ກອງປະຊຸມວິສາມັນຄົບຄະນະບໍລິຫານງານອົງການພຸດທະສາສະໜາສັມພັນລາວແຂວງເຊກອງ ເພື່ອຈັດຕັ້ງກັມມາທິການ ການຕ່າງປະເທດຂັ້ນແຂວງ ໄດ້ໄຂຂຶ້ນໃນວັນທີ 18 ກັນຍາ 2019 ທີ່ສະໂມສອນຫ້ອງວ່າການແຂວງ ໂດຍມີພຣະອາຈານໃຫຍ່ ປອ ດໍາຣົງ ພິມມະຈັກ ຫົວໜ້າກັມມາທິການ ການຕ່າງປະເທດສູນກາງ ອພສ, ພຣະອາຈານໃຫຍ່ ບຸນໂຖ້ຍ ໄຊຍະບຸດ ເຈົ້າຄະນະ ອພສ ແຂວງເຊກອງ, ທ່ານ ຖາວອນ ພົມມະໄລລຸນ ຮອງເຈົ້າແຂວງເຊກອງ; ມີພຣະເຖລະນຸເຖລະ, ບັນດາພະແນກ-ຫ້ອງການ ແລະພາກສ່ວນກ່ຽວຂ້ອງເຂົ້າຮ່ວມ.

ໃນກອງປະຊຸມ ຊຶ່ງພາຍຫຼັງທີ່ພຣະອາຈານໃຫຍ່ ບຸນໂຖ້ຍ ໄຊຍະບຸດ ເຈົ້າຄະນະ ອພສ ແຂວງເຊກອງ ໄດ້ກ່າວເປີດກອງປະຊຸມແລ້ວ ພຣະອາຈານໃຫຍ່ ດໍາຣົງ ພິມມະຈັກ ຫົວໜ້າກັມມາທິການ ການຕ່າງປະເທດສູນກາງ ອພສ ກໍໄດ້ຜ່ານເນື້ອໃນ ວ່າດ້ວຍພາລະບົດບາດ, ສິດ ແລະໜ້າທີ່ຂອງກັມມາທິການຕ່າງປະເທດ; ຮັບຟັງການປະກອບຄໍາເຫັນກ່ຽວກັບວຽກງານການຕ່າງປະເທດ; ຮັບຟັງການມີຄໍາເຫັນຂອງທ່ານ ຖາວອນ ພົມມະໄລລຸນ ຮອງເຈົ້າແຂວງເຊກອງ.

ຫຼັງຈາກນັ້ນ ພຣະອາຈານ ຫຼັກຄໍາ ໂພທິປັນຍານັນທິ ຄະນະບໍລິຫານງານສູນກາງ ອພສ ໄດ້ຂຶ້ນຜ່ານຂໍ້ຕົກລົງວ່າດ້ວຍການຮັບຮອງ ແລະການແຕ່ງຕັ້ງຄະນະກັມມາທິການ ການຕ່າງປະເທດແຂວງເຊກອງ ຊຶ່ງປະກອບມີພຣະອາຈານ ປທ ບົວເງິນ ແສງມະນີລາດ ເປັນຫົວໜ້າຄະນະກັມມາທິການ; ພຣະອາຈານ ຄໍາພາ ເພັດອາໄພ ເປັນຮອງຫົວໜ້າກັມມາທິການ; ພຣະອາຈານ ສີສັນ ໄຊຍະສິດ ແລະພຣະອາຈານ ສົມສຸກ ວັດທະນະທໍາ ເປັນຄະນະກັມມາທິການ.

ຂ່າວ : ສັນຍາ