ​ສາຍ​ພົວພັນ​ການ​ຮ່ວມ​ມື ​ເປັນຄູ່​ຮ່ວມ​ມື​ຍຸດ​ທະ​ສາດ​ຮອບດ້ານ​ ລາວ-​ຈີນ ​ເປັນ​ຕົ້ນ​ມາ ທັງ​ສອງ​ຝ່າຍ​ໄດ້​ມີ​ຄວາມ​ໄວ້​ເນື້ອ​ເຊື່ອ​ໃຈ​ກັນ​ ທາງ​ດ້ານ ການ​ເມືອງ​ນັບ​ມື້​ນັບ​ເລີກ​ເຊິ່ງ ການ​ຮ່ວມ​ມື​ແບບ​ຕ່າງ​ຝ່າຍ​ຕ່າງ​ ໄດ້​ຮັບ​ຜົນ​ປະ​ໂຫຍ​ດ ​ໃນ​ທຸກ​ຂົງ​ເຂດ​ໄດ້​ມີ​ຜົນ ສຳ​ເລັດອັນ​ອຸດົມສົມບູນ ​ເຖິງ​ວ່າ​ໄລຍະ​ນີ້ ສະພາບ​ການ​ຂອງ​ພາກ​ພື້ນ ​ແລະ ສາກົນ ມີ​ການ​ຜັນ​ປ່ຽນຢ່າງ​ໄວ​ວາ ​ແລະ ສັບສົນ ​ແຕ່​ທັງ​ສອງ​ຝ່າຍ ​ໄດ້​ສືບ​ຕໍ່​ຍຶດໝັ້ນທິດ​ທາງ ການ​ພົວພັນ​ບົນ​ພື້ນຖານ ຄວາມ​ໄວ້​ເນື້ອ​ເຊື່ອ​ໃຈ​ເຊິ່ງກັນ ​ແລະ ກັນ ຕາມ​ທິດ 4 ດີ ​ເຮັດ​ໃຫ້ການ​ພົວພັນ​ແບບ ​ຄູ່​ຮ່ວມ​ມື​ຍຸດ​ທະ​ສາດ​ຮອບດ້ານ ໝັ້ນ ຄົງ​ຍາວນານ, ລະຫວ່າງ​ສອງ​ປະ​ເທດ​ ລາວ-​ຈີນ ນັບ​ມື້​ນັບ​ມີ​ຄວາມ​ອຸດົມສົມບູນ, ມີ​ຄວາມ​ເຊື່ອໝັ້ນ​ເຊິ່ງກັນ ​ແລະ ກັນ, ​ໃຫ້ການ​ຊ່ວຍ​ເຫລືອ ​ແລະ ສ້າງ​ຜົນ​ປະ​ໂຫຍ​ດຮ່ວມກັນ​ໃນ​ລະດັບ​ສູງ.