ພິທີ ມອບ-ຮັບ ສັດລ້ຽງ ປະເພດ ງົວ ໃຫ້ຄອບຄົວທຸກຍາກຢູ່ 3 ບ້ານຄື: ບ້ານ ຫົວເມືອງ, ບ້ານ ຫ້ວຍຮາກ ແລະ ບ້ານລາວສະໂນ ຂອງເມືອງຊຽງຮ່ອນ ໄດ້ຈັດຂື້ນໃນວັນທີ 17 ກັນຍາ 2019 ນີ້ ຢູ່ທີ່ບ້ານຫົວເມືອງ ເມືອງຊຽງຮ່ອນແຂວງໄຊຍະບູລີ ໂດຍການເປັນກຽດເຂົ້າຮ່ວມຂອງທ່ານ ນາງ ແພງຈັນ ແກ້ວມະນີວົງ ຫົວໜ້າພະແນກ ແຮງງານ ແລະ ສະຫວັດດີການສັງຄົມ ແຂວງໄຊຍະບູລີ ມີບັນດາທ່ານ ຄະນະກຳມະການຂັ້ນເມືອງ ອຳນາດການປົກຄອງບ້ານ ແລະ ຄອບຄົວທຸກຍາກຈຳນວນ 44 ຄອບຄົວເຂົ້າຮ່ວມ.

ໃນພິທີ ທ່ານ ອິ່ນ ບຸນຍາວົງ ຫົວໜ້າຫ້ອງການ ແຮງງານ ແລະ ສະຫວັດດີການສັງຄົມເມືອງຊຽງຮ່ອນ ໄດ້ລາຍງານການຈັດຕັ້ງປະຕິບັດກ່ຽວກັບການຈັດຊື້ສັດໂຄງການສົ່ງເສີ່ມການລ້ຽງສັດຂອງຄອບຄົວທຸກຍາກຢູ່ເມືອງຊຽງຮ່ອນ ແລະ ການມອບ-ຮັບ ສັດລ້ຽງໃນຄັ້ງນີ້ ເຊິ່ງປະກອບມີຄອບຄົວທຸກຍາກຈາກ 3 ບ້ານຄື: ບ້ານ ຫົວເມືອງປະກອບມີ ຈຳນວນ 30 ຄອບຄົວ, ບ້ານ ຫ້ວຍຮາກມີ 8 ຄອບຄົວ ແລະ ບ້ານ ລາວສະໂນ ມີຈຳນວນ 6 ຄອບຄົວ ລວມທັງໝົດ 44 ຄອບຄົວ ເຊິ່ງຄອບຄົວໝຶ່ງຈະໄດ້ງົວຈຳນວນ 2 ໂຕ ລວມງົວທັງໝົດ 88 ໂຕ ມູນຄ່າ 283,000,000 ກີບ ໂດຍເງື່ອນໄຂຂອງໂຄງການໄດ້ສັນຍາວ່າ: ການລ້ຽງສັດໄດ້ກໍານົດເວລາ 6 ປີ ແຕ່ ເດືອນກັນຍາ 2019 – ເດືອນກັນຍາ 2025 ພາຍຫຼັງໝົດສັນຍາການລ້ຽງໃນໄລຍະ 6 ປີແລ້ວ ຜູ້ໄດ້ຮັບສັດລ້ຽງຕ້ອງໄດ້ມອບຕົ້ນທຶນຄືນເປັນງົວຈຳນວນ 2 ໂຕ ຄູ່ແມ່ລູກຄືນໃຫ້ຫ້ອງການແຮງງານ ແຮງງານສະຫວັດດີການສັງຄົມເມືອງ ເພື່ອຂະຫຍາຍໃຫ້ຄອບຄົວໃໝ່ ສ່ວນເຫຼືອແມ່ນເປັນຂອງຜູ້ລ້ຽງທັງໝົດ.

ຕອນທ້າຍຍັງໄດ້ຮັບຟັງການໂອ້ລົມຂອງທ່ານ ນາງ ແພງຈັນ ແກ້ວມະນີວົງ ຫົວໜ້າພະແນກແຮງງານ ແລະ ສະຫວັດດີການສັງຄົມ ແຂວງ ທ່ານໄດ້ເໜັ້ນນັກໃຫ້ຄອບຄົວທຸກຍາກທີ່ໄດ້ຮັບສັດລ້ຽງຈາກໂຄງການ ຈົ່ງພ້ອມກັນເອົາໃຈໃສ່ໃນການລ້ຽງ ແລະ ການຮັກສາສັດລ້ຽງ ໃຫ້ມີການ ເກີດແມ່ແຜ່ລູກ ໃຫ້ໄດ້ຂາຍເປັນສິນຄ້າແກ້ໄຂຊີວິດການເປັນຢູ່ໃຫ້ດີຂື້ນ ເພື່ອເຮັດໃຫ້ຄອບຄົວຂອງຕົນເອງຫຼຸດພົ້ນອອກຈາກຄວາມທຸກຍາກໃນຕໍ່ໜ້ານີ້ ໂຄງການສົ່ງເສີມການລ້ຽງສັດຂອງກະຊວງແຮງງານ ແລະ ສະຫວັດດີການສັງຄົມ ຢູ່ເມືອງຊຽງຮ່ອນ ໂດຍພາຍໄຕ້ການສະໜັບສະໜູນຂອງ ກອງທຶນເພື່ອນຮ່ວມງານ ຂອງຢີ່ປຸ່ນ ກັບ ລັດຖະບານ ສປປລາວ.

ໂດຍ: ດອນ ຂຽວພະນາ.